ಕವಿತಾ:
ಸುಣ್ಯಾಕ್ ಏಕ್ ಸೊನೆಟ್
ಆಮ್ಚ್ಯಾ ಪೆಟ್ಯಾಕ್ ಸಾಯ್ಬಾ ಚಡ್ಲಾರೆ ಮಾತ್ಯಾರ್
ಆರಾಬಾಯೊ ದಿತಾ ದಿಸಾಕ್, ರಾತಿಕ್ ಆನಿ ಫಾಂತ್ಯಾರ್
ಕನ್ನೊ ಮ್ಹಯ್ನೊ ಆಯ್ಲೊ ಸಾಯ್ಬಾ, ಗಲಾಟೊರೆ ಹಾಚೊ
ಗುಡ್ಡಾವ್ನ್ ಸತ್ತ್ಯಾನಾಸ್, ಆಂಗ್ಣಾಕ್ ಘಾಲ್ಲೊ ಕಜೊ
ಬಾಬಾ ಎಕ್ಲ್ಲ್ಯಾಕ್ ಮಾತ್ರ್ ಚಿಕ್ಕೆಶೆ ಭಿಂಯೆತಾ
ಬಾಬಾ ನಾತ್ಲ್ಯಾರ್ ವಚೊನ್ ವೊನಿಯೆಕಚ್ ಚಾಬ್ತಾ
ಗಾಂವಭರ್ ಕೊಲ್ಗ್ಯಾಂಚಿ ಪಾಟ್ ಧರುನ್ ಧಾಂವ್ತಾ
ದುಸ್ರಿಂ ಸುಣಿಂ ಆಯ್ಲ್ಯಾರ್ ಗುರ್ರ್ ಕರುನ್ ರಾವ್ತಾ
ಘರ್ ರಾಕ್ಚೆಂ ಕಾಮ್ ಸೊಡುನ್ ಗೆಲಾ ಮ್ಹಾಕಾ
ಕೊಣೆರೆ ಸಾಯ್ಬಾ ಸಮಾ ಕರ್‍ಚೆಂ ಹಾಕಾ
ಹಾಣೆ ಕರ್‍ಚ್ಯಾ ಕರ್ತುಬಾಂನಿ ಮ್ಹಾಕಾಚ್ ದಿಸ್ತಾ ಲಜ್
ಕೆನ್ನಾ ಯೆತಾಗಿ ದಿವಾಳಿ, ಹಿರ್ವಾತ್ ಹಾಚಿ ಖೊರೊಜ್
ಚಡ್ ಭೆಷ್ಟಾಂವ್ಕ್ ಕಿತ್ಯಾಕಗಿ ದಿಸ್ತಾ ಭ್ಯೆಂ ಭ್ಯೆಂ
ಮ್ಹಾಕಾಚ್ ಪಾಟಿಂ ಘೊಂಕಿತ್, ಮ್ಹಜ್ಯಾಬರಿಚ್ ಹೆಂ
-ಆಂಟನಿ ಬಾರ್ಕೂರ್