ಸಂಪಾದಕೀಯ್:
ದೋನ್ ಧರ್ಮಾಂಚ್ಯಾ ಶೆಣಾಚೆ ಥಾಪೆ ಎಕಾ ಆಂಗ್ಣಾಂತ್
ಸಾಹಿತ್ಯಾಂತ್ ಆಸ್ಚ್ಯಾ ಶೆಣಾವಿಶಿಂ ಆಮಿ ಆಯ್ಕಲಾಂ. ಮನ್ಶಾಚ್ಯಾ ಕಾಳ್ಜಾ ಮನಾಂನೀಂಯ್ ಶೆಣ್ ಭರಲ್ಲೆಂ ಆಸ್ತಾ. ಇತ್ಲೆಂ ಪಾವನಾತಲ್ಲ್ಯಾಕ್ ಆತಾಂ ಗೊರ್‍ವಾಂ ಮಾರುಂಕ್ ಆಡ್ವಾರ್‍ಲಾಂ ದೆಕುನ್ ವಾಟೆ-ವಾಟೆರ್, ದಾರಾ-ದಾರಾರ್ ಶೆಣ್. ಹೆ ಎಕೆ ಪಾಟ್‍ಭುಂಯ್ಚೆರ್, ಹೆ ಕವಿತೆಂತ್ಲೊ ಮನೀಸ್ ಶೆಣ್ ಗುಡ್ಡಾಯ್ತಾ. ಧುಂವ್ಕ್ ಉದಕ್ ಸೊಧ್ತಾನಾ ನಿಮಾಣ್ಯಾ ಬ್ರೆಸ್ತಾರಾ ಆಪೊಸ್ತಲಾಂಚೆ ಪಾಂಯ್ ಧುಂವ್ಚೊ ಪಾದ್ರಿ ತಾಕಾ ದಿಸ್ತಾ.
ಹಾಂಗಾಸರ್ ದೋನ್ ಧರ್ಮಾಂಚ್ಯಾ ಶೆಣಾಂಚೆ ಥಾಪೆ ಎಕಾ ಆಂಗ್ಣಾಂತ್ ತುಕಾ ದಿಸ್ತಾತ್.
‘ಗೊರ್‍ವಾಂ ಕಸಾಯಿ ಆಡ್ವಾರ್ ಕಾಯ್ದೊ’ ವಿಷಯಾಚೆರ್ ಹಾಂವೆಂ ಬರಯಿಲ್ಲಿ ತಿಸ್ರಿ ಕವಿತಾ. ರುಚ್ಲ್ಯಾರ್ ಬರಯಾ. ನ್ಹಯ್ ತರ್, ಶೆಣಾಂತ್ ಬೊಂಚ್ ಘಾಲುಂಕ್ ಕೊಣೇಂಯ್ ಆಡ್ವಾರುಂಕ್ ನಾ. ಮಾಗೀರ್ ಆಮಿ ವ್ಹಡ್ ಜಾಂವ್ಚೆಂ ಕಶೆಂ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಶೆಣ್
ಗಾಂವಾರ್ ಪಾಂಯ್ ತೆಂಕೊಂಕ್ ಜಾಯ್ನಾ!
ಸಗ್ಳ್ಯಾನ್‌ಯ್ ಶೆಣ್...
ಗಲ್ಲೆ ಗಲ್ಲೆಂತ್
ಮೆಟಾ ಮೆಟಾಕ್
ರಸ್ತ್ಯಾರ್, ದಾರಾರ್
ಮೊಚೆ ಮ್ಹೆಳ್ತಾತ್ ದೆಕುನ್
ಲೋಕ್ ಖಾಲಿ ಪಾಂಯಾಂನಿ ಚಲ್ತಾ
-ಆನಿ ಹಾಂವ್‌ಯ್ ಪಯ್ಲೆ ಪಾವ್ಟಿಂ
ಖಾಲಿ ಪಾಂಯಾಂನಿ!
ಪಾಪಾರಿ ಮ್ಹಣೊನ್ ನ್ಹಯ್!
ಮಾಗೀರ್ ಗುಡ್ಡಾಯ್ಲೆಂಚ್!
ಕಿತ್ತುನ್ ಪರ್‍ಯಾಂತ್ ವ್ಹಾವೊವ್ನ್ ವಚೊಂ?
ಕಿತ್ತುನ್ ಪರ್‍ಯಾಂತ್ ಟೊಂಕ ಘಾಲುಂ?
ಕಿತ್ತುನ್ ಪರ್‍ಯಾಂತ್ ಜಿಬ್ಲಿ ಖೆಳುಂ?
ಉದಕ್ ಸೊಧ್ತಾಂ ಸೊಧ್ತಾಂ
ದಿಸ್ಲಿ ಇಗರ್ಜ್ ಬಗ್ಲೆಕ್!
ಇಗರ್ಜೆಂತ್ ಮೀಸ್ ಜಾತಾ
ನಿಮಾಣೊ ಬ್ರೆಸ್ತಾರ್!
ಆನಿ ಪಾದ್ರಿ
ಆಪೊಸ್ತಲಾಂಚೆ ಪಾಂಯ್ ಧುತಾ!
ಜನೆಲಾಂತ್ಲ್ಯಾನ್ ತಿಳುನ್ ರಾವ್ಲೊಂ!
ಹೆಂ ಮ್ಹೆಳೆಂ ಧುಂವ್ಕ್
ತೆಂ ‘ಟೀಸ್ಪೂನ್’ ಉದಕ್ ಖಂಯ್ ಪುರೊ?
ಹೆ ಪಾಂಯ್ ಪುಸುಂಕ್
ತಾಚ್ಯಾ ಪೆಂಕ್ಟಾಚೊ ತೀರ್ ಕಿತ್ಲೊ ಪುರೊ?
ಖಿಣಾನ್,
ಘಡ್ಗಡೊ, ಜಗ್ಲಾಣೆಂ
ಪಾವ್ಸ್ ವೊತ್ಲೊಚ್!!
ಪಾಕ್ಯಾಚ್ಯಾ ಪಾವ್ಳ್ಯಾಂಕ್ ಪಾಂಯ್ ಧರ್‍ಲೆ
ಮ್ಹೆಳೆಂ ಸಕ್ಕಡ್ ನಿತಳ್ ಜಾಲೆಂ.
ಮ್ಹೆಳ್ಯಾಂತ್ಲೆಂ ನಿತಳ್ ಜಾಂವ್ಕ್
ಭಿತರ್ ವಚಜಾಯ್ ಕಾಂಯ್ ನಾ
ಭಾಯ್ರಚ್ ರಾವ್ಲ್ಯಾರ್ ಪಾವ್ತಾ
ಮ್ಹೆಳ್ತಲೊಯ್ ಮ್ಹಳ್ಳೆಂ ಭಂಯ್ ನಾ!
-ಮೆಲ್ವಿನ್ ರೊಡ್ರಿಗಸ್