ಕವಿತಾ:
ಮೊಗಾಚೆಂ ಮಂದಿರ್
ವ್ಹಯ್! ಆಜ್ ಆಮಿ
ಹೆಂ ಘರ್ ಸೊಡೀತ್ ಆಸಾಂವ್
ಹಾಂತ್ಲಿಂ ಮೆಜಾಂ, ಕದೆಲಾಂ
ಟಿಪೊಯ್-ಖಟ್ಲೆಂ
ತೊಂದೊರ್-ಪಿರಿ
ಲಾಂಪ್ಯಾಂವ್-ಚಿಮ್ಣಿ
ಫೊಟೊ-ಪಾಯ್ನೆಲಾಂ
ಪೇಟ್-ಭಿಚಾಣೆಂ
ಲೊರಿಯೆರ್ ಭರ್‍ನ್
ಫಕತ್ ಘರ್ ಮಾತ್ರ್ ಸೊಡೀತ್ ಆಸಾಂವ್
ಆನಿ ಕೊಣ್‍ಗಿ ಹಾಂಗಾಸರ್ ಪರ್‍ತ್ಯಾನ್ ಯೆತಲಿಂ
ಪರ್‍ಕಿ ಆಪ್ಲೆಂ ಬಿಡಾರ್ ಕರ್‍ತಲಿಂ
ಪುಣ್ ಆಮಿ
ಹ್ಯಾ ಕುಡಾಂನಿ ಸಾಂಗಾತಾ ಮೆಳ್‍ಲ್ಲೆಂ
ರಾವ್‍ಲ್ಲೆಂ - ಬಸ್‍ಲ್ಲೆಂ
ಹಾಸ್‍ಲ್ಲೆಂ - ರಡ್‍ಲ್ಲೆಂ
ಜೆವ್‍ಲ್ಲೆಂ - ನಿದ್‍ಲ್ಲೆಂ
ಸರ್‍ವ್ ದಾಕಲ್ ಜಾಲಾಂ
ಘರ್‍ಚಿಂ ಕುಡಾಂ
ಮನಾಚಿಂ ದಾರಾಂ ಜಾಲ್ಯಾಂತ್
ತಿಂ ಘಾಲ್ಲಿಂ ಉಡ್ಕಾಣಾಂ
ತೆ ಖೆಲ್ಲೆ ಮಾರ್
ತಿಂ ಗಳಯಿಲ್ಲಿಂ ದುಕಾಂ
ತೊ ವ್ಹಡಿಲಾಂಚೊ ಸೈಲಾಪ್
ತಿ ಮೊಗಾಚಿ ಪೊಶೆವ್ಣಿ
ಪಡ್ದ್ಯಾ ಪಾಟ್ಲೊ ಉಡಾಸ್
ಫಾಸ್ಳೊನ್ ವಚನಾತ್‌ಲ್ಲ್ಯಾಪರಿಂ
ಆಸ್ರೊ ದೀವ್ನ್ ರಾಕ್‍ಲ್ಲೊ
ಹೊ ಸೊಭಿತ್ ಜಾಗೊ
ಫಕತ್ ಸೊಡ್‍ಲ್ಲೆಂ ಘರ್ ಮ್ಹಣನಾಕಾತ್
ಪವಿತ್ರ್ ಜಾಗೊ ಹೊ
ಮೊಗಾಚೆಂ ಮಂದಿರ್ ಹೆಂ.
-ಡಿಂಪಲ್ ಫೆರ್ನಾಂಡಿಸ್, ವೀರನಗರ್