ಸಂಪಾದಕೀಯ್:
ಖುರ್ಸಾಚೆ ಪರ್ಬೆ ದಿಸಾ ಖುರಿಸ್ ಮೊಡ್ಲೊ
ಸಪ್ಟೆಂಬ್ರಾಚೆ ಚೊವ್ದಾ ತಾರ್ಕೆಚೊ ದೀಸ್ ಮಂಗ್ಳುರ್‍ಚೆ ಚರಿತ್ರೆಂತ್ `ಕಾಳೊ ಆಯ್ತಾರ್' ಕಸೊ ಉರ್‍ತಲೊ ಮ್ಹಣೊನ್ ಹಾಂವ್ ಮ್ಹಣ್ತಾಂ ಜಾಲ್ಯಾರ್ ತಾಕಾ ಕಾರಣಾಂ ಹಿ ಕವಿತಾ ದಿತಾ. ತ್ಯಾ ದಿಸಾ ಕ್ರಿಸ್ತಾಂವಾಂಕ್ ಮೊಗಾಚ್ಯಾ ಖುರ್ಸಾಚಿ ಪರಬ್. ಆನಿ ತ್ಯಾಚ್ ದಿಸಾ ಖುರ್ಸಾರ್ ಉಮ್ಕಳಾಯಿಲ್ಲೆ ನಿರ್ಜೀವ್ ಕುಡಿಚೆ ಹಾತ್ ಪಾಯ್ ಮೊಡ್‌ಲ್ಲೆಂ ಘಡಿತ್ ಮಂಗ್ಳುರಾಂತ್ ಘಡ್ಲೆಂ ಮ್ಹಣ್ತಾನಾ ಹ್ಯಾ ಆಯ್ತಾರಾಕ್ ಕಾಳೊ ವೊಲಾಯ್ನಾಸ್ತಾಂ? ಪಯ್ಸ್ ಆಸೊನ್ ಹಿಂ ಘಡಿತಾಂ ಟಿವಿ ಪಡ್ಡ್ಯಾರ್ ಪಳೆಯಿಲ್ಲ್ಯಾ ಆನಿ ಇಂಟರ್ನೆಟ್ ಮಾಧ್ಯಮಾದ್ವಾರಿಂ ವಾಚ್‌ಲ್ಲ್ಯಾ ಆಂಬ್ರೊಜ್ ಡಿ'ಸೋಜಾಚಿ ಪ್ರತಿಕ್ರಿಯಾ ಹಾಂಗಾಸರ್ ಆಸಾ.
ತುಮ್ಚೆ ಮಧ್ಲ್ಯಾ ಜಾಯ್ತ್ಯಾ ಕವಿಂನಿ ಹಿಂ ಘಡಿತಾಂ ಖುದ್ದ್ ದೊಳ್ಯಾಂನಿ ಪಳೆಲ್ಯಾಂತ್ ಯಾ ಭೊಗ್ಲ್ಯಾಂತ್ ಆಸ್ಯೆತ್. ತುಮ್ಚಿಂ ಭೊಗ್ಣಾಂ - ಜಾವ್ಯೆತ್ ಉಚಾಂಬಳಿ, ಜಾವ್ಯೆತ್ ಸೊಸ್ಣಿಕ್ - ತಿಂ ಉತ್ರಾಂ ದ್ವಾರಿಂ ವ್ಹಾಳೊಂದಿತ್ ಹಾಂಗಾಸರ್. ಕಿತ್ಯಾಕ್ ಮೊನೆ ರಾವ್ಲ್ಯಾತ್ ತುಮಿ?
ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯಿಲ್ಲ್ಯಾ ಮ್ಹಾಲ್ಘಡೊ ಲೇಖಕ್ ಆಂಬ್ರೊಜ್ ಡಿ'ಸೋಜಾಕ್ ಆಮಿ ಯೆವ್ಕಾರ್ ಮಾಗ್ತಾನಾ ಫುಡಾರಾಂತ್‌ಯ್ ತಾಚ್ಯೊ ಕವಿತಾ ಹಾಂಗಾಸರ್ ತೊ ಆಮ್ಕಾಂ ದಿತಲೊ ಮ್ಹಣೊನ್ ಬಾಳ್ಗಿತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಪ್ತೆಂಬ್ರಾಚಿ ಚೊವ್ದಾ ತಾರಿಕ್
ಸಪ್ತೆಂಬ್ರಾಚಿ ಚೊವ್ದಾ ತಾರಿಕ್ ವರ್ಸಾನ್ ವರ್ಸಾ
ಸಂಸಾರ್‌ಭರ್ ತಿ ಸಮರಂಭ್ತಾ ಕ್ರಿಸ್ತೀ ಪರ್ಜಾ
ರಾಯಾಳ್ ತಾಂಬ್ಡ್ಯಾ ನ್ಹೆಸ್ಣಾನ್ ನೆಟೊನ್
ಯಾದ್ನಿಕ್ ಮಿಸಾ ಬಲಿ ಭೆಟವ್ನ್
ಲೊಕಾಸಂಗಿಂ ಗಾಯಾನ್ ಕರ್‍ತಾ `ನಮಾನ್ ಖುರ್ಸಾ'
ವ್ಹರ್ತೊ ಹೊ ದೀಸ್ ಖುರ್ಸಾ ಜಯ್ತಾ ಪರ್ಬೆಚೊ ಖಾಸ್
ಭಕ್ತಾಂಕ್ ಖೆರಿತ್ ಉರ್ಬೆಚೊ, ವ್ಹಡ್ ಕುರ್ಪೆ-ಆವ್ಕಾಸ್
ಆಂವ್ದುಂ ದೀಸ್ ಜಾಂವ್ಕ್ ಪಾವ್ಲೊ ಆಯ್ತಾರ್
ತಿತ್ಲ್ಯಾನ್ ಘೆವ್ನ್ ಏಕ್ ದಳ್ದಿರ್ ಆವ್ತಾರ್
ಥಂಯ್ ಮಾಯ್ಗಾಂವಾಂತ್ ಸೈತಾನ್ ನಾಚ್ಲೊ ಚರ್ಬೆಚೊ ನಾಚ್!
