ಕವಿತಾ:
ಸೊಧ್ನಾಂ - ದೋನ್
ಪುನ್ವೆಚೆ ರಾತಿಂ ಚಂದ್ರಾಲೊ ಸೊಧ್
ಕೊಣೆ ದಿಲಿಗೊ ಅಸಲಿ ಬೂಧ್
ಆವಯ್ಚ್ಯಾ ತೊಂಡಾರ್ ಬಾಳ್ ದಿಸನಾ
ಬಾಮ್ಣಾಚ್ಯಾ ಘರಾ ಮೆಳನಾ ದೂಧ್
ಫಾಂತ್ಯಾ ಪಾರಾರ್ ಕೊಂಬ್ಯಾಚೊ ಉಲೊ
ಉಲ್ಯಾ ಉಲ್ಯಾಂತು ಕವಿತಾಂ ಝೆಲೊ
ತಾಂತುನ್ ಮ್ಹಗೆಲೆಂ ಗೀತ್ ಮೆಳನಾ
ಮತಿಂತುಲೊ ಕವಿ ಸೊಧುಂಕ್ ಗೆಲೊ
ಚಾಂದ್ಣ್ಯಾಕ್ ಫಸವ್ನ್ ಫುಲೊಲಾಂ ಫುಲ್
ಪಾಕ್ಳ್ಯೊ ಉಸವ್ನ್ ಘಾಲಿಗೊ ಭುಲ್
ಭುಲಿಂತ್ ತುಜೆ ಸೊಭಾಯ್ ಸೊದ್ತಾನಾ
ಭೊಂವ್ರ್ಯಾನ್ ಬಸೊನ್ ಪೆಟಯ್ಲಿ ಚೂಲ್
ಬಾಳಾಚ್ಯಾ ತೊಂಡಾರ್ ಹಾಸ್ಯಾಚಿ ಮೋಡ್
ದೊಳ್ಯಾಂನಿ ಚೊಯ್ತಾಂ ಉಸವ್ಲಿ ಕೂಡ್
ಹಾಸ್ಯಾಚೆಂ ಪುಣ್ ಮೂಳ್ ಮೆಳನಾ
ಬಾಳ್ ವೊಳುನ್ ಹಾಸ್ಲೊ ಚಡ್
ಧಾಕ್ಟುಲಿಂ ಪೊರಾಂ ಝಡಾಯ್ತಾತ್ ತೊರಾಂ
ಎಕ್ಟೊ ಚೊಯ್ತಾಂ ವೊರಾಂಚಿಂ ವೊರಾಂ
ವೊಳಿಂತ್ ತಾಚೆ ಖೆಳ್ ಮೆಳನಾ
ವಾಟೆಕ್ ಲಾಯ್ತಾನಾ ಶೆಜಾರ್‍ಚಿಂ ಘರಾಂ
ಚಲಿ ಲಜೆನ್ ವಾಟ್ ಧರಿತ್
ಹಾಂವ್ ಚೊಯ್ತಾನಾ ಪಾಲಂವ್ ಸಾರಿತ್
ಲಜ್ ವಾ ಝೆತ್ ಕಾಂಯ್ ಕಳನಾ
ವೊತಾಂತ್ ವೆತಾ ತಿ ಪಾಲ್ವಾ ಖೆರಿತ್
ಸುಭಾಗಿ ವೊಕ್ಲೆ, ಗಳ್ಯಾಂತ್ ಸರ್
ಹಾಂವೆಂ ದಿಲ್ಲೊ ಗುಲೊಬ್ ಖಂಯ್ಸರ್?
ಮರ್‍ತ್ಯಾ ಫುಲಾಂನಿ ಜೀಣ್ ದಿಸನಾ
ರಾತಿಕ್ ರಾಕ್ತಾ ತುಜೊಗೊ ನರ್
ವಯ್ಜಾಲ್ಯಾ ಮಾಂಡಾರ್ ವೊಕ್ತಾಂಚೊ ಭೋಗ್
ಭಲಾಯ್ಕೆಂತ್ ತುಂ ಸೊಧಿತಾ ರೋಗ್
ಮರ್‍ಣಾಚ್ಯಾ ತೊಂಡಾರ್ ಗೂಣ್ ದಿಸನಾ
ರೊಗಾಚೆ ಸೊಧ್ನೆಂತ್ ಮೆಳನಾ ಮೋಗ್
ವಾವ್ರಾಡ್ಯಾ ತುಜ್ಯಾ ಪೊಟಾಕ್ ಮಿರಿ
ದೊಳ್ಯಾಂತ್ ಸದಾಂ ದುಕಾಳ್ ಝರಿ
ದೂಕ್ ಭೊಗ್ತಾನಾ ಸುಖ್ ಲಾಭನಾ
ಭಾಂಗ್ರಾಚಿ ತರೀ ಸುರಿ ತಿ ಸುರಿ
ಮೊನ್ಯಾ ಮಾನೆಸ್ತಾ, ಪೊಟಾಕ್ ಉಂಡೊ
ವಾಟೆರ್ ಗಾಡೊ, ಮಾತ್ಯಾರ್ ಮುಡೊ
ಮುಡ್ಯಾಚೆ ಜಡಾಯೆಂತ್ ವಾಟ್ ದಿಸನಾ
ಮತಿಂತುಲೊ ಕವಿ ಕುಶಿನ್ ಸರೊ
ಬಾಳಾಚೊ ಹಾಸೊ ಖೆಳ್ ಭುರ್‍ಗ್ಯಾಂಚೊ
ಚಲಿಯೆಚಿ ಲಜ್ ಮೇಳ್ ದರ್ಯಾಚೊ
ಎಕಾಂತಯ್ ದೆವಾ ಮೋಗ್ ದಿಸನಾ
ಸೊಧ್ನೆಂತ್ ತುಜೊ ತಾಳೊ ಆಯ್ಕಲೊ
ಪುನ್ವೆಚೆ ರಾತಿಂ ಚಂದ್ರಾಚೊ ಸೊಧ್
ಕೊಣೆ ದಿಲಿರೆ ತುಕಾ ಹಿ ಬೂಧ್?
ಆವಯ್ಚ್ಯಾ ತೊಂಡಾರ್ ಬಾಳ್ ದಿಸನಾ
ಬಾಮ್ಣಾಚ್ಯಾ ಘರಿಂ ಮೆಳನಾ ದೂಧ್
-ಚಾ.ಫ್ರಾ. ದೆಕೊಸ್ತಾ