ಕೊಣಾಕ್ ಮಾಂದ್ಚೆ ಆಪ್ಲೆ?

ಸಂಪಾದಕೀಯ್:
 
ಗಝಲ್ ಕೊಂಕಣಿಂತ್ ಚಡಾನ್ ಚಡ್ ಯೆಂವ್ಚ್ಯೊ
 
ಗಝಲ್ ಉರ್ದು ಯಾ ಹಿಂದಿ ಭಾಸಾಂನಿ ಭೋವ್ ಫಾಮಾದ್ ಕವಿತೆಚೆಂ ರೂಪ್.  ಗಝಲಾಂಚ್ಯಾ ಸಾಂಜೆಂನಿ ದಾಧೊಸ್ಕಾಯೆಚಿಂ ಲ್ಹಾರಾಂ ಜಿಂ ವ್ಹಾಳ್ತಾತ್ ತಿಂ ಮಾಪ್ತಾನಾ ಹರ್‍ಯೆಕ್ಲೊ ಅಸ್ಕತ್ ಜಾತಾ. ತಿತ್ಲಿ ಏಕ್ ಸಕತ್ ಹೆ ಕವಿತೆಕ್. ಪುಣ್ ಕೊಂಕಣಿಂತ್ ಹೆಂ ಏಕ್ ರೂಪ್ ತಿತ್ಲೆಂ ಲೊಕಾಮೊಗಾಳ್ ಜಾಲ್ಲೆಂ ನಾ. ಜಾಂವ್ಕ್ ನಾ ಮ್ಹಣ್ಚ್ಯಾಕಯ್ ಆಮ್ಚ್ಯಾ ಕವಿಂನಿ ಹೆದಿಶಿಂ ವಿಶೇಸ್ ಪ್ರೇತನಾಂ ಕೆಲ್ಲಿಂ ಝಳ್ಕನಾಂತ್. 
 
ಸ್ವತಾ ಹಾಂವೆಂ, ವಿಲ್ಸನ್ ಕಟೀಲಾನ್ ಥೊಡಿಂ ಪ್ರೇತನಾಂ ಕೆಲ್ಲಿಂ. ಗೊಂಯಾಂತಯ್ ಅಸಲಿಂ ಅಪ್ರೂಪ್ ಪ್ರೇತನಾಂ ದಿಸ್ತಾತ್. ಪುಣ್ ಗಝಲಾಂಚ್ಯಾ ಪ್ರಕಾರಾಂತ್ ಜಬರ್‌ದಸ್ತೆನ್ ಹಾತ್ ಭೊಂವ್ಡಾಯಿಲ್ಲೊ ಕವಿ ಮ್ಹಳ್ಯಾರ್ ರಾಜಯ್ ಪವಾರ್. ಗಝಲಾಂಚಿ ನಾಡ್ ತಾಣೆ ಬರೀಚ್ ಪಾರ್ಕಿಲ್ಯಾ.
 
ಕೊಂಕಣಿಚಿ ಸಬ್ದಾಂವಳ್ ಘೆವ್ನ್ ಆಪುರ್ಬಾಯೆಚ್ಯೊ ಗಝಲ್ ಬರೊಂವ್ಕ್ ಸಾಧ್ಯ್ ಆಸಾ. ಆಮ್ಚ್ಯಾ ಕವಿಂನಿ ಅಸಲ್ಯಾ ಎಕಾ ಪ್ರಕಾರಾ ತೆವ್ಶಿಂ ಧ್ಯಾನ್ ದೀಜಾಯ್.
 
-ಮೆಲ್ವಿನ್ ರೊಡ್ರಿಗಸ್
 
ಕವಿತಾ:

 
ಕೊಣಾಕ್ ಮಾಂದ್ಚೆ ಆಪ್ಲೆ? -ಗಝಲ್
 
ಪರ್ಕ್ಯಾಂ ಭಾಶೆನ್ ಆಮ್ಕಾಂ ಜೆನ್ನಾಂ ಆಪ್ಲ್ಯಾಂನಿ ಮಾಪ್ಲೆ
ಕೊಣಾಕ್ ಮಾಂದ್ಚೆ ಪರ್ಕಿ ಆನಿ ಕೊಣಾಕ್ ರೆ ಆಪ್ಲೆ
 
ಬಸೊವ್ನ್ ಆಮ್ಕಾಂ ಪಾಟಾರ್ ವ್ಹಡ್ಲಿ ಪಕ್ವನಾಂಚಿಂ ತಾಟಾಂ
ಜೆಂವ್ಚೆ ಆದಿಂ ಗುಪ್‌ಚುಪ್ ಆಮ್ಚೆ ಹಾತ್ ಕಿತ್ಯಾ ಕಾಪ್ಲೆ?
 
ಜೈತಾಚಿ ವಾಟ್ ಆಮ್ಕಾಂ ತಾಂಣಿ ದಿಲಿ ಕರುನ್ ಮೆಕ್ಳಿ
ಉಪ್ರಾಂತ್ ಕಳ್ಳೆಂ ದರೆಕಾ ಮೊಡ್ನಾರ್ ಲಾಯಿಲ್ಲೆ ಸಾಪ್ಳೆ
 
ಇತ್ಲೆಂ ಖರೆಂ ತಾಂಣಿ ಗಾಯ್ಲಿಂ ಆಮ್ಚಿಂ ಜಾಯ್ತಿಂ ತುಸ್ತ್‌ಗಿತಾಂ
ಫುಡ್ಲ್ಯಾನ್ ಗಾಯ್ಲಿಂ ಗಿತಾಂ ಆನಿ ಪಾಟ್ಲ್ಯಾನ್ ಶಿರಾಪ್ಲೆ
 
ಸಂಕಟ್ ಕಾಳಾರ್ ದೇವ್ ಪಾವ್ತಾ ಮ್ಹಣ್ ಗೆಲೊ ದೆವ್ಳಾಂತ್
ಸಾಂಗ್ ದೆವಾ ತುಜ್ಯಾ ಗರ್ಭ್‌ಕುಡಿಚೆಂ ದಾರ್ ಕೊಣೆಂ ಧಾಂಪ್ಲೆಂ?
 
-ರಾಜಯ್ ಪವಾರ್
 
(ಸಾಪ್ಳೆ=Trap, ಮೋಡ್= ಘುಂವ್ಡಿ, ದರೆಕಾ=ಹರ್‍ಯೆಕಾ)