ರಾನಾಂತ್ಲೊ ಮಾನ್

ಕವಿತಾ ಖೊಡ್:

ರಾನಾಂತ್ಲೆ ಜಾತಿಕ್ ಕಾಂಟಾಳ್ಯಾಚಿ ವಸ್ತ್ ನಾಡಾಂತ್ಲೆ ಮನಿಸ್ ಪೊಟ್ಲುನ್ ಧರ್‍ತಾತ್

ಕೊಂಕ್ಣಿ ಕವಿತಾ ರಚ್ನಾರಾಂಕ್ ಆನಿ ರಸಿಕಾಂಕ್ ಕೊಂಕ್ಣಿ ಕವಿತಾಂಚ್ಯಾ ಜುದಾಸಾ ಥಾವ್ನ್ ಮಾಯಾಮೊಗಾಚೆ ನಮಸ್ಕಾರ್.ಆಮ್ಚ್ಯಾ ಮೊಗಾಚ್ಯಾ ವಿನ್ಸಿ ಆಂಜೆಲೊರ್ ಹಾಣೆ ವಿಮರ್ಸೊ ಕರುಂಕ್ ಮಾಕಾ ಉಲೊ ದಿಲ್ಲೊ.ತಾಚೊ ಉದ್ದೇಶ್ ಕಿತೆಂ ಮ್ಹಣೊನ್ ಖಂಡಿತ್ ಹಾಂವ್ ನೆಣಾಂ ತರೀ ಪಾಟ್ಲ್ಯಾ ದಿಸಾಂನಿ ಮಂಗ್ಳುರಾಂತ್ ವಿಮರ್ಸೊ ಕೆಲ್ಲ್ಯಾಂಕ್ ಯೆಂವ್ಚ್ಯಾ ಖತಾರ್ನಾಕ್ ಮೊಬಾಯ್ಲ್ ಕೋಲಾಂ ವಿಶಿಂ ಆಯ್ಕಾತಾನಾ ಮಾತ್ಸೆಂ ಭ್ಯೆಂ ಸಯ್ತ್ ಭೊಗ್ತಾ.  ತರೀ ಭಿಯೆಂವ್ನ್ ಬಸ್ಚೊ ಸ್ವಭಾವ್ ಮ್ಹಜೊ ನ್ಹಯ್.  ತ್ಯಾ ದೆಕುನ್ ಆರ್ವಿಲ್ಯಾ ದಿಸಾಂನಿ ಖಬರ್ ನಾಸ್ತಾನಾ ರುಕಾರ್ ಬೆಂದರ್ ವಾಡ್‌ಲ್ಲ್ಯಾ ಬರಿ ಕೊಂಕ್ಣಿ ಕವಿತಾ ಕ್ಷೇತ್ರಾಂತ್ ಸವ್ಕಾಸಾಯೆನ್ ತರೀ ಆಪ್ಲಿಂ ಬಳ್ವಂತ್ ಪಾವ್ಲಾಂ ರೊಂಬೊನ್ ಆಸ್ಚ್ಯಾ ಸ್ಟ್ಯಾನಿ ಬೆಳಾ ಹಾಚ್ಯಾ `ರಾನಾಂತ್ಲೊ ಮಾನ್' ಹ್ಯಾ ಕವಿತಾ ವಯ್ರ್ ಏಕ್ ಭಾರ್ಕಾಯೆಚಿ ನದರ್ ಮಾರ್‍ಚೆಂ ಏಕ್ ದಾಕ್ಟುಲೆಂ ಪ್ರಯತ್ನ್.  ಖಂಡಿತ್ ಜಾವ್ನ್ ಕೊಣಾಚಿಂ ಥಾಪ್ಡಾಂ ಖಾಂವ್ಕ್ ಪಡ್ತಾಲಿಂ ಮ್ಹಳ್ಳೆಂ ಭ್ಯೆಂ ಖಂಡಿತ್ ನಾ ಕಿತ್ಯಾಕ್ ಮ್ಹಳ್ಯಾರ್ ಹೆಂ ಹಾಂವೆಂ ಆಜ್ ಹಾಂಗಾ ವಾಚುಂಕ್ ಆಸಾ ಮ್ಹಣೊನ್ ಕಾಲ್ ರಾತಿಂ ತಯಾರ್ ಕೆಲ್ಲೆಂ ಖಂಡಿತ್ ನಂಯ್.

