ಸಂಪಾದಕೀಯ್:
ಧರ್ಮಾಚ್ಯಾ ಆಂಗ್ಣಾಂತ್ ಭರೊನ್ ಗೆಲ್ಲೆಂ `ಪೊಲ್ಯೂಶನ್'
ಹೆಂ ಪೊಲ್ಯೂಶನ್ ಭೊಂವಾರಾಚೆಂ ಮ್ಹಣೊನ್ ಚಿಂತುನ್ ಹಿ ಕವಿತಾ ವಾಚ್ತಲ್ಯಾಂಕ್ ಹಾಂಗಾ ವೆಗ್ಳಿಚ್ ಗಜಾಲ್ ವಾಚುಂಕ್ ಮೆಳ್ತಾ. ಹೆ ಕವಿತೆಂತ್ ಧರ್ಮಾಂತ್ಲೆಂ ಪೊಲ್ಯೂಶನ್ ಸಗ್ಳೆಂ ಉಗ್ತೆಂ ವಿಣ್ಗೆಂ ದಿಸ್ತಾ. ಅಯ್ಲೆವಾರ್ ಮಂಗ್ಳುರಾಂತ್ ಚಲ್ಲಲ್ಯಾ ಗಲಾಟ್ಯಾಚೆ ಮೆರೆರ್ ರಾವೊನ್ ಹಿ ಕವಿತಾ ವಾಚ್ಲ್ಯಾರ್ ಹೆ ಕವಿತೆಚೆಂ ಮೋಲ್ ಆನಿಕ್‌ಯ್ ಚಡ್ತಾ. ವಾಚುಂಕ್ ಮಾತ್ಶಿ ಆಡ್ಖಳ್ ಜಾಯ್ತ್, ಪುಣ್ ಹಾಂವ್ ಚಿಂತಿನಾ ಕವಿತೆಚೆ ಸೊಭಾಯೆ ಮುಕಾರ್ ಹ್ಯೊ ಆಡ್ಖಳಿ ಶಾಸ್ವಿತ್ ಉರ್‍ತಲ್ಯೊ ಮ್ಹಣೊನ್.
ಆನಂದ್ ವರ್ಟಿ ಜಲ್ಮಲ್ಲೊ ಹುಬ್ಳಿಂತ್. ಥೊಡ್ಯಾ ವರ್ಸಾಂ ಆದಿಂ ತಾಚಿ ಕೂಡ್ ಸರ್‍ತಾನಾ ತೊ ಮುಂಬಂಯ್ತ್ ವಸ್ತಿ ಕರುನ್ ಆಸ್‌ಲ್ಲೊ. ತಾಚ್ಯಾ `ಅಕ್ಷಯ್‌ದಿವೊ' ಪುಸ್ತಕಾಂತ್ಲಿ ಹಿ ವಿಂಚವ್ಣ್ ಹಾಂವೆಂ ಕೆಲ್ಯಾ. ಸಗ್ಳ್ಯಾ ಪುಸ್ತಕಾಂತ್ ಎಕಾವರ್ನಿ ಏಕ್ ಬರಿ, ಥರಾಂ ಥರಾಂಚ್ಯಾ ರೊಸಾಂತ್ ಭಿಜುನ್ ಆಯಿಲ್ಲಿ ಅರ್ಥಾಭರಿತ್, ಚಿತ್ರ್‌ಮಯ್ ಕವಿತಾ ಸೊಭ್ತಾ.
ಆನಂದ್ ವರ್ಟಿಚ್ಯಾ ಕವಿತೆಂತ್ಲಿಂ ಉತ್ರಾಂ ಕಾಳ್ಜಾಕ್ ಜಶೆಂ ರೊಂಬ್ತಾತ್ ತಶೆಂಚ್ ವಿಚಾರಾಂಕ್‌ಯ್ ಧೊಸ್ತಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪೊಲ್ಯೂಶನ್
ನಿತಳ್ ನಿಳ್ಯಾ ಮಳ್ಬಾ ಜಾಗಿ
ಧುರ್ಕಟ್ಲೆಲಿಂ ಜಳ್‌ಮಳಾಂ
ತಾಜ್ಯಾ ಹಗುರ್ ವಾರ್‍ಯಾಭಿತರ್
ಕಾಜಳ್ ಕಾಳೆಂ ರಿಗುನ್ ಯೆತಾಂ
ಪಿವ್ಚ್ಯಾ ಥಂಡ್ ಉದ್ಕಾ ವಾಂಗ್ಡಾ
ಕಿತೆಂ ಯೆತಾ ಕೊಣ್ ಜಾಣಾಂ
ಕಸಲೆಂ ಜಂತು ವಚತ್ ಪೊಟಾ
ಸಾಂಗು ನಜೊ ಖಂಯ್ಚ್ಯಾಯ್ ಖಿಣಾ
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ಉಕ್ತೆಂ ಆಮ್ಚೆಂ ಸದಾಂಚ್ ಕಾನ್
ಆರಡ್ -ಓರಡ್ ಆಸ್ತಾತ್ ಆಯ್ಕತ್
ಶಾಸ್ತ್ರ್ ನವೆಂ, ನವೆಂ ಗಿನ್ಯಾನ್
ಬುವಾ ಭೊಂವ್ತಣ್ ನಾಚ್ತಾತ್ ಭಗತ್
ಹರೆ ರಾಮಾ ಹರೆ ಕೃಷ್ಣಾ
ಆಪ್ಲ್ಯಾ ಭಾಂಯ್ಲೆ ಕಾಂಯ್ ದಿಸನಾ
ಭಗ್ವಿ ವಸ್ತ್ರಾಂ, ಗಳ್ಯಾ ಮಾಳೊ
