ಮನ್ಶಾಚೆಂ ಬರೆಂ-ಫಾಲೆಂ ರಾಶಿಂಚ್ಯಾ ಬಳಾಂಚೆರ್ ಬಾಂಧಲ್ಲೆಂ ಆಸ್ಲ್ಯಾರ್!
ಮನ್ಶಾಜಿನೊಸ್ ಜೊ ಆಸಾ, ತಾಕಾ ವೆವೆಗ್ಳಿಂ ಕಾರಣಾಂ ಆಸ್ತಾತ್. ಕಾಂಯ್ ದೆಡ್ಶೆಂ ವರ್ಸಾಂ ಆದಿಂ ಕವಯಿತ್ರಿ ಎಮಿಲಿ ಡಿಕಿನ್ಸನಾನ್ ಆಪ್ಲೆ ಕವಿತೆಂತ್ ಮನ್ಶಾ ಜಿನೊಸಾಕ್ ತಾಚ್ಯಾ ಮೆಂದ್ವಾಚಿ ತಶೆಂ ಶಿರಾಂಚಿ ವೆವಸ್ಥಾಚ್ ಕಾರಣ್ ಮ್ಹಣೊನ್ ಸಾಂಗಲ್ಲೆಂ. ಹಾಂಗಾಸರ್ ಜಿ ಕವಿತಾ ದಿಲ್ಯಾ, ತಾಂತುಂ ಕವಿ ಸಿಜ್ಯೆಸ್ ತಾಕೊಡೆ - ಮನ್ಶಾ ಜಿನೊಸ್ ಜೊ ಆಸಾ, ತಾಕಾ ನಕ್ಷತ್ರಾಂ ಆನಿ ಗ್ರಹಾಂ ಕಾರಣ್ ಮ್ಹಣೊನ್ ಸಾಂಗ್ತಾ.
ಅಸಲೆಂ ಏಕ್ ಕಾರಣ್ ಮಾಂದ್ಚೆಂ ಯಾ ಮಾಂದಿನಾಸ್ತಾಂ ರಾಂವ್ಚಿ ಹುಶಾರ್ಗಾಯ್ ಆಮ್ಕಾಂ ಆಸಾ. ಹಾಸ್ಯಾಚೆಂ ನೀಬ್ ದೀವ್ನ್ ಸಿಜ್ಯೆಸಾನ್ ಹಿ ಕವಿತಾ ರಚ್ಲ್ಯಾ ಜಾಲ್ಯಾರಿ, ನಕ್ಷತ್ರ್ ಬಳಾಂಚೆರ್ ಹೊಂದೊನ್ ಮನ್ಶಾ ಜಿನೊಸ್ ಬದ್ಲತಾ ಮ್ಹಳ್ಳೆಂ ಆಮ್ಚೊ ಲೋಕ್ ಕಶೆಂ ಪಾತ್ಯೆವ್ನ್ ಆಸಾ ಮ್ಹಳ್ಳೆಂ ತೊ ಸಾಂಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತುಜಿ ರಾಶಿ ಖಂಯ್ಚಿ?
ಪಾಟ್ಲೆಂ ಪಳೆವ್ನ್ ಮುಕ್ಲೆಂ ಸಾಂಗ್ತಾಂ
ತುಜಿ ರಾಶಿ ಖಂಯ್ಚಿ?
ಹಾತ್ ಪಳೆವ್ನ್ ಮತ್ ವಾಚ್ತಾಂ
ರಾಶಿ ಮ್ಹಾಕಾ ಸಾಂಗ್ಶಿ?
ಕನ್ಯಾ ರಾಶಿಂತ್ ಜಲ್ಮಲಾಂಯ್ ತರ್
ಕನ್ಯಾ ಸ್ತ್ರೀ ಜಾತಲೆಂಯ್
ಮೇಶ ರಾಶಿಂತ್ ಆಯ್ಲಾಂಯ್ ತರ್
ದೇಶ್ ಸೊಡ್ನ್ ಧಾಂವ್ತಲೆಂಯ್
ತುಲಾ ರಾಶಿಂತ್ ಜಲ್ಮಲಾಯ್ ಭಾವಾ?