ರಾನಾಂತ್ಲೊ ಮಾನ್ ಕಾಣ್ಘೆವ್ನ್ ಹ್ಯಾ ಸಂಸಾರಾಚಿ ಭೊಂವ್ಡಿ ಮಾರುಂಕ್ ಹಾಂವ್ ವಚನಾ.  ಆಮ್ಚ್ಯಾ ಕೊಂಕ್ಣಿ ಸಾಹಿತ್ಯ್ ಸಂಸಾರಾಚ್ಯಾ ವರ್ತುಲಾ ಭಿತರ್ ಹೆಂ ಕವನ್ ಬಳಾಧಿಕ್ ಭೊಂವ್ಡಿ ಮಾರುಂಕ್ ಜಾಯ್ತೊ ಜಾಗೊ ಆಸಾ ಜಾಲ್ಲ್ಯಾನ್ ಹ್ಯಾಚ್ ಸಂಸಾರಾಭಿತರ್ ಘುಂವ್ಚೆಂ ಪ್ರಯತ್ನ್ ಕರ್ತಾಂ.  `ರಾನಾಂತ್ಲೊ ಮಾನ್' ಕವಿತಾಂತ್ ಕವಿನ್ ಕೊಂಕ್ಣೆಚ್ಯಾ ದೋನ್ ಜನಾಂಗಾಂಕ್ ಭೊವ್‌ಚ್ ಉತ್ತೀಮ್ ರಿತಿನ್ ವರ್ಣಿಲಾಂ. ಮಾಂಕೊಡ್-ವಾಂದೊರ್, ಹಸ್ತ್-ಉಂದಿರ್, ಕೊಲೊ, ರೂಕ್-ಝಾಡಾಂ, ತಳಿಂ-ತೊಡಾಂ ಹಿಂ ಸರ್ವ್ ಕೊಂಕ್ಣೆಂತ್ಲ್ಯಾ ಸರ್ವ್ ನಿಸ್ವಾರ್ಥಿ ವಾವ್ರಾಡ್ಯಾಂಕ್ ಪ್ರತಿಫಲಿತ್ ಕರ್‍ತಾ ತರ್ ನಾಡಾಂತ್ಲ್ಯಾ ಮನ್ಶಾಂಕ್ ಸನ್ಮಾನಾಂಕ್ ಲೇಖ್ ಘಾಲ್ಚ್ಯಾ , ಶೊಲಾಂಚಿ ರಾಸ್ ಕರುನ್ ಘಾಲ್ಚ್ಯಾ ಕೊಂಕ್ಣೆಂತ್ಲ್ಯಾ ಸ್ವಘೋಷಿತ್ ಉತ್ತೀಮ್ ವಾವ್ರಾಡ್ಯಾಂಕ್ ಪ್ರತಿಫಲಿತ್ ಕರ್‍ತಾ.

ಖಂಡಿತ್ ಜಾವ್ನ್ ಜಾಂವ್ ಆಮ್ಚ್ಯಾ ಆದ್ಲ್ಯಾ ಮ್ಹಾಲ್ಘಡ್ಯಾ ಸಾಹಿತಿಂಕ್ ತಶೆಂಚ್ ಆತಾಂ ಬೊಟಾಂನಿ ಮೆಜ್ಯೆತ್ ತಿತ್ಲ್ಯಾ ಥೊಡ್ಯಾ ನಿಸ್ವಾರ್ಥಿ ವಾವ್ರಾಡ್ಯಾಂಕ್ ಸನ್ಮಾನ್ - ಪುರಸ್ಕಾರ್ ಹಾಚಿ ಕಿತೆಂಚ್ ಆಶಾ ನಾತ್‌ಲ್ಲಿ, ಕೊಂಕ್ಣೆಚಿ ಸೆವಾ ನಿಸ್ವಾರ್ಥಿ ರುಪಾರ್ ತೆ ಕರುನ್ ಆಸ್‌ಲ್ಲೆ ಆನಿ ಆತಾಂ ಜಾಲ್ಯಾರಿ ಕರುನ್ ಆಸಾತ್.  ಹಾಂಚಿ ಸೆವಾ ನಿಸ್ವಾರ್ಥಿ ಜಾವ್ನಾಸ್‌ಲ್ಲ್ಯಾನ್ ತೆ ಕೆದ್ನಾಂಯ್ ಪ್ರಶಸ್ತ್ಯಾಂ ಪಾಟ್ಲ್ಯಾನ್ ಧಾಂವೊಂಕ್ ನಾಂತ್. 