ಸಾಂಗಿಲ್ಲೆ ತಾಂಣಿ ಸೊಸುಂಕ್ ಜಾಯ್ನಾ
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ಕೊಣೀ ಸಾಂಗತ್ ದುಖಾಂ ತುಮ್ಚಿ
ಫುಂಕ್ ಮಾರುನ್ ನಾ ಕರೀನ್
ತುಮ್ಚೊ ಕಾಯಾಪಲಟ್ ಕರುನ್
ಸರ್ಗಾವೈಲೆ ರಾಜ್ಯ್ ದೀನ್
ತುಮ್ಚ್ಯಾ ಸೆವೆಖಾತೀರ್ ಸಗ್ಳೆ
ಹಾತ್ ಜೊಡುನ್ ರಾವ್ಲ್ಯಾತ್ ಆಮಿ
ಭಾಸ್ ಕರುನ್ ದಿಸ್ಲೆಲ್ಯಾಂತ್
ಪೋಲ್ ಚಡ್ ದಾಣೊ ಕಮೀ
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ಅರ್ದ್‌ನಾರಿನಟೇಶ್ವರಾಂಚಿ
ಅಸಲ್ ಸೋಂಗಾ, ನಕ್ಲಿ ಭೆಸ್
ಭಾಯ್ಲ್ಯಾ ಲೊಕಾಂಚೊ ಅಣ್ಕಾರ್ ಕರೀತ್
ತಕ್ಲೆಭಿತರ್ ನಸ್ತೊ ಹಾವೆಸ್
ಹಾಂಚೊ ಡಾಮ್‌ಡೌಲ್ ಮೊಟೊ
ಜಿಬೆವೈಲೆ ಉತರ್ ಖೊಟೆ
ಖಾಣೆಂ ಪಿಣೆಂ ಉಷ್ಟೆಂ ಸಗ್ಳೆಂ
ಆಂಗಾರ್ ಉಡತ್ ಶಿತಾ ಗೊಟೊ
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ನವ್ಯಾಫಾಟಿಂ ಧಾಂವ್ಚೆ ಪಿಶೆಂ
ಧರ್ಮ್ ಲೆಗೀತ್ ಜಾತಾ ಚರಸ್
ಹೆರ್ ದೇಸ್ ಮಾನ್ತಾತ್ ಮೊಟೆ
ಆಪ್ಲ್ಯಾ ಆವಯ್‌ದೇಸಾಪರಸ್
ಭರಸ್ ವಿಚಾರಾಂಚೆ ತಣ್
ಕಿತ್ಲೆ `ಇಸಮ್' ಕಿತ್ಲಿ ಮತಾಂ
ತೆಚ್ ತೆಚ್ ಆಯ್ಕುನ್ ಶಿಕುನ್
ಬುದ್ಧಿಕ್‌ಯ್ ಗಾಂಠ್ ಯೆತಾ
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ಖರಿ-ಖೊಟಿ ನಾತಿ ಹಾಂಗಾ
ಖರೆ-ಖೊಟೆ ಮುಖಾರ್ ಭಾವ್
`ಥೆಂಕ್ಯೂ' ತೊಂಡಾತ್ ಘೊಳಯ್ಲ್ಯಾರ್
ಚೋರ್ ಲೆಗೀತ್ ದಿಸ್ತಾ ಸಾವ್
ಹಾಂಸತ್ ಹಾಂಸತ್ ಉಲೈತಾನಾ
ಹಾತಾತ್ ಯೇತ್ ದುಸ್ರೊ ಹಾತ್
ಫಾಟ್ ಜರಾ ಫಿರ್‍ಚೆ ಭಿತರ್
ಕುಲ್ಯಾಚೆರ್ ಬಸತ್ ಲಾತ್
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
ಭರಸ್ ದಾಣ್ಯಾತ್, ಭರಸ್ ವೀಖ್
ಖಾಯಾತ್ ವೆಚುನ್, ವೆಚುನ್ ಪಿಯಾತ್
ಚೊಕುನ್ ಚೊಕುನ್ ಗಾಣಿಂ ಗಾಯಾತ್
ಉಘ್ಡುನ್ ದೊಳೆ ಖರೆಂ ಚೊಯಾತ್
ಜಲ್ಮ್ ಜರಿ ಸೊಬಿತ್ ಖರೊ
ಪೊಲ್ಯುಶನಾನ್ ಜಳ್ತಾ ಜೀವ್
ತನಾಮನಾಂರ್ ಕಾಜಳ್ ಸಾಟುನ್
ಪೊಲ್ಯುಶನಾನ್ ಬೆಗಿ ಮರಣ್
ಮ್ಹಣುನ್ ಮ್ಹಂಟಾ ಆಯ್ಕಯಾತ್
ಚಾಳುನ್ ಘೆಯಾತ್, ಗಾಳುನ್ ಘೆಯಾತ್!
-ಆನಂದ್ ವರ್ಟಿ