ಕವಿತಾ:
ಆನ್, ಹಾಂವ್ ಆನಿ ಮ್ಹಜೊ ಪೂತ್
ಮ್ಹಜ್ಯಾ ಆನಾನ್ ಖುರ್‍ಸಾರ್ ಮಾರ್‍ಲೊ
ಹಾಂವ್ ಧಾರೀನ್ ಕಾಪುನ್ ಕಾಡ್ತಾಂ
ತೂಂರೆ ಕಿತೆಂ ಕರ್‍ತಾಯ್ ಪುತಾ?
ಪಯ್ಸುಲ್ಯಾನ್ ಗುಳೆ ಸೊಡ್ತಾಂ
ಆನ್ ಪೆಜೆ ಕುಂತಾಂ ಜೆವಿ
ಹಾಂವ್ ಶಿತಾ ಗೊಟೊ ಜೆವ್ತಾಂ
ಪೂತ್ ಮ್ಹಜೊ ಝೆತಾನ್ ಮ್ಹಣ್ತಾ
ಹಾಂವ್ ಪಿವ್ಳೊ ಪುಲಾವ್ ಸೆವ್ತಾಂ
ಆನ್ ಪರ್‍ನೆಂ ಗುಮಾಟ್ ಮಾರಿ
ಮ್ಹಜೆಂ ಬೋಟ್ ತಾರೀಕ್ ಚುಂಬ್ತಾ
ಎಲೆಕ್ಟ್ರೋನಿಕ್ ವ್ಹಾಜಂತ್ರಾಂಚೆ
ಪೂತ್ ಮ್ಹಜೊ ಬುತಾಂವ್ ದಾಂಬ್ತಾ
ಖಂಯ್‌ಗಾ ಧಾಂವ್, ಖಂಯ್‌ಗಾ ಧಾಂವ್
ಪ್ರಗತ್ ಆಸಾ ಕಿತ್ಲಿ ದೂರ್?
ಸುಶೆಗಾದೆ ಆಶೆಕ್ ಮ್ಹಜ್ಯಾ
ಅಸ್ಲಿ ಧಾಂವ್ ಕಿತ್ಲಿ ಕ್ರೂರ್?
ವ್ಹಾಳಾಕ್ ಫಳೆಂ ಆನಾನ್ ಲಾಯ್ಲೆಂ
ಹಾಂವೆಂ ನಂಯ್ಚೆರ್ ಪೂಲ್ ಘಾಲೊ
ಪೂತ್ ಮ್ಹಜೊ ಸಗ್ಳ್ಯಾ ದರ್ಯಾಕ್
ಸಾಂಕವ್ ಬಾಂದುಂಕ್ ಆತ್ತಾಂಚ್ ಗೆಲೊ
-ಚಾ.ಫ್ರಾ. ದೆ’ಕೊಸ್ತಾ