ಸಂಪಾದಕೀಯ್:
‘ಕೀರ್ ತುಂ ಮ್ಹಜೊ’ ಕವಿ ಅಂತರ‍್ಲೊ ಮ್ಹಳ್ಳೆಂ ಪಾತ್ಯೆಂವ್ಕ್ ಜಾಯ್ನಾ
ಸುಮಾರ್ ಪಂದ್ರಾ ವರ್ಸಾಂ ಆದಿಂ ‘ಉಮಾಳೊ’ ಪತ್ರಾವಯ್ಲ್ಯಾ ಮ್ಹಜ್ಯಾ ‘ಶಬ್ದುಲಿಂ’ ಅಂಕಣಾಂತ್ ಮ್ಹಜ್ಯಾ ಪಸಂದೆಚೆ ಪಾಂಚ್ ಕೊಂಕಣಿ ಕವಿ ಕೊಣ್ ಮ್ಹಣ್ ಉತ್ರಾಯ್ತಾನಾ ‘ಎಡ್ವರ್ಡ್ ನೊರೊನ್ಹಾ’ ಎಕ್ಲೊ ಮ್ಹಣೊನ್ ಹಾಂವ್ ಜಾಹೀರ್ ಕೆಲ್ಲೆಂ. ತಾಚ್ಯೊ ಚಡ್‍ಶ್ಯೊ ಕವಿತಾ ಹಾಂವೆಂ ವಾಚುಂಕ್ ನಾಂತ್. ಪುಣ್ ವಾಚ್ಲಲ್ಯಾ ಥೊಡ್ಯಾಚ್ ತಾಚ್ಯಾ ಕವಿತಾಂನಿ ಮ್ಹಜ್ಯಾ ಮನಾಂತ್ ಶಾಸ್ವಿತ್ ಬಿಡಾರ್ ಕೆಲಾಂ. ತಾಚ್ಯಾ ಕವಿತಾಂನಿ ಠರಾವಣೆಂಚಿ ತಾಂಕ್, ಉತ್ರಾಂಚೆಂ ಭಂಡಾರ್ ಭರೊನ್ ವೊಮ್ತತಾ. ಮಾಗೀರ್ ತಾಚ್ಯಾ ‘ಪಂಡಿತ್‍ಪಣಾಚಿ’ ಮ್ಹೊರ್ ಕವಿತಾಂನಿ ಧರ್ ಧರ್ ದಿಸ್ತಾ.
ಡೊ. ಎಡ್ವರ್ಡ್ ನೊರೊನ್ಹಾ ಹ್ಯಾಚ್ ಒಕ್ಟೋಬ್ರಾಂತ್ ಹೊ ಸಂಸಾರ್ ಸಾಂಡುನ್ ಗೆಲಾ ಹೆಂ ಚಿಂತುಂಕ್ ಜಾಯ್ನಾ. ‘ಉಚಾರ್ ವಿಚಾರ್’ ವಿಭಾಗಾಂತ್ ಎಚ್ಚೆಮ್ಮಾನ್ ಸಾಂಗಲ್ಲ್ಯಾಬರಿ ತಾಚ್ಯಾ ಪಂಡಿತ್‍ಪಣಾಚೆ ಜಾಣ್ವಾಯೆಚಿಂ ಥೊಡಿಂ ಕಿರ್ಣಾಂ ಆಮ್ಚೆರ್ ಆಮಿ ಜೊಡುನ್ ಘೆವ್ಯೆತಿಂ. ಪುಣ್ ಆಮಿ ನಿರ್ಭಾಗಿ ಥಾರ‍್ಲ್ಯಾಂವ್.
ಕಾಂಯ್ ಚಾರ್ ವರ್ಸಾಂ ಆದಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡಮಿಚ್ಯಾ ‘ಶೆಕ್ಡ್ಯಾಚ್ಯೊ ಕೊಂಕಣಿ ಕವಿತಾ’ ಪುಸ್ತಕಾಚ್ಯಾ ವಾವ್ರಾವೆಳಾರ್ ತಾಚೆಲಾಗಿಂ ಹಾಂವ್ ಉಲಯಿಲ್ಲೊಂ. ಮ್ಹಜ್ಯಾ ಕವಿತಾಂಚೆಂ ತಾಣೆಂ ಗುಣ್‍ಗಾನ್ ಕೆಲ್ಲೆಂ ಸಯ್ತ್. ಮ್ಹಜಿಂ ಸರ್ವಯ್ ಪುಸ್ತಕಾಂ ವಾಚುಂಕ್ ಜಾಯ್ ಮ್ಹಣ್ ಸಾಂಗ್ಲಲ್ಯಾನ್, ತಿಂ ಹಾಂವೆಂ ಧಾಡುನ್ ದಿಲ್ಲಿಂ.
