ಸಂಪಾದಕೀಯ್:
ಭಾಜು ಪಿಂದಲ್ಲ್ಯಾ ಅಕ್ಕಾಚಿ ಶಿಕಾಯತ್
ವೆಗ್ಳ್ಯಾಚ್ ಎಕಾ ಅನ್ಭೋಗಾಕ್ ವ್ಹರ್‍ನ್ ಪಾವಂವ್ಚಿ, ರೂಪಕಾನ್ ಭರ್‍ಲಲಿ, ಭೋವ್ ಸುಕ್ಷಿಮಾಯೆನ್ ಉತ್ರಾಂಚಿ ವಿಂಚವ್ಣಿ ಕೆಲ್ಲಿ ಆಪುರ್ಬಾಯೆಚಿ ಕವಿತಾ ಹಾಂಗಾಸರ್ ಆಮಿ ಪರ್ಗಟ್ ಕರ್‍ತಾಂವ್. ಗುರು ಬಾಳಿಗಾನ್ ಕನ್ನಡಾಂತ್ ಬರಯಿಲ್ಲಿ ಕವಿತಾ ಹಿ, ತಾಣೆಂಚ್ ಸ್ವತಾ ಕೊಂಕಣಿಕ್ ಉತ್ರಾಯ್ಲ್ಯಾ. ಮಾಗೀರ್ ತಾಚ್ಯಾಕಯ್ ಬರೆಂ ಕರುನ್ ಅಸಲೆಂ ತರ್ಜಣ್ ಕೊಣ್ ಕರುಂಕ್ ಸಕತ್? ಗುರು ಬಾಳಿಗಾ ಕನ್ನಡಾಂತ್ ಸರಾಗ್ ಬರಯ್ತಾ. ತಶೆಂ ಜಾಲ್ಲ್ಯಾನ್ ಹೆ ಕವಿತೆಚೆಂ ರೂಪ್, ಶೈಲಿ ಕನ್ನಡ ಭಾಷೆಚೆ ಕವಿತೆಚೊ ಉಡಾಸ್ ಹಾಡ್ತಾ ಜಾಲ್ಯಾರ್ ನವಲ್ ನಾ.
ಕವಿತೆಂತ್ ಗಿರಿಗಿರಿ ಘುಂವತ್ ಆಸ್ಚೆಂ ಪತಂಗ್ ಧರ್ತೆಕ್ ಶೆವ್ಟಲಾಂ. ಮಾಗೀರ್ ತೆಂ ಆಪ್ಣಾಂವ್ಕ್ ಪೊಕ್ರಿ ಪೊರಾಂಚಿ ಮಾರಾಮಾರಿ. ತಸಲೆ ಉಡ್ಡಾಉಡ್ಡಿಂತ್ ಅಕ್ಕಾಚೊ ಚೋಗೊ ಪಿಂದ್ಲಾ. ಆಮ್ಚ್ಯಾ ಸಮಾಜಾಂತ್ಲಿ ಸ್ತ್ರೀ ಶೋಷಣೆಚಿ ಗಜಾಲ್ ಏಕ್ ಮಾರ್ಮಿಕ್ ಥರಾನ್, ರೂಪಕ್ ವಾಪರ್‍ನ್ ಗುರು ಬಾಳಿಗಾನ್ ಹಾಂಗಾಸರ್ ಸಾದರ್ ಕೆಲ್ಯಾ.
ಪರ್‍ತ್ಯಾನ್ ಪರ್‍ತ್ಯಾನ್ ಹಿ ಕವಿತಾ ವಾಚಿಶೆಂ ಕರ್‍ಚ್ಯಾಂತ್ ಕವಿ ಯೆಶಸ್ವಿ ಜಾಲಾ. ಗುರು ಬಾಳಿಗಾಕ್ ಕವಿತಾ ಕುಳಾರಾಕ್ ಆಮ್ಚೊ ಯೆವ್ಕಾರ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭಯ್ಣಿಚಿ ಶಿಕಾಯತ್
ಭಯಿಣಿ ಖಾತೀರ್
ಮ್ಹಣೂನ್ ಫಕತ್..
ಪಳೈತಾ ಪಳೈತನಾ
ಗಿರಿಗಿರಿ ಘುಂವತ್ ಆಸ್ಚೆಂ
ತಿಚೆಂ ಪತಂಗ್
ವಯ್ರ್ ಪಳಯ್ತಚ್
ಧಾಂವ್ನ್ ಧಾಂವ್ನ್
ಆವಾರ್ ಉಡೂನ್
ಶೇಣ್ ಮಾಡೋವ್ನ್
ಫಾತರ್ ಆಡೋಳ್ನ್
ಪೋಡ್ನ್ ಉಠೂನ್
ಆಖೇರೀಕ್
ಪೋಕ್ರಿ ಭುರ್ಗ್ಯಾಂನಿ
ಶಿರಕಾವ್ನ್ `ಲಪೇಟ್’
ಕೆಲೆಂ ಪರ್‍ಯಾಂತ್
ತುಂಟೂನ್ ಸಕಯ್ಲ್
ಪಳ್ಳೆಲೆ ವೆಂಚೂಕ್
ಮಾರಾಮಾರಿ
ತುಮೀ ಜಾಣಾ,
ಕೋಣ್ ವೆಂಚತಾತ್ ಕೀ ತಾಜೇಚ್ ತೆಂ!
ಚೋಗೆಚ್ಯೋ ಗುಬ್ಯೊ
ಪಟಪಟ ಹುಮ್ಟೂನ್
ಕಾನ್ನಾಸಾಳೇರ್ ವಾಜೋವ್ನ್
ತಿತ್ಲೆ ಜಾಲ್ಯಾರೀಯ್
ಸೋಡನಾಶಿ
ಪಿಂದಲೆ ಕಾಗದ್
ಮೊಳ್ಳೇಲೆ ಸಾರ್ನಿವೀರ್
ಗುಸ್ಪಾವ್ನ್ ಗೆಲೆಂ
ಧವೆ ಕಾಟನ್ ಸೂತ
ನೆಲಾರ್ ಝರೋವ್ನ್
ಪಾಯ್ ತಾಂಡೂನ್
ಘರಾಕ್ ಪಾವತನಾ
ಪಳೆ ಮಾ
ಹಾಂವ್- ನಾಕಾ ನಾಕಾ
ಮ್ಹಳ್ಯಾರೀಯ್
ದುಷ್ಟೆಂಗೆಲಾಗ್ಗಿ ಝಗಡ್ನ್
ಚೋಗೋ ಪಿಂದೂನ್
ಆಯ್ಲಾ!
ಮ್ಹಣ್ ಶಿಕಾಯತ್ ಕರತಾಮೂ
ಅಯ್ಯೋ ಆಕಾ!
-ಗುರು ಬಾಳಿಗಾ