ಪಂಗಡ್ ಘುಸ್ಲೆ ಮಾಗ್ಣ್ಯಾಘರಾಂತ್, ದೇವ್‌ಮಂದಿರಾಂತ್
ಭಶ್ಟುನ್ ದೆಸ್ವಾಟ್ ಕರ್‍ಚ್ಯಾಕ್, ಕಾಯಿಂಚ್ ನಾಸ್ತಾಂ ಭಿರಾಂತ್
ಅಕ್ಮಾನ್ ಕರುನ್ ಪವಿತ್ರ್ ವಸ್ತುಂಕ್
ಮಾರುನ್, ಮೊಡುನ್, ಲಾಗ್ಲೆ ಮಸ್ತುಂಕ್
ದೀಸ್-ಉಜ್ವಾಡಾಕ್, ಸೆಜ್ರಾ ತಶೆಂಚ್ ಮಂಗ್ಳುರ್ ಶಹರಾಂತ್
ಪಾವ್ಲೆ ಕಶೆ ಖುರ್ಸಾಯಿಲ್ಲ್ಯಾಚೆ ಹಾತ್-ಪಾಯ್ ಮೊಡುಂಕ್?
ವಿದ್ರೂಪ್ ಕೆಲ್ಲೆಂ `ಮೊನ್ಸ್‌ತ್ರೆಲ್' ಪಳೆವ್ನ್ - ಯೆತಾ ರಡೊಂಕ್!
ತಾಳ್ನಿ ಯೆತಾ ಶಿರಾಪ್ ಮಾಗೊಂಕ್
ಫಾರಿಕ್ಪಣಾಚಿ ವಾಟ್ ವೆಂಗೊಂಕ್ -
ಆವ್ಚಿತ್ ಆಯ್ಕತ್ ಆವಾಜ್ ಅಸ್ಲೆಂ ಚಿಂತಪ್ ಸೊಡುಂಕ್
`ಬಾಪಾ ತಾಂಕಾಂ ಭೊಗೊಸ್ ಕಿತ್ಯಾಕ್ ನೆಣಾ ಆಸುನ್
ಕೆಲಾಂ ತಾಂಣಿ; ಮೆಲಾಂ ಹಾಂವ್ ಪೊಯ್ ತಾಂಚೇಯ್ ಪಾಸುನ್'
`ಮಾಗಾ' ಮ್ಹಣ್ತಾ ಆಮ್ಕಾಂ ಸೊಮಿ
`ದಗ್ದಿತೆಲ್ಯಾಂ ಪಾಸುನ್ ತುಮಿ' -
ಆಪ್ಲೆಚ್ ಜಿಣಿಯೆನ್ ದಾಕಯ್ಲಾಂ ಹೆಂ ನ್ಹಯ್‌ಗಿ ಜೆಜುನ್?
ಕಶ್ಟಾಂ ದಗ್ದಾಂತ್ ಆಧಾರ್ ದಿಂವ್ಚ್ಯಾಕ್ ಮುಕಾರ್ ಸರ್‍ಯಾಂ
ದುಸ್ಮಾನಾಂಚೋಯ್ ಮಾಗ್ಣ್ಯಾಂತ್ ಸದಾಂ ಉಡಾಸ್ ಕರ್‍ಯಾಂ
ನಿಶ್ಟುರ್ ಸಾವ್ಲ್ ತೊ ಸಾಂ. ಪಾವ್ಲ್ ಜಾಂವ್ಕ್ ನಾ?
ಕಾಳ್ಜಾಂ ಬದ್ಲುಂಕ್ ಸೊಮಿಯಾಕ್ ತಾಂಕ್ ನಾ?
ಮಾನಾನ್ ಖುರಿಸ್, ಸಾಕ್ರಾಮೆಂತ್ ವಯ್ರ್ ಉಕಲ್ನ್ ಧರ್‍ಯಾಂ
-ಆಂಬ್ರೋಜ್ ಡಿ'ಸೋಜಾ, ಕಿನ್ನಿಗೋಳಿ