ಪುಣ್ ಆಜ್ ಪರಿಸ್ಥಿತಿ ದುಸ್ರಿಚ್ ಉದೆಲ್ಯಾ.ಆಮ್ಚ್ಯಾ ಚಡ್ತಿಕ್ ಸಂಘಟನಾಂಕ್ 100 ರುಪ್ಯಾಂಚೆಂ ಏಕ್ ಶೋಲ್ ಆನಿ 25 ರುಪ್ಯಾಂಚಿಂ ಫಳಾಂ ದೀವ್ನ್ 10,000 ಯಾ 25,000  ರುಪಯ್ ಸನ್ಮಾನಿತಾಂ ಥಾವ್ನ್ ಪಿಳುಂಕ್ ಬರ್‍ಯಾನ್ ಕಳಿತ್ ಆಸಾ. ತ್ಯಾ ದೆಕುನ್ ಶೊಲಾಚಿ ಆಶಾ ದಾಕೊವ್ನ್ ಮ್ಹಾಕಾ ಫುಗಯ್ಲೆಂ ಆನಿ ಹಾಂವ್ ಇಡ್ಲ್ಯಾಂಚೆಂ ಪೀಟ್ ಫುಗ್‌ಲ್ಲ್ಯಾ ಬರಿ ಪುಗ್ಲೊಂ.  ಹ್ಯಾ ತಾಂಚೆ ಪುಗೊವ್ಣೆಂತ್ ತಾಂಚ್ಯಾ ಕಾರ್ಯಾಚಿ ವೇದಿ ತಯಾರ್ ಜಾಲಿ.  ನಾನು ಮರೋಲ್ ಮಂಟಪ ಯಾ ನಾನು ಮರೋಲ್ ಮಹಾದ್ವಾರ್  ಉಬೆಂ ಜಾಲೆಂ.  ಹಾಂವ್ ಆರ್ದ್ಯಾ ವೊರಾಚ್ಯಾ ಹ್ಯಾ ಕಾರ್ಯಾಕ್ ಹಾಂಗಾ ಥಾವ್ನ್ ಮ್ಹಜೆ ಪಯ್ಶೆ ಯೆಟುನ್ ಗಾಂವಾಂಕ್ ಪಾವ್ಲೊಂ.  ಥಂಯ್ ಏಕ್ ಶೆಂಭರ್ ರುಪ್ಯಾಚೆಂ ಶೊಲ್ ಜೆಂ ಸಮಾ ಪೆಂಕ್ಟಾಕ್ ರೆವ್ಡಾಂವ್ಕ್ ಸಯ್ತ್ ಪಾವನಾ, ತಶೆಂಚ್ ದೋನ್ ಆರ್ದಿಂ ಕಾಳಿಂ ಜಾಲ್ಲಿಂ ಎಪ್ಪಲಾಂ ಆನಿ ದೋನ್ ಸುಕ್ಯೊ ಮುಸುಂಬಿ ದೀವ್ನ್ ಸನ್ಮಾನ್ ಕೆಲೊ ಮಾತ್ರ್ ನ್ಹಯ್ ಆಸ್ತಾಂ ಏಕ್ ಬಿರುದ್  ಸಯ್ತ್ ದಿಲೆಂ.  ನಾನು ಮರೋಲ್-ಕೊಂಕ್ಣೆಚಿ ಹಸ್ತ್. ಚಾರ್ ಜಣಾಂ ಕುಟ್ಮಾ ಮಂತ್ರಾಂಚ್ಯಾಂನಿ ವೆಬ್ ಸಾಯ್ಟಿರ್ ಸಂದೇಶ್ ಘಾಲೆ, ಹಾಂವ್ ಇತ್ಲೊ ಖುಶಿಗಿ ಮ್ಹಾಕಾ ಏಕ್ ಘಡಿಯೆ ಸಯ್ತ್ ಚಿಂತ್ಚಿ ಸಕತ್ ನಾತ್‌ಲ್ಲಿ ಕಿ ಹಾಂಣಿ ಮಂಟಪ ಆನಿ ಮಹಾದ್ವಾರ್ ಬಾಂದುನ್ ಹಾಂವ್ ಜಿವಂತ್ ಆಸ್ತಾನಾಂಚ್ ಮ್ಹಜೆಂ ಸ್ಮಾರಕ್ ಉಬೆಂ ಕೆಲಾಂ ಮ್ಹಣೊನ್. ಥಂಯ್ ಸನ್ಮಾನ್ ಕೆಲ್ಲ್ಯಾ ಸಂಘಾಚೆ ಮಾತ್ರ್ ದಾದೊಶಿ.  ಆಮಿ ಎಕ್ಲ್ಯಾಕ್ ಬರ್‍ಯಾನ್ ಮಾಂಕೊಡ್ ಕೆಲೊ ಮ್ಹಣೊನ್ ಉರ್‌ಲ್ಲ್ಯಾ ಪಯ್ಶ್ಯಾಂನಿ ಬಾರಾಂತ್ ಪಾರ್ಟಿ ಕರುನ್ ಗಮ್ಮತಾಂ ಮಾರುಂಕ್ ಲಾಗ್ಲೆ. ಅಶೆಂ ಆಮ್ಚ್ಯಾ ಸನ್ಮಾನಾಂಚಿ ಆನಿ ಸನ್ಮಾನಿತಾಂಚಿ ಆವಸ್ಥಾ.  ಸನ್ಮಾನ್ ಘೆತಲ್ಯಾಕ್ ಕಿತೆಂಯ್ ಆರ್ಹತಾ ಆಸಜಾಯ್ ಮ್ಹಣೊನ್ ನಾ, ಪಯ್ಶೆ ಮಾತ್ರ್ ಆಸ್ಲ್ಯಾರ್ ಜಾಲೆ. ಹಸತ್, ಸಿಂಹ್, ರಾಯ್ ಇತ್ಯಾದಿ ಆಪಾಪಿಂಚ್ ಉಬೆ ಜಾತಾತ್.  ಪಾಟ್ಲ್ಯಾ ವರ್ಸಾಂನಿ ಹಾವೆಂ ವರ್ಸಾಂ ಥಾವ್ನ್ ವೊಳ್ಕುಂಚ್ಯಾ ಎಕೆ ವ್ಯಕ್ತಿಕ್ ತಾಕಾ ಕವಿತಾ, ಕಾಣಿಯೊಂ, ಕಾದಂಬರಿ ಹಾಂಚಿ ಕುಸ್ಕುಟಾಯೆಚಿ ಜಾಣ್ವಾಯ್ ನಾ.  ಸಾಹಿತಿಕ್ ಜ್ಞಾನ್ ಮ್ಹಳ್ಯಾರ್ ಥೊಡಿಂ ಸಂಪಾದಕಾಕ್ ಪತ್ರಾಂ ಆನಿ ಸವಾಲಾಂ ಜವಾಬಿ ವಿಭಾಗಾಕ್ ಥೊಡಿಂ ಸವಾಲಾಂ ಇತ್ಲೆಂಚ್.  ತಾಕಾ ಏಕ್ ಮಹಾನ್ ಸಂಸ್ಥ್ಯಾನ್ ಸಾಹಿತಿಕ್ ಪುರಸ್ಕಾರ್ ದೀವ್ನ್ ಸನ್ಮಾನಿತ್ ಕೆಲ್ಲೆಂ ಘಡಿತ್ ಚಿಂತಾನಾ ಮ್ಹಜ್ಯಾ ವಯ್ರ್ ಮ್ಹಾಕಾಚ್ ಲಜ್ ಭೊಗ್ತಾ.  ದೂಖ್ ಭೊಗ್ತಾ ಸಾಂಗುಂಕ್ ತ್ಯಾ ವಿಂಚವ್ಣೆ ಮಂಡಳೆಂತ್ ಆಮ್ಚೆ ಥೊಡೆ ಮಹಾನ್ ಸಾಹಿತಿ ಆನಿ ಪ್ರಖ್ಯಾತ್ ನಾಟಕಿಸ್ತ್ ಆಸ್‌ಲ್ಲೆ ಮ್ಹಣೊನ್.

