ಸಂಪಾದಕೀಯ್:
ಕವಿತಾಚಿ ಕವಿತಾ ತಾಕತ್ ಪಯ್ಲೆಂ ಇನಾಮ್ ಜೊಡ್ತಾ
2010 ವರ್ಸಾ ಕವಿತಾ ಟ್ರಸ್ಟಾನ್ ಚಲಯಿಲ್ಲ್ಯಾ ಅಖಿಲ್ ಭಾರತ್ ಭುರ್ಗ್ಯಾಂಚ್ಯಾ ಕವಿತಾ ಸರ್ತಿಂತ್ ಪಯ್ಲೆಂ ಇನಾಮ್ ಫಾವೊ ಜಾಲ್ಲಿ ಕವಿತಾ ಹಾಂಗಾಸರ್ ದಿಲ್ಯಾ. ಗೊಂಯ್ಚ್ಯಾ ಫೊಂಡ್ಯಾಂತ್ಲ್ಯಾ ದಯಾನಂದ್ ಹೈಸ್ಕೂಲ್ ಹಾಂಗಾಸರ್ ಧಾವೆ ಕ್ಲಾಶಿಂತ್ ಶಿಕ್ಚ್ಯಾ ಕವಿತಾ ಫೊಂಡೆಕಾರಾನ್ ಹೆ ಸರ್ತಿಂತ್ ಭಾಗ್ ಘೆಂವ್ಚೆಂ ದುಸ್ರೆಂ ಪಾವ್ಟಿಂ. ಪಯ್ಲೆ ಪಾವ್ಟಿಂ ಭಾಗ್ ಘೆತಲ್ಲ್ಯಾ ವೆಳಾರ್ ತಾಕಾ ದುಸ್ರೆಂ ಇನಾಮ್ ಫಾವೊ ಜಾಲ್ಲೆಂ. ಆನಿ ಹ್ಯಾ ಪಾವ್ಟಿಂ ಪಯ್ಲೆಂ ಇನಾಮ್.
ಕಾಂಯ್ ತಿನ್ಶಾಂ ಲಾಗಿಂ ಕವಿತಾ ಆಯ್ಲ್ಯೊ ತರೀ ತಾಂತ್ಲ್ಯಾನ್ ಕವಿತಾಚಿಚ್ ಕವಿತಾ ದೋನ್ ಪಾವ್ಟಿಂ ವಿಂಚುನ್ ಆಯ್ಲ್ಯಾ ತರ್ ಹೆ ಚಲಿಯೆಚೆಂ ಕಾವ್ಯ ಮನ್ ಕಶೆಂ ಕಾಮ್ ಕರ್‍ತಾ ಮ್ಹಳ್ಳೆಂ ತುಮಿಂಚ್ ಪಾರ್ಕಿಜಾಯ್.
ಕವಿತಾಕ್ ಕವಿತಾ ಶೆತಾಂತ್ ಬರೊ ಫುಡಾರ್ ಆಸಾ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಡ್‌ಬಿಂಬ್
ರಾತ್ ಜಾಲಿ ಮ್ಹಣ್
ದೀಸ್ ಕೆನ್ನಾಂಚ್ ಉದಾಸ್ ಜಾಯ್ನಾ
ಯೆತಲಿ ಫಾಲ್ಯಾಂ ಸಕಾಳ್ ಹ್ಯಾ ಆಶೆನ್
ಆಯ್ಜ್ ಆಪುಣ್ ಪಾನಾಂ ವಿರಯ್ಟ್ ಆಸಾಂ
ಮ್ಹಣ್ ಝಾಡ್ ಕೆನ್ನಾಂಚ್ ರಡ್ಚೆಂನಾ
ತಯಾರ್ ಆಸ್ತಾ ತೆಂ ವಸಂತ್ ಋತುಚ್ಯಾ ಯೆವ್ಕಾರಾಕ್
ಆಯ್ಜ್ ಪಡ್ಲಾ ದುಕಳ್
ಮ್ಹಣ್ ಜಮೀನ್ ತಳ್ಮಳತ್ ರಾವ್ಚಿನಾ
ಆಸ್ ಧರುನ್ ರಾವ್ತಾ ತಿ ಕಾಳ್ಯಾ ಕುಪಾಂಚಿ
ಕುಸ್ಕರುನ್ ಮುಸ್ಕರುನ್ ಪಡ್ಲೊ ಘೊಂಟೆರ್
ಮ್ಹಣ್ ಸವ್ಣಿಂ ಆಪ್ಲೊ ಧರ್ಮ್ ವಿಸರ್‍ನಾಂತ್
ತರೀಯ್ ತಿ ಕರೀತ್ ರಾವ್ತಾ ಆಪ್ಲೆಂ ಕರ್ಮ್ ನವ್ಯಾ ಆಶೆನ್
ಫಟಯ್ಲಾಂ ದುಸ್ರ್ಯಾನ್ ಮ್ಹಣ್ ರಡ್ಚೆಂ ನ್ಹಯ್
ಸ್ವತಾಕ್ ಸಾವರೂನ್ ಧರಪ್ ಹೊಚ್ ಖರೊ ಧರ್ಮ್
ಕಿತ್ಯಾಕ್ ತರ್ ಜೀಣ್ ಜಾವ್ನ್ ಆಸಾ ಏಕ್ ಪಡ್‌ಬಿಂಬ್
ಆಪ್ಲೆಂಚ್ ಪಡ್‌ಬಿಂಬ್ ಪಳೊಂವ್ಕ್
ಜಿಣೆಕ್ ದಿಕಾ ದೀವ್ನ್
ಜಿವಿತ್ ಜಗತ್ ರಾವ್, ಜಗತ್ ರಾವ್, ಜಗತ್ ರಾವ್
-ಕವಿತಾ ಫೊಂಡೆಕಾರ್