ಕಲಾಕಾರ್ ಜಾತಲೊಯ್
ವೃಶಬ್ ರಾಶಿಂತ್ ಜಾಲಾಯ್ ತರ್
ಕಲಾವತಿಕ್ ವೆಂಗ್ತಲೊಯ್
ಮಿಥುನ್ ತುಜಿ ರಾಶಿ ತರ್
ಕೆನ್ನಾಂಯ್ ಧೊಸ್ತಾ ಕೇತು
ಜನೆಲಾಕಡೆ ರಾವೊನ್ ಹಾಸ್ತಾ
ಪಾಟ್ಲ್ಯಾ ಘರ್ಚೆಂ ನೀತು
ಸಿಂಹ್ ತುಜಿ ರಾಶಿ ತರ್
ನೊವ್ರೊ ಮೆಳ್ತಲೊ ಬೆಪ್ಪಾ
ಗಾಂವ್ ಸಗ್ಳೊ ಮೊಡ್ತಲೆಂಯ್‍ಗೊ
ದೊಳೆ ಧಾಂಪ್ತಲ್ಲೊ ಪಾಪ್ಪಾ!
ಧನು ತಾರಾಂತ್ ಆಸಾಯ್ ಜಲ್ಮೊನ್
ಕಾಣಿ ಕವಿತಾ ಬರಯ್ಜೆ
ಪತ್ರಾಂನಿ ವೆಗಿಂ ಛಾಪಿಜೆ ತರ್
ಸಂಪಾದಕಾಂಕ್ ಭರಯ್ಜೆ
ವೃಶ್ಚಿಕ್ ತುಜೆಂ ನಕ್ತಿರ್ ಜಾಲ್ಯಾರ್
ಕಾಡ್‌ಗಾ ಕೊವ್ಳಿ, ಸಿಡಿ
ಪಯ್ಶಾಂ ಮಟ್ಟಾಕ್ ಭಿಂಯೆನಾಕಾ
ಸ್ಪೋನ್ಸರ್ ಕೆನ್ನಾಂಯ್ ರೆಡಿ!
ಕುಂಭ ರಾಶಿಂತ್ ಜಲ್ಮಲಾಯ್ ತುಂ
ಕುಂಭಕರ್ಣಚಿ ನೀದ್‌ಗಾ ತುಕಾ
ಬಾಯ್ಲ್ ಘೊಳ್ತಾ ಗಾಡ್ವಾ ಭಾಶೆನ್
ಉದಾರೊ ಪಡೊನ್ ಘೊರೆನಾಕಾ!
ಮಕರ್ ತುಜೆಂ ನೆಕೆತ್ರ್ ಜಾಲ್ಯಾರ್
ಮಂತ್ರಿ ಖಂಡಿತ್ ಜಾತಲೊಯ್
ಲೊಂಕ್ಡಾ ಪಿಟೊ ಗಿಳುನ್ ಗಿಳುನ್
ಜೈಲಾಂತ್ ಬಿರಿಯಾನಿ ಖಾತಲೊಯ್!
ಮೀನಾ ರಾಶಿಂತ್ ಜಲ್ಮಲಾಂಯ್ ತರ್
ದಾಧೊಶಿ ಖಾಯ್ಜೆ ಮಾಸ್ಳಿ
ನೊವ್ರೊ ಭಾಯ್ರ್ ಉಬ್ಲೊ ತರ್
ಕುಂಪಾದ್ರ್ ದಿತಲೊ ಪಾಸ್ಳಿ!
ಕರ್ಕ ರಾಶಿಂತ್ ಜಲ್ಮಲಾಯ್ ತರ್
ಜಿಣಿಭರ್ ಕರ್ಕರೆ
ಸೂರ್ಪನಖಿ ಮೆಳ್ಳೆಂ ಜಾಲ್ಯಾರ್
ದೀಸ್ ರಾತ್ ಫುರ್ಫುರೆ!
-ಸಿಜ್ಯೆಸ್ ತಾಕೊಡೆ