ಉಪ್ರಾಂತ್ ಥೊಡ್ಯಾ ಸಂಘ್-ಸಂಸ್ಥ್ಯಾಂಚೆಂ ಆಸ್ಥಿತ್ವಚ್ ಆಸನಾ.  ಖಂಯ್‌ಗಿ ವಿದೇಶಾಂತ್ಲ್ಯಾ ಕೊನ್ಶ್ಯಾಚ್ಯಾ ಎಕಾ ಶಹರಾಂತ್ ಥಾವ್ನ್ ರಜೆರ್ ಗಾಂವಾಕ್ ಯೆತಾತ್.  ಆಪ್ಣಾಕ್ ಜಾಯ್ ಜಾಲ್ಲ್ಯಾ ಎಕ್ಲ್ಯಾಕ್ ಶಹರಾಚ್ಯಾ ಪಂಚ್‌ತಾರಾ ಹೊಟೀಲಾಂತ್ ಸನ್ಮಾನ್.  ಆಗೇರಾ ಇಂಟರ್‌ನ್ಯಾಷನಲ್ ಚ್ಯಾರಿಟೇಬಲ್ ಟ್ರಸ್ಟ್ ಲಂಡನ್ ಹಾಂಚೆ ಥಾವ್ನ್  ಆಗೇರಾ ಇಂಟರ್‌ನ್ಯಾಷನಲ್ ಶತಮಾನಾಚೊ ವ್ಯಕ್ತಿ - ನಾನು ಮರೋಲ್ ತೊಟ್ಟಾಮ್  . ಪರ್ತುನ್ 50-60 ಸಂದೇಶ್. ನಾನು ಮರೋಲ್ ಫುಗ್ತಾ.  ಇತ್ಲೆ ಸಂದೇಶ್ ಆಯ್ಲ್ಯಾತ್ ಸಾಯ್ಭಾ ಮ್ಹಣೊನ್ ನಾನುನ್ ಆನ್ಯೇಕ್ ಶೆಂಭರ್ ಲೊಕಾಕ್ ಸಂದೇಶ್ ಪಾಟಯ್ಲೆ.  ಪುಣ್ ಸತಾಚಿಂ ಸೊದ್ನಾಂ ಕರ್ತಾನಾ ಲಂಡನಾಂತ್ ಆಗೇರಾ ಇಂಟರ್‌ನ್ಯಾಷನಲ್ ಮ್ಹಳ್ಳ್ಯಾ ಸಂಸ್ಥ್ಯಾಕ್ ಏಕ್ ನರ್ ಮನಿಸ್ ಸಯ್ತ್ ವೊಳ್ಕನಾ ಯಾ ನಾಂವ್ ಸಯ್ತ್ ಆಯ್ಕೊನ್ ನೆಣಾಂ.  ಕೇವಲ್ ಒಡಿ  ಆನಿ ಒಡಿs ಆಗೇರಾ ಮಾತ್ರ್ ಹ್ಯಾ ಇಂಟರ್‌ನ್ಯಾಷನಲ್ ಸಂಸ್ಥ್ಯಾಚಿಂ ಸದಸ್ಯಾಂ ಆನಿ ಪದಾದಿಕಾರಿ.

