ಕವಿತಾ:
ದಲಿತಾಂಚೆಂ ಮಾಗ್ಣೆಂ
ಬಾಮ್ಣಾಂಕ್ ತುಂವೆಂ ರಚ್ತಾಂ ದೆವಾ
ಸಂಗಿಂ ಗೊರೂಂಯ್ ದಿಲೆಂ
ಬಾಮ್ಣಾನ್ ಆಂಗ್ಣಾಂತ್ ಮ್ಹೆಳೆಂ ಕರ್ತಾಂ
ಶೆಣಾನ್ ನಿತಳ್ ಕೆಲೆಂ
ಯುಗಾಂ ಕಿತ್ಲಿಂ ಸಂಪ್ಲಿಂ ಆಸ್ಯೆತ್
ಮ್ಹೆಳೆಂ ಕಮೀ ಕಾಂಯ್ ನಾ
ತುಜ್ಯಾ ಮನ್ಶಾಂ ಕಾಳ್ಜಾಂ ಮನಾಂ
ವೀಕ್ ಮಾಯಾಗ್ ಜಾಯ್ನಾ
ಆಡ್ವಾರ್ಲ್ಯಾರ್ ಮಾರ್ಚೆಂ ಗಾಯ್ರಾಂಕ್
ನಿತಳಾಯೆಕ್ ಶೆಣ್
ಉರತ್ ಮ್ಹಣೊನ್ ಚಿಂತಾಯ್ ಜಾಲ್ಯಾರ್
ತುಜೊ ತೊ ಊಣ್
ಕಿತ್ಲೇಂಯ್ ಶೆಣ್ ಉಣೆ ಪಡತ್
ಮ್ಹೆಳೆಂ ಹೆಂ ಧುಂವ್ಚ್ಯಾಕ್
ಧುಲ್ಲ್ಯಾ ತಿತ್ಲೆಂ ಕರೀತ್ ವೆತಾತ್
ಘಾಣ್ ಜಾಯ್ನಾ ಸೊಸ್ಚ್ಯಾಕ್
ವೊಂಟಿಯೆಂತ್ ಚೊರಿಯಾಂ ಭರ್ಶಿ ವೀಕ್
ಮನೀಸ್ ತುಜೆ ಪಿಯೊಂ
ಸಂತತ್ ತಾಂಚಿ ಪುಸುನ್ ವೆತಾಂ
ಲಾಗ್ತಲೆ ತೆ ಭಿಯೊಂ
ಗೊರ್‍ವಾಂ ಭ್ಯೆಂ ಕಾಳ್ಜಾಂತ್ ರಿಗ್ಲ್ಯಾರ್
ತೆಚ್ ಕರ್‍ತಿತ್ ಕಸಾಯಿ
ತವಳ್ ಆಮ್ಚಿ ಜಾತ್ಲಿ ಜೀಕ್
ಕರ್‌ರೆ ಮಾತ್ಶಿ ಸಾಸಾಯ್
-ಮೆಲ್ವಿನ್ ರೊಡ್ರಿಗಸ್