ಕವಿತಾ:
ತುಜ್ಯಾ ಲೊಂವೆಂ ಲೊಂವೆಂನಿ
ತುಜ್ಯಾ ಲೊಂವೆಂ ಲೊಂವೆಂನಿ ದೇವ್
ಘಾಮಾ ಥೆಂಬ್ಯಾಂತ್ ಜಾಹ್ನವೀ ತೋಯ್
ತುಂಚ್ ಆಮ್ಚಿ ಆವಯ್, ತುಕಾ ಜೈ ಜೈ
ರಸ್ತ್ಯಾ ಮಧೆಂ ರಾವೊವ್ನ್ ನಾಗ್ಡೆಂ ಕರುನ್
ಬುಡೊವ್ನ್ ಧಾಂವ್ಡಾವ್ನ್ ಉಜೊ ಘಾಲ್ನ್
ಲಾಸುನ್ ಕಾಡುನ್ ತುಕಾ ಮಾನ್ ಕರ್‍ತಾಂವ್
ತುಕಾ ಜೈ ಜೈ ಜೈ ತುಕಾ ಜೈ
ತಾಂಣಿ ಮಾರ್‍ಚೆಂ ಹಾಂಣಿ ಖಾಂವ್ಚೆಂ ಬುಡೊಂವ್ಚೆಂ
ವಿಕ್ಚೆಂ ಚಾಮ್ಡೆಂ ಕಾಡ್ನ್ ಚಿಲಾಂ ಕರ್‍ಚೆಂ
ಹೆಂ ಸಕ್ಕಡ್ ಆಮಿ ಕಶೆಂ ಸೊಸ್ಚೆಂ
ದೆಕುನ್ ಸದಾಂ ಸಾಂಬಾಳ್ತಾಂವ್
ತುಕಾ ಜೈ ಜೈ ಜೈ ತುಕಾ ಜೈ
ಚಿಂತ್ಪಾ ವ್ಹರ್‍ತೊ ದುಸ್ಮಾನ್ ನಾ
ಶಿಕ್ಪಾ ವ್ಹರ್‍ತೊ ವಿರೋಧಿ ನಾ
ಆಮಿ ಸಾಂಗ್ಚಿಂ ಸರ್ವ್ ಸತಾಂ
ಆಮಿಂಚ್ ತಿಂ ಪಾತ್ಯೆತಾಂವ್
ಪಾತ್ಯೆನಾತಲ್ಲ್ಯಾಂಕ್ ಶಿಕಯ್ತಾಂವ್
‘where ignorance is bliss
it is dangerous to be wise'
ತುಜ್ಯಾ ಲೊಂವೆಂನಿ ಲೊಂವೆಂನಿ ದೇವ್
ಶಿಮ್ಚೆ ಮುಳಾಂತ್ ಸಂಪತ್ತೆಚಿ ದೇವಿ
ತುಜೆವಿಣೆಂ ಆಮ್ಕಾಂ ಖಂಯ್ ಆಸಾ ಬಚಾವಿ
ತುಕಾ ಜೈ ಜೈ ಜೈ ತುಕಾ ಜೈ
-ಸ್ಟೀವನ್ ಕ್ವಾಡ್ರಸ್