ಕವಿತಾ:
ನ್ಹಾಣಿ
ತೆಂಡ್ಲ್ಯಾ ಮಾಟ್ವಾ ಮುಳಾ
ನ್ಹಾಣಿ ಏಕ್ ಘಾಲ್ಯಾ
ಬಾಬಾ ಕಡೆನ್ ವಿಚಾರ್ಲೆಂ
‘ಹಾಂವೆಂ ನ್ಹಯ್’ ನೆಗಾರ್ಲೆಂ
ಆಬಾ ಕಾಳಾ ಥಾವ್ನ್ ಆಸಾ
ಥಯಿಂಚ್ ನ್ಹಾಂವ್ಕ್ ಆಮ್ಕಾಂ ಆಶಾ.
ವಿಶಾಲ್ ತಿ ನ್ಹಾಣಿ
ನಾ ವೊಣೊದ್, ನಾ ಬಾಗಿಲ್
ಆಸಾ ಪಾಕೆಂ, ಮೊಳ್ಬಾ ಸಾರ್ಕೆಂ
ನ್ಹಾತಾನಾ ಕಸ್ಲೇಂಯ್ ಗಣ್ಣೆ ನಾ
ಕೊಣೀ ಪಳೆತಾತ್ ತಿ ಭಿರಾಂತ್ ನಾ
ವೀಜ್ ದಿವ್ಯಾಚಿ, ಚಿಮ್ಣಿ ಉಜ್ವಾಡಾಚಿ
ತಾರಾಂ ಜಿಳ್ಮಿಳ್ತಾನಾ ಗರ್ಜ್ ನಾ.
ಸಕ್ಟಾಂಕ್ ಆಸಾ ಅಮಾನತ್ ಜಾಗೊ
ವಸ್ತುರಾಂ ಸುಕೊಂವ್ಕ್, ಸಾಬು ಚೆಪುಂಕ್
ಭುರ್ಗ್ಯಾಂಕ್ ಆಸಾ ವ್ಹರ್ತೊ ಫಾಯ್ದೊ
ಚೊರ್ಲಲೆಂ ಗೋಡ್ ಖಾಂವ್ಚೊ ಜಾಗೊ.
ರಾಯಾನ್ ‘ಯೆತಾಂ’ ಮ್ಹಳಾಂ,
ದೋನ್ ವರ್ಸಾಕ್ ಏಕ್ ಪಾವ್ಟಿಂ!
ಆಬಾಚಿ ನ್ಹಾಣಿ ಸಾರ್ಕಿ ನಾ!
ಸಾರ್ಕಿ ವೊಣೊದ್ ನಾ, ಸಾರ್ಕೆಂ ಬಾಗಿಲ್ ನಾ,
ಪಾಕೆಂ ತಾಚ್ಯಾ ಫುಡೆಂ ನಾ
ವೀಜ್ ದಿವೊ ನಾ, ಸಾರ್ಕೆಂ ದಿಸನಾ
ವಸ್ತುರಾಂ ಸುಕೊಂವ್ಕ್ ಜಾಯ್ನಾ
ಸಾಬು ಹಾತಾಕ್ ಮೆಳನಾ!
ನವಿ ನ್ಹಾಣಿ ಬಾಂದುಂಕ್ ಆಸಾ,
ನಿರ್ಧಾರ್ ತುರ್ತಾನ್ ಘೆಂವ್ಕ್ ಜಾತಾ,
ಪಯ್ಶೆ ದಿಂವ್ಚೊ ಪೊದೊರ್ನ್ ಆಸಾ,
ತಾಕಾ ಕಿತ್ಯಾಕ್‍ಗಿ ನ್ಹಾಣ್ಯೆಚಿ ಆಶಾ,
ತಾಚೆಂ ನಾಂವ್ ಅಮರ್ ಜಾತಾ.
ನವೆ ನ್ಹಾಣ್ಯೆಂತ್ ರಾಯ್ ನ್ಹಾತಾ,
ನ್ಹಾಣ್ಯ್ಚೆಚೆಂ ಉದ್ಘಾಟನ್ ಜಾತಾ
ಪಯ್ಶೆ ದಿಲ್ಲೊ ಪೊದೊರ್ನ್
ಸಂತೊಸ್ ಸಾಗೊರಾಂತ್ ಉಪ್ಯೆತಾ
ಮ್ಹಾಕಾ ನವೆ ನ್ಹಾಣ್ಯೆಂತ್ ನ್ಹಾಂವ್ಚಿ ಆಶಾ
ತಿ ನ್ಹಾಣಿ ಘರಾ ಭಿತರಚ್ ಆಸಾ
ಪುಣ್ ಬಾಗ್ಲಾಕ್ ಥಾಲೆಂ ಉಮ್ಕಳ್ತಾ
ರಾಯಾಚ್ಯಾ ಯೆಣ್ಯಾಕ್ ರಾಕೊನ್ ರಾವ್ತಾ.
-ವಿನ್ಸಿ ಪಾಂಬೂರ್