ಹಾಂಗಾ ಮ್ಹಾಕಾ ಏಕ್‌ಚ್ ಸವಾಲ್ ಧೊಸ್ತಾ ಕೀ ಆಮಿ ಸರ್ವಾಂ ಕಿತ್ಯಾಕ್ ಮೌನ್ ಆನಿ ಮೂಖ್ ಪ್ರೇಕ್ಷಕ್ ಜಾತಾಂವ್.  ಏಕ್ ವ್ಯಕ್ತಿ ಎಕಾ ಸನ್ಮಾನಾಕ್ ಅರ್ಹ್ ನಂಯ್ ಯಾ ತ್ಯಾ ವ್ಯಕ್ತಿಕ್ ಸನ್ಮಾನ್ ಕರುಂಕ್ ಯೆವ್ಜಿಲ್ಲ್ಯಾ ಸಂಸ್ಥ್ಯಾಚಿ ಕೊಂಕ್ಣಿ ಸಾಹಿತ್ಯ್ ಆನಿ ಸಾಹಿತಿಕ್ ವಾವ್ರಾ ಥಂಯ್ ಜಾಣ್ವಾಯ್ ಕಿತ್ಲಿ ಮ್ಹಣೊನ್ ಕಿತ್ಯಾಕ್ ಪಾರ್ಕುಂಕ್ ವಚನಾಂವ್? ಹ್ಯಾಚ್ ಆಮ್ಚ್ಯಾ ಶೆಳೆಪಣಾಕ್ ಲಾಗೊನ್ ಕೊಂಕ್ಣೆಂತ್ ದಾಂತ್ ನಾತ್‌ಲಿಂ ಸಿಂಹಾಂ , ದಾಡೆ ನಾತ್‌ಲ್ಲ್ಯೊ ಹಸ್ತ್ಯೊ ವಾಡೊನ್ ಗೆಲ್ಯಾತ್ ಆನಿ ವರ್ಸಾಂ ಥಾವ್ನ್ ಕೊಂಕ್ಣೆಚಿ ಸೆವಾ ಕರುನ್, ಕೊಂಕ್ಣಿಚ್ ಆಪ್ಲೊ ಉಸ್ವಾಸ್ ಆನಿ ಆತ್ಮೊ ಮ್ಹಣೊನ್ ಜಿವಿತ್ ಸಾರ್‌ಲ್ಲೆ ವಿಲ್ಫಿ ರೆಬಿಂಬಸಾ ತಸ್‌ಲೆ ಮಹಾನ್ ಸಾಹಿತಿ ಕಿತೆಂಚ್ ಸರ್ಕಾರಿ ಗೌರವ್ ನಾಸ್ತಾನಾ ಮಾತ್ಯೆಕ್ ಮೆಳೊಂಕ್ ಗೆಲ್ಯಾತ್.  ಕಿತ್ಯಾಕ್ ಮ್ಹ್ಗಳ್ಯಾರ್ ಆಮಿ ಆಮ್ಚ್ಯಾ ವಯ್ರಚ್ ಶೊಲಾಂ ಪಾಂಗ್ರುನ್ ಘೆಂವ್ಚ್ಯಾಂತ್ ಬಿಜಿ ಜಾಲ್ಲ್ಯಾಂವ್ ಜಾಲ್ಲ್ಯಾನ್ ಆರ್ಹ್ ವ್ಯಕ್ತಿಂಕ್ ಫಾವೊತಿಂ ಶೊಲಾಂ ಮೆಳೊಂಕ್ ಕಿತೆಂಚ್ ಪ್ರಯತ್ನ್ ಕರುಂಕ್ ನಾ.

