ಕವಿತಾ
:
ತುಜೆ ಹಾತ್
ಹಾತ್ಯಾಭಶೆನ್ ಹಾತ್ ತುಜೆ ಗೊರೆ ಗೊರೆ ಪಾನ್ ಗೊ
ಘರ್ ದಾರ್ ಆಟ್‍ಯ್ ಪಾರ್ ಭಲ್ಲೆ ಪರ್ಮಳಾನ್ ಗೊ
ಬಚ್ಕಾಂ ತುಜಿಂ ಸಾಳ್ಕಾಂವರಿ
ನಾಖ್ಟಾಂ ತುಜಿಂ ಮಾಣ್ಕಾಂವರಿ
ಪಳೊವ್ನ್ ಜಲ್ಮ್ ಜುಗಾಚಿ ನ್ಹಿಂವ್ತಾ ಭುಕ್ ತಾನ್ ಗೊ
ವ್ಹಂಕಲ್ ಕಶೆಂ ಸೊಭ್ತಾ ಘರ್
ಚಾನ್ನೆಂ ಜಮ್ನಿ ವಣ್ಟಿಂಚೆರ್
ಭಾಯ್ರ್ ಭಿತರ್ ಖೆಳ್ಟಾ ಘೊಳ್ಟಾ ತೀಚ್ ನಿತಳ್ಸಾಣ್ ಗೊ
ತಾಂಕಾಂ ಲಾಗುನ್ ಹಾಂಸ್ತಾ ಪೊರ್ಸುಂ
ಗೊರ‍್ವಾಂ ಲಾಗ್ತಿ ಹರ್ಸುಂ ವರ್ಸುಂ
ಉಧಳ್ಟಾತ್ ಪಾಡ್ಕಾಂ ಝಾಡ್ಕಾಂ ಫುಲೊವ್ನ್ ಕಾನ್ ಪಾನ್ ಗೊ
ತುಜ್ಯಾ ಹಾತ್ಚ್ಯಾ ಪರಖನ್ನಾಂನಿ
ವಾಸ್ರಿ ಭಲ್ಲಿ ಆಪ್ತೇಷ್ಟಾಂನಿ
ದೇವ್ ಧಾಂವ್ನ್ ಆಯ್ಲೆ ಆಂಗ್ಣಿ ಕೀರ್ ಮೋರ್ ಜಾವ್ನ್ ಗೊ
ತುಜ್ಯಾ ಹಾತ್ಚ್ಯಾ ಉದ್ಕಾನಯ್
ಜೊಡ್ಟಾ ಜಯ್, ಝಡ್ಟಾ ಭಂಯ್
ವಾಟ್ಸುರ‍್ಯಾಂಚಿ ಲಾಗ್ತಾ ಲಯ್ ಘೆಂವ್ಕ್ ಹೇಂಯ್ ದಾನ್ ಗೊ
ಪುಣ್ಯವಂತ್ ಅಸ್ಲೆ ಹಾತ್
ಕಾಳ್ಜಾರ್ ಘೆಂವ್ಕ್ ಸವನ್ ರಾತ್
ಸಾತ್ ಜಲ್ಮ್ ಝರೈನ್ ಹಾಂವ್ ಕೂಡ್ ಆನಿ ಪ್ರಾಣ್ ಗೊ
-ಬಾಕಿಬಾಬ್ ಬೋರ್ಕರ್
(ಹಾತೊ=ನ್ಹಂಯ್ಚೆ ತಡಿರ್ ಜಾಂವ್ಚೆಂ ಹಾತಾ ತೆದೆಂ ಭಾಂಗ್ರಾಳ್ಯಾ ವರ್ಣಾಚೆಂ ಝಾಡ್, ಜಾಚೆರ್ ಚಡುಣೆ ಗಣೇಶ ಚತುರ್ಥಿ ಕಾಳಾರ್ ಸುವಾಧಾಚಿ ಫುಲಾಂ ಜಾತಾತ್; ಪೊರ್ಸುಂ=ಹಿತಲ್)