ಕವಿತಾ:
ಶೆಂಡೊ
ಹಾಂವ್ ಬಸ್ಲಾಂ ಪಾಟ್ಲೆ ಬಸ್ಕೆರ್
ಆನಿ ಬಾಯೆ ಮ್ಹಜೊ ಅತ್ಮೊ ರಿಸ್ಕೆರ್
ತುಂ ಬಸ್ಲ್ಯಾಯ್ ಮುಕ್ಲೆ ಸಿಟಿರ್
ಅಂತರ್ಮಳಾಂ ತುಜೆ ಪಾಟಿರ್
ತುಜೊ ದುದ್ಯಾ ತೆದೊ ಶೆಂಡೊ
ಜಸೊ ಉದ್ಕಾರ್ ಧಲ್ಚೊ ಬೊಂಡೊ
ಕೊಲೆಜಿಚೆ ಚಲಿಯೆಪರಿ ವಾಗ್ತಾ
ಘಡ್ಯೆನ್ ಘಡಿ ನಾಕಾಕ್ ಮ್ಹಜ್ಯಾ ಲಾಗ್ತಾ
ತಾಂತುಂ ಭರ್‍ಲಾಂಯ್ ಕಿತೆಂ?
ಮ್ಹಾಕಾ ಸಾಂಗ್ಲ್ಯಾರ್ ಜಾತೆಂ -
ನಾರ್‍ಲ್ ಭರ್‍ಲ್ಯಾಯ್?
ರೇಂವ್ ಭರ್‍ಲ್ಯಾಯ್?
ಸೊರೊ ಭರ್‍ಲಾಯ್?
ವಾ ಪಾಯ್ನೆಲಾಂತ್ಲ್ಯಾ ಜೆಜುಬರಿ
ಮುಟಿಂತ್ ಆಪ್ಲೆ ಧರಲ್ಲೆ ಬರಿ
ಅಪರಿಮಿತ್ ಮಾಯೆಮೊಗಾನ್
ಸಗ್ಳೊ ಸಂವ್ಸಾರ್ ಆಪ್ಲ್ಯಾ ಶೆಂಡ್ಯಾಂತ್ ಧರ್‍ಲಾಯ್?
ನಾಕಾ, ಪಾಟಿಂ ಪಳೆನಾಕಾ
ತುಜಿ ಖಬರ್ ಮ್ಹಾಕಾ ನಾಕಾ
ತುಜೆ ಗೊಮ್ಟೆರ್ ಏಕ್ ಊವ್ ದೆಂವ್ಲ್ಯಾ
ಪೆಂಕ್ಟಾಕ್ ಹಾತ್ ಧರುನ್ ಉಬಿ ರಾವ್ಲ್ಯಾ
ವಯ್ರ್ ಪಳೆವ್ನ್, ಖಾಡ್ಕಿ ಖೆಳವ್ನ್
ಮ್ಹಣ್ಟಾ ಆಪ್ಲೆಂ ಸೊಂಡ್ ವೊಳಾವ್ನ್
ಏಕ್ ಸವಾಲ್ ಆಪ್ಣಾಕ್ ಧೊಸ್ತಾ:
‘ಹಿ ಬಾಯ್ಲ್-
ಹಿ ಶೆಂಡ್ಯಾ ಜಡಾಯ್ ಕಶಿ ಸೊಸ್ತಾ?’
-ಚಾ. ಫ್ರಾ. ದೆಕೊಸ್ತಾ