ಕವಿತಾ:
ಆವಯ್
ತುಜ್ಯಾ ದಿಸಾಕ್ ವೊರಾಂ ಕಿತ್ಲಿಂ?
ಚೊವೀಸ್ ಯಾ ಆಟೆಚಾಳೀಸ್?
ತುಂ ಉಟ್ತಾನಾ ಸುರ್ಯೊ ಆಸನಾ
ತುಂ ನಿದ್ತಾನಾಂಯ್ ತೊ ದೊಳ್ಯಾಂಕ್ ದಿಸನಾ
ಹರ್‍ಯೆಕಾ ಕಾಮಾಕ್ ಆಸಾ ಮಜೂರಿ
ತುಜ್ಯಾ ವಾವ್ರಾಕ್ ಕಿತೆಂ ಆಸಾ?
ಕಡಿ ಪಾತಳ್, ಚಾಪ್ಪೆ -ದುರ್‍ಸಲ್ಯಾರೀ
ತುಂವೆಂ ದುಕಿನ್ ಕಿತೇಂಯ್ ಸಾಂಗ್ಲಲೆಂ ಆಸಾ?
ತಾಪ್ ಯೆತಾನಾ ಉದಕ್ ದಿತಾಯ್
ಪೊಟ್ ಪಾಡ್ ಜಾತಾನಾ ಕಸಾಯ್
ರಾತ್ ದೀಸ್ ಏಕ್ ಕರುನ್
ಆಮ್ಚೆಂ ಸುಖ್‌ಚ್ ತುಜಿ ಪಿಸಾಯ್
ಮ್ಹಜ್ಯಾ ಹಾತಾಕ್ ಮೊಲಾಧಿಕ್ ಘಡಿಯಾಳ್
ವೊರಾಂ ಪಳೆವ್ನ್ ಕಾಮಾಕ್ ವೆತಾಂ
ಹಾತ್ ಭರ್ ಪಗಾರ್ ಘೆತಾಂ
ಉಣೊ ಜಾಲ್ಯಾರ್ ಪುರ್ಪುರ್‍ತಾಂ
ಸುಖ್ ಸಂತೊಸ್ ಗೆಲಾ ಲಿಂಬಾಂತ್
ಭುರ್‍ಗ್ಯಾಚೆ ಪಿಡೆಂತ್ ಯೆತಾ ರಾಗ್
ಪುರಾಸಾಣ್, ಅಸ್ಕತ್ಕಾಯ್ ದಿತಾ ಕಾಳ್ಕಾಯ್
ಸುಖಾಳ್ ನೀದ್ ಲೆಗುನ್ ಮ್ಹಾರ್ಗಾಯ್
ತುಜೆಂ ಪಾಯ್ನೆಲ್ ಆಸಾ ಮೆಜಾರ್
ಹಾಸೊ ತುಜೊ ಶಿಕಯ್ತಾ ಲಿಸಾಂವ್
ಘಡಿಯಾಳಾ ಕಾಂಟೊ ಸಲ್ವಲಾ ಮ್ಹಜೊ
ಮೋಗ್ ಮೆಜುಂಕ್ ಮಾಂಯ್ ತುಜೊ
ಪೆಟಯ್ಲಲೊ ತುಂವೆಂ ಮೊಗಾ-ಉಜೊ
ಆಸೊಂ ಜಿವೊ ಸದಾಂಕಾಳ್
ದುಕಾಂ ದೆಂವೊವ್ನ್ ಘೆತಾಂ ಉಮೊ
ಮಾಂಯ್ ತುಂ ಮ್ಹಜಿ ಮೊಗಾಳ್
- ಜೆಮ್ಮಾ ಪಡೀಲ್