ತಾಚೊ ಬಾಪಯ್ ಫೆಲಿಕ್ಸ್ ಪಾವ್ಲ್ ನೊರೆಞ್ ಸಯ್ತ್ ಕೊಂಕಣಿಚೊ ತಾಂಕಿವಂತ್ ಕವಿ. ತಾಕಾಯ್ ತಾಚ್ಯಾ ಮರ‍್ಣಾಚ್ಯಾ ಥೊಡ್ಯಾಚ್ ತೆಂಪಾ ಆದಿಂ ಮೆಳೊನ್ ಉಲಯಿಲ್ಲೊ ಉಗ್ಡಾಸ್ ಮ್ಹಾಕಾ ಆಸಾ. ಮಾಗೀರ್ ಎಡ್ವರ್ಡಾಚ್ಯಾ ಭಾಂವ್ಡಾಂಚಿ ಥೊಡ್ಯಾಂಚಿ ತರೀ ಮ್ಹಾಕಾ ವೊಳಕ್ ಆಸಾ. ತಾಚೆ ಆವಯ್ ಲಾಗಿಂ ತಿ ಮರ‍್ಚ್ಯಾ ಹಫ್ತ್ಯಾ ಆದಿಂ ದುಬಾಯ್ ಥಾವ್ನ್ ಹಾಂವ್ ಉಲಯಿಲ್ಲೊಂ. ಹ್ಯೊ ಸಗ್ಳ್ಯೊ ವೊಳ್ಕಿ ಕವಿತೆಚ್ಯಾ ಮ್ಹಜೆ ವೊಡಿವರ್ವಿಂ ಘಡಲ್ಲ್ಯೊ ಸೊಡ್ಲ್ಯಾರ್ ಹಾಕಾ ದುಸ್ರಿಂ ಕಾರಣಾಂ ನಾಂತ್.
ಡೊ. ಎಡ್ವರ್ಡಾಚಿಂ ಕವಿತಾಂ ಆಮಿ ಕವಿತಾಸಕ್ತಾಂನಿ ಸಮ್ಜೊನ್, ತಾಂಚೆ ಕವಿತೆಚಿ ತಾಕ್ಡಿ ಕಿತ್ಲಿ ತಾಂಕಿವಂತ್ ಮ್ಹಳ್ಳೆಂ ಪಾರ್ಕಿಜಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಯೆತಲೊಂ-ಗಿ ಫಾಲ್ಯಾ?
ಸದಾಂನೀತ್ ತುಮ್ಗೆಲ್ಯಾ
ವೊಡ್ತಾಂತ್ ಹಾಂವ್ ಚಮ್ಕಾಲೊಂ;
ಫುಲಾಂಚ್ಯಾ ಪಾಕ್ಳ್ಯಾಂಚ್ಯಾ
ತೆಲ್ತ್ಯಾ ತೆಂತೆಸಾಂವಾಂಕ್
ಮೊಂವಾಚಾ ಆಸ್ವಾದಾಕ್,
ಸುಗಂಧಾ ಆಮಾಲಾಕ್-
ಧಾಂಪಲ್ಲ್ಯಾ ದೊಳ್ಯಾನಿಂ-
ಸಮರ್ಪಿತ್ ಹಾಂವ್ ಜಾಲೊಂ.
ಪರ್ಮಳಿಕ್ ಸೊಭಾಯೆನ್
ನಾಜೂಕಾಯೆ ಹಾತಿಂ,
ಸ್ವಪ್ಣೆಲಿ ಸಂಸಾರಾಂತ್
ಪಾಯ್ ವೊಡಿತ್ತ್ ಚಲ್ತೆಲ್ಯಾಕ್
ಫಟ್ಕಿರ‍್ಯಾ ರಾವ್ಳೆರಾಂತ್
ಹಾತಿಂ ಧರ್ನ್ ಚಲಯಿತ್ತ್
ಭೊಂವ್ಡಾಯ್ಲೆಂ ಭೊಂವ್ತೊಣಿಂ.
ಭರ್ಮಿದೆ ಭೊರಾರಿ
ಥಾಪಾಡ್ ಮಾರ‍್ನ್ ಉಟಯ್ತಾಂ,
ನಾಖುಶೆ ವಿಜ್ಮಿತಾಂತ್
ಫಾಸ್ಳಾಲ್ಲ್ಯಾ ಹ್ಯಾ ಸೌಧಾಕ್
ಯೆತೊಲೊಂ-ಗಿ ಫಾಲ್ಯಾ,
ಪೊರ್ವಾಂ ಯಾ ಆವೆರಾಂ?
-ಡೊ. ಎಡ್ವರ್ಡ್ ನೊರೊನ್ಹಾ