ಸಂಪಾದಕೀಯ್:
ಹೆ ಪೊಸ್ಕಾಟೆ ಫಿತಿಸ್ಪಣಾಚೆ!
ಫಿತಿಸ್ಪಣಾಚೆ ಪೊಸ್ಕಾಟೆ ಖಂಯ್ಚ್ಯಾ ವೆಳಾ ಫುಟ್ತಿತ್ ಆನಿ ಮನ್ಶಾ ಜಿವಾಕ್ ಸಂಚಿಕಾರ್ ಹಾಡ್ತಿತ್ ಮ್ಹಳ್ಳೆಂ ಸಾಂಗೊಂಕ್ ಕಷ್ಟ್! ಫಿತಿಸ್ಪಣಾವರ್ವಿಂ ಕಷ್ಟ್ ಆನಿ ನಷ್ಟ್‌ಚ್ ಸೊಡ್ಲ್ಯಾರ್ ಕಾಂಯ್ ಕೊಣೆ ಆದಾಯ್ ಜೊಡ್ಲ್ಯಾರಿ ತೆ ಬರ್ಕತಾಯೆಚೆಂ ಜಿಣೆಂ ಜಿಯೆಲ್ಯಾತ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಫಿತಿಸ್ಪಣ್ ಏಕ್ ಮಾರೆಕಾರ್ ಪಿಡಾ. ಆಜೂನ್ ಆಮ್ಚ್ಯಾ ಶಿಕ್ಪಿ ಸಂಸಾರಾಂತ್ ಏಯ್ಡ್ಸಾಬರಿ ವಿಸ್ತಾರ್‍ಲ್ಯಾ.
ಹೆ ಪಿಡೆಚಿ ಏಕ್ ಝಳಕ್ ಆಪುರ್ಬಾಯೆಚ್ಯಾ ಉತ್ರಾಂನಿ ಕವಯಿತ್ರಿ ನಿರ್ಮಲ ಗೋವಿಯಸಾನ್ ಹಾಂಗಾಸರ್ ಕವಿತಾರುಪಿಂ ಸಾದರ್ ಕೆಲ್ಯಾ. ನಿಮಾಣೆ ಜಿ ಚೆತಾವ್ಣಿ ತಿ ದಿತಾ, ತಾಂತುಂ ಕವಿ ಜಾವ್ನ್ ತಿಚಿ ಜವಾಬ್ದಾರಿ ತಿಣೆ ಸಾಂಬಾಳ್ಳ್ಯಾ.
ಕವಯಿತ್ರಿ ನಿರ್ಮಲ ಗೋವಿಯಸ್ ದುಸ್ರೆಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲ್ಯಾ. ಕವಿತೆಥಂಯ್ ತಿಕಾ ಆಸ್ಚ್ಯಾ ಮೊಗಾವರ್‍ವಿಂ ಸದಾಂನೀತ್ ತಿ ಹ್ಯಾ ಕುಳಾರಾ ಭೊಂವ್ತಿಂ ಪಾಸಾಯೊ ಮಾರೀತ್ ಆಸ್ತಾ. ಕಾಂಯ್ ಫುಡಾರಾಂತ್ ಭಿತರ್‍ಲೊ ಜಾಗೊ ತಿಕಾ ಕಾಯಾಮ್ ಜಾಲ್ಯಾರಿ ಜಾಲೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫಿತಿಸ್ಪಣಾಂ
ಗಾಯ್ತಾತ್ ಮನಾಂ, ಫಿತಿಸ್ಪಣಾಂ
ಆಮ್ಚೆ ಸಮಾಜೆಚಿಂ ಚಾಲ್ತಿಂ ಗಾಣಾಂ
ಲೊಕಾ ಪಿರ್‍ಲುಕ್ ಫಿತಿಸ್ಪಣಾಂ ವ್ಹಾಜ್ತಾ
ಶಿಕ್ಪಿ ಮನೀಸ್ ಮೊನ್ಜಾತಿಬರಿ ನಾಚ್ತಾ
ಉಜ್ವೊ ದೊಳೊ ಉಡ್ಲ್ಯಾರ್ ಜಾಲೆಂ
ಖುಶಾಲ್‌ಕಾಯೆ ಖಬರ್ ಯೆತಾ
ದೊಳೊ ಉಡ್ಲ್ಯಾರ್ ಮೊಗಾಚಿಂ ಭೆಟ್ತಾತ್
ಕಸಲಿ ವಾಳಯ್ ಲೊಕಾಕ್ ಖಾತಾ?
ಕಾವ್ಳೊ ರಡ್ಲ್ಯಾರ್ ಸೈರಿಂ ಯೆತಿತ್
ಕುಂಕಡ್ ಕಾಂಯ್ ಕಾತ್ರಿಜೆ ಪಡತ್
ಗಲ್ಫಾಥಾವ್ನ್ ದೆಂವ್ಲಿಂ ಜಾಲ್ಯಾರ್
ಇನಾಮಾಂಚಿ ರಾಸ್ ಪಡತ್!
ಫೆಡ್ಡಿ ಸಕಾಳಿಂ ಉಟ್ಲ್ಯಾಫಾರಾ
ಮೊಡ್ಲಾಂ ವಯ್ರ್ ದೀಷ್ಟ್ ಲಾಯ್
ದೀಸ್ ತುಜೊ ಪ್ರಕಾಸ್ತಲೊ
ಜಿಣ್ಯೆ ಕಾಳೊಕ್ ನಿತಳ್ತಲೊ
ಮಾಜರ್ ಗೆಲೆಂ ವಾಟ್ ಉತ್ರೊನ್
ಮಾಮ್ ದುಖಿ ಹೆಂ ಪಳೆವ್ನ್
ಆರ್ಸೊ ಫುಟ್ಲೊ ಬಾಂಕಾರ್ ಪಡೊನ್
ಮಾಮಿ ಪಡ್ಲಿ ತಕ್ಲಿ ಘುಂವೊನ್
ರಾತ್ಚೆಂ ಆಂಗ್ಣಾಂತ್ ಪೆಂಪಾರೆಂ ಫುಂಕ್ಲ್ಯಾರ್
ಅನಾಉತ್ ಘಡೊಂಕ್ ಆಸಾ
ಹಿತ್ಲಾಂತ್ಲ್ಯೊ ವಿಕಾಳ್ ಜಿವ್ದಾಳಿ ಪೂರಾ
ಘರಾಂತ್ ರಿಗ್ತಿತ್ ದಿಸಾ
ಧುವೆಕ್ ಸೈರಿಕ್ ಜಾವ್ನಾ ಯೆದೊಳ್
ಕೊಣೆ ತರೀ ಕೆಲಾಂ ಮಾಟ್
ಜಾಂವಂಯ್ ಜರೀ ಬೆಕಾರ್ ಭೊಂವ್ತಾ
ಮಾಂಯ್ನ್ ಮಾಟ್ ಕಾಡ್ಚಿ ಧರ್‍ಲಿ ವಾಟ್
ಗಾಯ್ತಾತ್ ಮನಾಂ ಫಿತಿಸ್ಪಣಾಂ
ಆಮ್ಚೆ ಸಮಾಜೆಚಿಂ ಚಾಲ್ತಿಂ ಗಾಣಾಂ
ಹ್ಯಾಯಿ ಫುಡೆಂ ಅಸಲಿಂ ಗಾಣಾಂ
ಘಾಲಿನಾಕಾತ್ ತುಮ್ಚ್ಯಾ ಕಾನಾ!
-ನಿರ್ಮಲ ಗೋವಿಯಸ್, ಬೆಂದುರ್/ಮಸ್ಕತ್