ಸಂಪಾದಕೀಯ್:
ಆಮಿ ನಶಿಬ್‌ವಂತ್, ಆಮಿ ಪುನೆವಂತ್!
ಕೊಣ್ ಹಿ ಕವಿತಾ ಮೊಗಾಂತ್ ಹಾತ್ ಹುಲ್ಪಾವ್ನ್ ಘೆತ್‌ಲ್ಲ್ಯಾಚೆ ಕಳ್ವಳೆ ವೆಕ್ತ್ ಕರ್‍ತಾ ಮ್ಹಣತ್ ತರ್ ಆನಿ ಕೊಣಾಕ್ ನಿರ್ಭಾಗಿ ಜಿವಿತಾಂತ್ಲ್ಯೊ ವೆವೆಗ್ಳ್ಯೊ ಇಮಾಜಿ ಹೆ ಕವಿತೆಂತ್ ಜಿವ್ಯೊ ಜಿವ್ಯೊ ದಿಸೊಂಕ್ ಪುರೊ. ಹೆಂ ಕವಿತೆಚೆಂ ಲಕ್ಷಣ್. ಕವಿ ಆಪ್ಲ್ಯಾ ಭೊಗ್ಣಾಂಕ್ ಉತ್ರಾಂಚೆಂ ರೂಪ್ ದಿತಾನಾ ಏಕ್ ಪಿಂತುರ್ ತಾಚೆ ಮತಿಂತ್ಲ್ಯಾನ್ ಪಾಶಾರ್ ಜಾಲ್ಲೆಂ ಆಸ್ತಾ ತರೀ, ವಾಚ್ತಲೊ ಹೆಂ ಪಿಂತುರ್ ತಾಚ್ಯಾ ಕಾಳ್ಜಾಂತ್ ಫಿಛಾರ್ ಕರ್‍ತಾನಾ ತಾಚ್ಯಾ ಅನ್ಭೋಗಾಚ್ಯಾ ಗಾಣ್ಯಾಂತ್ಲ್ಯಾನ್ ತೆಂ ಪಾಶಾರ್ ಕರಯ್ತಾ ಜಾಲ್ಲ್ಯಾನ್ ತಾಕಾ ತಾಚ್ಯಾ ಅನ್ಭೋಗಾತೆಕಿದ್ ವೊಳ್ಕಿಚ್ಯೊ ಪ್ರತಿಮಾ ಝಳ್ಕೆಕ್ ಯೇಂವ್ಕ್ ಪುರೊ. ತ್ಯಾಖಾತೀರ್ ಸಾಹಿತ್ಯಾಚ್ಯಾ ಹರ್‍ಯೆಕ್ ಪ್ರಾಕಾರಾಂ ಮಧೆಂ ಕವಿತಾ ಚಡ್ ಕಾಳ್ ಕಾಳ್ಜಾಮನಾಕ್ ವೆಡ್ಕೊಳ್ ಮಾರ್‍ನ್ ರಾವ್ತಾ.
ಕವಿ ಜೆರಿ ಡಿ'ಮೆಲ್ಲೊ ಹೆ ಕವಿತೆದ್ವಾರಿಂ ಆಪ್ಲೆ ಕವಿತೆಚಿ ಪ್ರತಿಭಾ ಗಾಜಂವ್ಚ್ಯಾಂತ್ ಯಶಸ್ವಿ ಜಾಲಾ ಮ್ಹಣ್ಚ್ಯಾಂತ್ ಕುಸ್ಕುಟ್ ದುಭಾವ್ ಮ್ಹಾಕಾ ಉರೊಂಕ್ ನಾ. ದುಸ್ರೆ ಪಾವ್ಟಿಂ ಹೊ ಕವಿ 'ಕವಿತಾ ಕುಳಾರ್' ಸಜಂವ್ಕ್ ಆಯ್ಲಾ. ಸ್ವತಾ ಗೀತ್‌ಕಾರ್ ಜಾವ್ನಾಸ್ಚ್ಯಾ ಜೆರಿ ಡಿ'ಮೆಲ್ಲೊ ಥಾವ್ನ್ ಫುಡಾರಾಂತ್‌ಯ್ ಅಸಲಿಚ್ ಗೊಡ್ ಕವಿತಾ ಝರ್ ಆಮ್ಕಾಂ ಲಾಬ್ತಲಿ ಮ್ಹಳ್ಳೊ ಭರ್‍ವಸೊ ಆಮ್ಕಾಂ ಆಸಾ. ಆಮಿ ನಶಿಬ್‌ವಂತ್, ಆಮಿ ಪುನೆವಂತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಚುರ್ಚುರೆ
ಉತ್ರಾಲೆ ತರೀ ಚಾಳೀಸ್ ಪಾವ್ಸಾಳ್
ಥಂಡಾಯ್ ತುಜಿ ಮ್ಹಾಕಾ ಲಾಗ್ಲಿ ನಾ
ಪಾಶಾರ್ ಜಾಲೆ ತರೀ ಖರ್‍ಕಟೆ ಗಿಮಾಳ್
ಊಬ್ ತುಜಿ ಮ್ಹಜೆ ಕುಡಿಕ್ ಗಮ್ಲಿನಾ
ಖಂಯ್ ಆಸ್ಲಿ ತುಜಿ ಉದ್ಕಾ ಝರ್?
ಥೆಂಬೊ ಉದ್ಕಾಕ್ ಹಾಂವ್ ಆಂವ್ಡೆತಾನಾ
ಆತಾಂ ಕಳ್ಸೊ ಉದ್ಕಾಚಿ ಕೊಣಾಕ್ ಗರ್‍ಜ್?
ಭರ್‍ತಿ ನಂಯ್ ಬಗ್ಲೆಕ್ ವ್ಹಾಳ್ತಾನಾ!
ಪರ್‍ಮಳಿಕ್ ಫುಲ್ ಜಾವ್ನಾಸಾಯ್ ತರೀ
ಪರ್‍ಮಳ್ ನಾಕಾಕ್ ಮ್ಹಜ್ಯಾ ಆಪ್ಟಲೊನಾ
ಪರ್‍ಜಳಿಕ್ ಮೊತಿಂ ತುಂ ತರೀ
ದೊಳ್ಯಾಂಕ್ ಕಿತ್ಯಾ ಮ್ಹಜ್ಯಾ ದಿಸ್ಲೆಂನಾ?
ಗೊಡ್ ಉದ್ಕಾ ಝರ್ ತುಂ
ತಾನ್ ಮ್ಹಜಿ ಭಾಗಂವ್ಕ್ ಸಕ್ಲಿನಾ
ವ್ಹಡ್ ವಡಾ ರೂಕ್ ತುಂ
ಸಾವೊಟ್ ಮ್ಹಾಕಾ ಜಾಂವ್ಕ್ ಪಾವ್ಲೊನಾ
ನಶಿಬ್‌ವಂತ್ ಜಾಲೆ ತಾನೆಲಿ ತೆ
ಝರಿನ್ ತುಜೆ ಸದಾಂ ನ್ಹಾಂವ್ಚೆ
ಪುನೆವಂತ್ ಬಾವ್ಡೆ ವಾಟ್ಸುರಿ ತೆ
ಸಾವ್ಳೆಕ್ ತುಜೆ ವಿಶೆವ್ ಘೆಂವ್ಚೆ
-ಜೆರಿ ಡಿ'ಮೆಲ್ಲೊ, ಬೆಂದುರ್