ಆಸಲ್ಯಾ ಎಕೆ ಪರಿಸ್ಥಿತೆಂತ್ ಸ್ಟ್ಯಾನಿಚಿ ಹಿ ಕವಿತಾ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ಲ್ಯಾ ಆಭಿಮಾನಿಂಕ್ ಚಿಮ್ಟೆ ಕಾಡ್ನ್ ಜಾಗೆಂ ಕರ್‍ತಾ ಆನಿ ಆಮಾಂ ಸರ್ವಾಂಚೊ ಕಾಯ್ದೊ ಕಿತೆಂ ಮ್ಹಣೊನ್ ಸಾಂಗ್ತಾ.ಕೊಂಕ್ಣೆಚಿ ಸೆವಾ ಕೆರುಂಕ್ ಆವ್ಕಾಸ್ ಮೆಳ್ತಾನಾ ನಾಡಾಂತ್ಲೊ ಮನಿಸ್ ಜಾವ್ಯಾಂ.  ಪ್ರಶಸ್ತ್ಯೊ ಆನಿ ಶೊಲಾಂ ಮುಖಾರ್ ಯೆತಾನಾ ರಾನಾಂತ್ಲೆಂ ಶಿಂವ್ , ಮಾಂಕೊಡ್- ವಾಂದೊರ್ ಜಾವ್ನ್ ಕೊಂಕ್ಣೆಚೊ ಮಾನ್ ರಾಕೊನ್ ವ್ಹರ್‍ಯಾಂ.

