ಸಂಪಾದಕೀಯ್:
ಕಾಶಿನಾಥಾಚಿ ಹಿಂದಿ ಫಿಲ್ಮ್ ಸ್ಟೈಲಾಚಿ ಕವಿತಾ
ಕಾಶಿನಾಥ್ ಲೊಲಿಯೆಕಾರಾಚ್ಯಾ ಕವಿತಾಂಕ್ ಹಾಂವ್ ಹ್ಯಾ ದಿಸಾಂನಿ ಸಂಪೂರ್ಣ್ ಭುಲ್ಲಾಂ. ನವೋಚ್ ಅನ್ಭೋಗ್ ತ್ಯೊ ಮ್ಹಾಕಾ ದಿತಾತ್. ತಾಚೊ ಹೊ ಪ್ರಯೋಗ್ ಕೊಂಕಣಿಕಚ್ ನ್ಹಯ್ ತರ್, ಆಖ್ಖ್ಯಾ ಕಾವ್ಯ ಸಂಸಾರಾಕ್ ನವೊ ಕಸೊ ದಿಸ್ತಾ ಮ್ಹಾಕಾ. ತೊ ಆಪ್ಲ್ಯಾ ಕವಿತಾಂ ಮಾರಿಫಾತ್ ವಾಚ್ಪ್ಯಾಕ್ ಝಾಂಟಾಂನಿ ಶಿರ್‍ಕಾಯ್ತಾ, ಘುಸ್ಪಡಾಯ್ತಾ, ಅಸ್ವಸ್ಥ್ ಕರ್‍ತಾ.
ತೊ ಮಾನಾ ಪಾಟ್ಲ್ಯಾನ್, ನಾಂವಾ ಪಾಟ್ಲ್ಯಾನ್ ಗೆಲ್ಲೊಚ್ ನ್ಹಯ್. ತ್ಯಾ ಖಾತೀರ್ ತಾಕಾ ಕಸಲ್ಯೋಯ್ ಪ್ರಶಸ್ತ್ಯೊ ಆಯ್ಲ್ಯೊನಾಂತ್. ಆಯ್ಲ್ಯಾರಯ್ ತ್ಯೊ ಘೆಂವ್ಕ್ ತೊ ವಚನಾ. ಕವಿತಾ ಟ್ರಸ್ಟಾನ್, ಅಸಲ್ಯಾ ಎಕಾ ಮಾನಾ ಥಾವ್ನ್ ತಾಣೆಂ ಚುಕ್ಚೆಂ ನ್ಹಯ್ ಮ್ಹಣೊನ್ ಹ್ಯಾ ವರ್ಸಾಚಿ ಪ್ರಶಸ್ತಿ ತಾಕಾ ದಿಲ್ಲಿ. ತಿ ಘೆಂವ್ಕ್ ಸಯ್ತ್ ತೊ ಆಯ್ಲೊನಾ. ಮಾಗೀರ್ ತಾಚ್ಯಾ ಘರಾ ತಿ ಪಾವೊಂವ್ಚಿ ಪಡ್ಲಿ ಆಮ್ಕಾಂ.
ಹಾಂಗಾಸರ್ ತಾಚೆಂ ಗೀತಿಕ್ ದಿಲಾಂ. ತುಮ್ಕಾಂ ರುಚ್ತಲೆಂ ಅಶೆಂ ಆಮ್ಚೊ ಭರ್ವಸೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸೊನೆಟ್: ಹಿಂದಿ ಫಿಲ್ಮ್ ಸ್ಟಾಯ್ಲ್
ಓ ಮಾಂ, ಮ್ಹಾಕಾ ಆನಿ ಎಕ್ದಾಂ ಜಲ್ಮಾಕ್ ಘಾಲ್
ಓ ಪಿತಾಜಿ, ಏಕ್ ತರ್ ತುಂ ಮ್ಹಜೊ ಖೂನ್ ಕರ್
ನಾಲ್ಯಾರ್ ಹಾಂವ್ ತರೀ ತುಜೊ ಖೂನ್ ಕರ್‍ತಾಂ
ಓ ನಾನಿ ಮಾಂ, ತುಂ ಆಜೂನಯ್ ಕಶಿ ಮರನಾ?
ಓ ಬೆಹೆನಾ, ರಾಖಿಕೇ ಬಂಧನ್ ಕೋ ಕ್ಯೋಂ ನಿಭಾನಾ?
ಓ ಭಾಯ್, ಆಮಿ ಶೆಣ್ಲೆ ಎಕಾ ಜಾತ್ರೆಂತ್
ಆರೆ ಭಿಕಾರ್‍ಯಾ, ಮ್ಹಜೆಕಡೆ ಎಕೂಚ್ ನವೊ ಪೈಸೊ ಉಲ್ಲಾ
ಜೊ ಮ್ಹಾಕಾ ವೀಖ್ ಖಾವ್ಪಾಕ್ ಜಾಯ್
ಓ ಇನ್ಸಪೆಕ್ಟರ್ ಸಾಬ್, ಹಾಂವ್ ಆತ್ಮಹತ್ತ್ಯಾ ಕರುಂಕ್ ಸೊದ್ತಾಂ
ಆತ್ತಾಂಚ್ಯಾ ಆತ್ತಾಂ ಮ್ಹಾಕಾ ಎರೆಸ್ಟ್ ಕರುನ್ ಮ್ಹಜೆರ್ ಕೇಜ್ ಘಾಲ್
ಯೇ ಲೊಲಿಯೆಕಾರಾ, ಕಸಲ್ಯೊ ಶೆಂಟಾಂಚ್ಯೊ ಕವಿತಾ ಬರಯ್ತಾಯ್
ಕಾಪಾಜ್‌ದಾದ್ ಆಸ್ಲ್ಯಾರ್ ಮ್ಹಜೆರ್ ಏಕ್ ಮ್ಹಾಕಾವ್ಯ್ ಬರೊವ್ನ್ ದಾಖಯ್
ಓ ಲತಾ, ಮ್ಹಜೆ ಖಾತೀರ್ ಏಕ್ ಲೋರಿ ಮ್ಹಣ್-ಮುಗೊ ಆತಾಂ
ಹಾಂವ್ ಮರ್‍ತಲೊಂ ತೆನ್ನಾಂ ಸಗ್ಳ್ಯಾಂಕ್ ಮ್ಹಜೆ ಪಾಂಯ್ ಪಾಳ್ಣ್ಯಾಂತ್ ದಿಸ್ತಲೆ.
-ಕಾಶೀನಾಥ್ ಶಾಂಭಾ ಲೊಲಿಯೆಕಾರ್