ಸಂಪಾದಕೀಯ್:
ಜೀವ್ ಆಸೊನ್ ಜೊಡುಂಕ್ ಪಾವನಾತ್‌ಲ್ಲ್ಯಾ ಮನ್ಶಾಂ ಖಾತೀರ್
ತೆ ವೆಗಿಂ ಮೆಲ್ಯಾತ್ ಜಾಲ್ಯಾರ್ ಕಿತೆಂ ಜಾಲೆಂ? ಜೊಡ್ಚೆಂ ಪೂರಾ ತಾಂಣಿ ಜೊಡುನ್ ಘೆತ್ಲಾಂ. ಆಮಿ ಹಾಂಗಾಸರ್ ವಾಂಚೊನ್ ಕಿತೆಂ ಫಾಯ್ದೊ? ಆಜೂನ್ ಆಮಿ ಭಿಜುಡ್ ಜಿಯೆತಾಂವ್, ಚೊರಾಂಕ್ ಪೊಸ್ತಾಂವ್, ಪುಂಜಾಯಿಲ್ಲೆಂ ದವರ್‍ಚೆಂ ಖಂಯ್ ಮ್ಹಣೊನ್ ಚಿಂತಾಂವ್ - ಆನಿ ಅಶೆಂ ಕರುನ್ ಜಿಯೆವ್ನ್ ಜಿಯೆವ್ನ್ ಮರೊನ್ ಆಸಾಂವ್. ಯೂಸುಫ್ ಶೇಖಾಚಿ ಮರ್‍ಣಾಚೆರ್ ಜೈತ್ ಜೊಡುನ್ ದಿಂವ್ಚಿ ಕವಿತಾ ಹಿ.
ಯೂಸುಫ್ ಅಬ್ದುಲ್ಲಾ ಶೇಖ್ ಆಕಾಶ್‌ವಾಣಿಚೆರ್, ದೂರದರ್ಶನಾಚೆರ್ ನೋಕ್ರೆರ್ ಆಸ್ತಾನಾಂಚ್ ಕವಿ ಮ್ಹಣೊನ್ ನಾಂವ್ ಕೆಲ್ಲೊ ಮನೀಸ್. ಗೊಂಯಾಂತ್ ತಾಚಿ ವಸ್ತಿ. ಹಾಲಿಂಚ್ಯಾ ದಿಸಾಂನಿ ಪತ್ರಿಕೋದ್ಯಮಾಂತ್ ತೊ ಮಿಸ್ಳಲಾ. ತೀನ್ ನೆಮಾಳಿಂ ತಾಚ್ಯಾ ಸಂಪಾದಕ್‌ಪಣಾಖಾಲ್ ಪರ್ಗಟ್ ಜಾವ್ನ್ ಆಸಾತ್. ತ್ಯಾ ಪಯ್ಕಿ ಇಂಗ್ಲೆಜಾಂತ್ ಏಕ್ ಈ-ಪತ್ರ್‌ಯ್ ತೊ ಚಲಯ್ತಾ.
`ರಂಗ್‌ಘಾಯ್' ಪುಸ್ತಕಾಂತ್ಲಿ ಹಿ ವಿಂಚವ್ಣ್ ತುಮ್ಕಾಂ ಆಮಿ ದಿಲ್ಯಾ. ಹೆ ಘಾಯ್ ಕುಡಿಚೆರ್ ಪಡ್‌ಲ್ಲೆ ನ್ಹಯ್, ಬದ್ಲಾ ಮನಾಚೆರ್ ಪಡಿಲ್ಲ್ಯಾ ಖಂತಿಚೆಂ ಘಾಯ್. ಆಮಿ ಜೀವ್ ಆಸೊನ್ ಕಾಂಯ್ ಕರುಂಕ್ ಸಕ್ಲೆನಾಂವ್ ಮ್ಹಣ್ಚಿ ಖಂತ್ ತಾಚಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೆಲ್ಲೆ ಮನೀಸ್
ಮೆಲ್ಲೆ ಮನೀಸ್ ಜಿಯೆಲೆ
ಆಮಿ ಫಕತ್ ಘೊರೆತಾತ್
ಮೆಲ್ಲೆ ಝುಜಾಂ ಝುಜೊನ್ ಗೆಲೆ
ಆಮಿ ಭಿಜುಡ್ ಭಿಯೆತಾತ್
ಮೆಲ್ಲೆ ಹಕ್ಕ್ ಜೊಡುನ್ ಗೆಲೆ
ಆಮಿ ಎಕಾಮೆಕಾಕ್ ಶಿಣ್ತಾತ್
ಮೆಲ್ಲೆ ಖಾವ್ನ್ ಪಿವ್ನ್ ಗೆಲೆ
ಆಮಿ ಚೊರಾಂಕ್ ಖಾಂವ್ಕ್ ದಿತಾತ್
ಮೆಲ್ಲೆ ಫಾತರ್ ಫೊಡುನ್ ಗೆಲೆ
ಆಮಿ ಫಕತ್ ಖರ್ಶೆತಾತ್
ಮೆಲ್ಲೆ ಭಾಂಗರ್ ನ್ಹೆಸುನ್ ಗೆಲೆ
ಆಮಿ ಬೆಂಕೆಂತ್ ಲೊಕರ್ ಸೊದ್ತಾತ್
ಮೆಲ್ಲೆ ಮನೀಸ್ ಜೊಡುನ್ ಗೆಲೆ
ಆಮಿ ಸಾಯ್ಬಾ ಲುಟತ್ ಗೆಲೆ
ಮೆಲ್ಲೆ ಎಕ್ದಾಂಚ್ ಮರೊನ್ ಗೆಲೆ
ಆಮಿ ಸಾಯ್ಬಾ ಸದಾಂಚ್ ಮರ್‍ತಾತ್
-ಯೂಸುಫ್ ಅ. ಶೇಖ್