ಸ್ಟ್ಯಾನಿಚ್ಯಾ ಹ್ಯಾ ಉಲ್ಯಾಕ್ ಮ್ಹಜೊ ತಾಳೊ ಮೆಳೊವ್ನ್ , ತುಮ್ಚೊಯಿ ತಾಳೊ ಮೆಳ್ತಲೊ ಮ್ಹಳ್ಳ್ಯಾ ಆತ್ರೆಗಾ ಸವೆಂ ಕವಿ ಸ್ಟ್ಯಾನಿಕ್ ಬರೆಂ ಮಾಗ್ತಾಂ.

- ನಾನು ಮರೋಳ್

ಕವಿತಾ:

ರಾನಾಂತ್ಲೊ ಮಾನ್

ಸುತ್ತೂರ್‌ಚ್ಯಾ ರಾನಾಂತ್ ಫರ್‍ಮಾಣ್ ಜಾಲಾಂ
ಗುಣೇಸ್ತ್-ಮಾನೇಸ್ತ್ , ಉಪ್ಕಾರಿ - ರುಪ್ಕಾರ್‍ಯಾಂಕ್
ಯಾದಿಸ್ತಿಕಾ - ಶೋಲ್ ಪಾಂಗ್ರುನ್
ಶಿಂವಾ ರಾಯಾನ್ ಮಾನಾಕ್ ಯೆವ್ಜಿಲಾಂ.

ಕೋಣ್ ಬರೊ ಕೋಣ್ ವಾಯ್ಟ್
ಸೊದ್ನಾಂ ಜಾಲ್ಯಾಂತ್.
ರೂಕ್ ಝಾಡಾಂ, ತಳಿಂ ತೊಡಾಂ
ಹಾಂಚೆ ಪಯ್ಕಿ ಕೋಣ್ ವ್ಹಡಾಂ

ಸಗ್ಳ್ಯಾ ಮೊನ್ಜಾತಿ ಕುಳಾರ್
ಊಂಚ್ ಕೋಣ್ ರಾನಾರ್
ಮಾಂಕೊಡ್-ವಾಂದೊರ್, ಹಸ್ತ್ - ಉಂದಿರ್
ಕೋಣ್ ಬಸ್ತಾಲೊ ಭಾಂಗ್ರಾ ಪಾಟ್ಯಾರ್

ಕೊಲೊ ಬಾವ್ಡೊ ಸೊದುಂಕ್ ಪಡ್ಲಾ
ರಾನಾಂತ್ ಸರ್ವ್ ಸಮಾನ್ ಗಮ್ಲಾಂ
ಎಕಾಮೆಕಾ  `ಏಕ್'  ದಿಸ್ಲಾ
ದೆಕುನ್ ವರ್ದಿ ಆಶಿ ಪಾಟಯ್ಲ್ಯಾ

ರಾಯ್ ರಗ್ಳೆ ನಾಂತ್ ಭಾವಾ
ಶೋಲ್ - ಮಾನ್ ನ್ಹೆಣಾಂತ್ ರಾಯಾ
ರಾನಾಚೊ ಮಾನ್ ರಾಕೊನ್ ವ್ಹರಾ
ಶೋಲ್ - ಯಾದಿಸ್ತಿಕಾ ನಾಡಾಂತ್ಲ್ಯಾ ಮನಿಸ್ ಜಾತಿಕ್ ದಿಯಾ

- ಸ್ಟ್ಯಾನಿ ಬೆಳಾ