ಸಂಪಾದಕೀಯ್:
ಆಪ್ಣಾಂವ್ಕ್ ವಚೊನ್ ಆಪ್ಣಾಕಚ್ ಹೊಗ್ಡಾವ್ನ್ ಘೆಂವ್ಚೊ ಮನೀಸ್!
ಹರ‍್ಯೆಕಾ ಮನ್ಶಾಕ್ ಜಿಣ್ಯೆಚ್ಯಾ ಎಕೆ ಸಂಧಿಗ್ದ್ ಪರಿಗತೆಂತ್, ಜಿಣ್ಯೆಚೊ ಅರ್ಥ್ ಸುಟಯ್ಜಾಯ್ ಭೊಗ್ತಾನಾ, ಆಪ್ಲಿಂ ಪಾಳಾಂ-ಮುಳಾಂ ಸಮ್ಜಜಾಯ್ ಆಶೆತಾನಾ, ಸೊಧ್ ಮಾತ್ರ್ ಏಕ್ ಹಾತೆರ್ ಜಾವ್ನ್ ಉರ‍್ತಾ.
ಹಾಂಗಾಚ್ಯಾ ಕವಿಕ್ ಸೈತ್ ಹೆಂಚ್ ಜಾಲಾಂ. ತೊ ಸೊಧುಂಕ್ ಭಾಯ್ರ್ ಸರ‍್ಲಾ - ಆಪ್ಲ್ಯಾಚ್ ಜಿವಿತಾಚೊ ಅರ್ಥ್; ಆಪ್ಲ್ಯಾ ಮ್ಹಾಲ್ಗಡ್ಯಾಂಚೊ ಪರ್ಮಳ್; ತಾಂಚ್ಯಾ ಜಿವಿತಾಚಿ ಸಾವ್ಳಿ, ತಾಂಚೆ ಉಮಾಳೆ ಅತ್ರೆಗ್; ತಾಂಣಿ ರುತಾ ಕೆಲ್ಲೊ (?) ಮೋಗ್-ಮೈಪಾಸ್. ಪುಣ್ ವಿಪರ‍್ಯಾಸ್ ಕಿತೆಂಕಿ ಮ್ಹಳ್ಯಾರ್ ಸರೊನ್ ಗೆಲ್ಲ್ಯಾ ಕಾಳಾಂತ್ ಕೊಣ್ ಕೊಣಾಕಚ್ ವೊಳ್ಕನಾ ಜಾಲಾ.
ಅಸಲ್ಯಾ ಎಕಾ ಪೊಂತಾಕ್ ಪಾವ್ತಾನಾ ಕಿತೇಂಯ್ ನಾಕಾ ಜಾತಾ. ಸಗ್ಳೆಂ ಗುಸ್ಪಾ-ಗೊಂದೊಳಾಚೆಂ ಜಾತಾ. ಸಗ್ಳ್ಯಾ ಜಿವಾಕ್ ಪಿಶೆಂ ಮ್ಹಳ್ಳೆಂ ತೆಂ ಪಾಂಗ್ರುಂಕ್ ಯೆತಾ. ಸೊಧ್ ಕರುಂಕ್ ಗೆಲ್ಲೊ ಮನೀಸ್ ಕಿತೇಂಯ್ ಆಪ್ಣಾಂವ್ಚ್ಯಾ ಬದ್ಲಾ, ಆಪ್ಣಾಕಚ್ ಹೊಗ್ಡಾವ್ನ್ ಯೆತಾ. ಕಸಲಿ ಏಕ್ ದುರ್ದಶಾ ಮ್ಹಣ್ಚೆಂ ಹಾಕಾ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಏಕ ಸೋಧ್
ಸೊಧೂನ ಗೆಲ್ಲೋ ಹಾಂವ್
ತ್ಯೆ ಮಾತ್ಯೇಂತ ಮ್ಹಜ್ಯಾ ಮ್ಹಾಲಗಡೇಂಚೋ ಪರಮಳ್
ಥಂಯಚೆ ಉತರಾಂತ ತಾಂಚೆ ಜಿಣೇಯೇಚಿ ಸಾವಳಿ
ಇಮಾರತೇಂತ ದೆವಳಾಂತ ತಾಂಚೆ ಭೊಗಣೆ
ಆನಿ ಮನಶಾ ಮಧೇ ಏಕ ಭಾವಂಡಪಣಾಚೊ ಮಾಯಪಾಸ್
ಮಾತ್ಯೇಂತ ಮೆಳೊ ಮಾಕಾ ಪರಮಳ
ಪುಣ ಮ್ಹಜೆ ನಾಕ ನೆಣಾ ಮ್ಹಾಲಗಡೇಂಚಿ ವ್ಹಳಖ
ಉತರಾಂತ ಮೆಳೆ ಏಕ ಸಂಕೀರ್ಣ ಜಿಣೆಯೇಚೆ ಸಾವಳಿ
ಹಾಂವ ಕಿತೆ ಜಾಣಾ ತೀ ಕೋಣಾಚಿ
ದೆವಳಾಂತ ದಿಸಲೆ ಖೂಬ ಭೊಗಣೆ
ಪುಣ ತೇ ಮ್ಹಜೆ ಮ್ಹಾಲಗಡ್ಯಾಂಚೆ ನ್ಹಯ
ಮಾಕಾ ವಾಯಟ ದಿಸಲೆ
ತೀ ಮಾತೀ ಮಾಕಾ ವ್ಹಳಖನಾ
ತಿಂ ಉತರಾಂ ಮಾಕಾ ಸಮಜನಾ
ಆನಿ ಮನಿಶ ವಿಚಾರತಾ ಮಾಕಾ
ತೂ ಕೋಣ
ಪರತ್ ಯೆತನಾ
ಹಾಂವ ಚಾಳೀಸ ವರಸಾಂ ವ್ಹಾಡೀಲೀ ಭೂಂಯ
ಮಾಕಾ ಪರಕಿ ದಿಸಲೀ
ಮಾಕಾ ಪರಸೂನ ಘೊಳತಲ್ಯೋ ತ್ಯೋ ಭಾಸ
ಮಾಕಾ ವಿಸರಿಲ್ಯೋ
ಮ್ಹಜೆ ಘರ, ದೆವಳಾಂ,
ಮಾಕಾ ದಿಸಲೆ ತೇ ಮ್ಹಜೆ ನ್ಹಯ್
ಸೊಧೂನ ಗೆಲ್ಲೋ ಹಾಂವ್
ಪುಣ ಆಖೇರೇಕ ಹಾಂವಚ್ ವ್ಹಡಗೂನ ಗೆಲ್ಲೋ
- ಗುರು ಬಾಳಿಗಾ