ಸಂಪಾದಕೀಯ್:
ಮುಸ್ಳಾಧಾರಿಂಚ್ಯಾ ಪಾವ್ಸಾಂತ್ ಬುಡೊನ್ ಗೆಲ್ಯಾರಿ, ವ್ಹಾಳೊನ್ ವಚನಾ ಜಾಂವ್ಚೆಂ!
ಕೊಂಕಣಿಂತ್ ‘ಫ್ರೀವರ್ಸ್’ ಕವಿತಾ ಪಯ್ಲ್ಯಾನ್ ಪಯ್ಲೆಂ ಬರೊಂವ್ಕ್ ಸುರು ಕೆಲ್ಲ್ಯಾ ಕವಿಂ ಪಯ್ಕಿ ಶಂಕರ್ ರಾಮಾಣಿ ಎಕ್ಲೊ. ತ್ಯಾ ದೆಕುನ್ ಪ್ರಾಸಾಂತ್ ಮೊಳುನ್ ಗೆಲ್ಲ್ಯಾ ಸಂಪ್ರದಾಯ್‌ವಾದಿ ಕವಿಂನಿ ತಾಕಾ ಬಿಲ್ಕುಲ್ ಲಾಗಿಂ ಕೆಲ್ಲೊ ನಾ. ‘ಹಾಚಿ ಖಂಯ್ಚ್ಯಾ ನಮುನ್ಯಾಚಿ ಕವಿತಾ? ತಿಕಾ ಹಾಂವ್ ಕವಿತಾ ಮ್ಹಣನಾ’ ಮ್ಹಣೊನ್ ಜಾಯ್ತ್ಯಾ ಜಣಾಂನಿ ಎಕಾ ತೆಂಪಾರ್ ತಾಚಿಂ ಖೆಳ್ಕುಳಾಂ ಕೆಲ್ಲಿಂ ಗೊಂಯಾಂತ್ ಹಾಂವೆಂ ಆಯ್ಕಲ್ಯಾಂತ್.
ತರೀ ನಿಮಾಣೆಂ ತಾಕಾ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಫಾವೊ ಜಾಲಿಚ್. ದುರಾದೃಷ್ಟಾನ್ ತಾಚ್ಯೊ ಕವಿತಾ ಯೆದೊಳ್ ಆಮಿ ಪರ್ಗಟ್ ಕರುಂಕ್ ನಾತಲ್ಲ್ಯೊ. ಪಯ್ಲೆ ಪಾವ್ಟಿಂ ತಾಚಿ ಏಕ್ ಕವಿತಾ ಬಾಕಿಬಾಬ್ ಬೋರ್ಕರಾನ್ ಸಂಪಾದಿತ್ ಕೆಲ್ಲ್ಯಾ ‘ಕೊಂಕಣಿ ಕಾವ್ಯಸಂಗ್ರಹ್’ ಪುಸ್ತಕಾಂತ್ಲಿ ಆಮಿ ವಿಂಚುನ್ ಹಾಂಗಾಸರ್ ಪರ್ಗಟ್ ಕರ್‍ತಾಂವ್.
ಹಾಂಗಾಸರ್ ಮುಸ್ಳಾಧಾರಿಂಚ್ಯಾ ಪಾವ್ಸಾಂತ್ ಹೆ ಕವಿತೆಂತ್ಲೊ ವ್ಯಕ್ತಿ ಬುಡೊನ್ ಗೆಲಾ. ತರೀ ತೊ ನಿರ್ಶೆನಾ. ತಾಚೆಂ ಸದಾಂಚೆಂ ಕಾಮ್ ತೊ ಕರೀತ್ ಆಸಾ - ಏಕ್ ಆಶಾವಾದ್ ಘೆವ್ನ್. ಕವಿನ್ ಪಾವ್ಸ್ ಏಕ್ ರೂಪಕ್ ಜಾವ್ನ್ ಘೆವ್ನ್ ಜಿವಿತಾಚಿ ಏಕ್ ಮಾರ್ಮಿಕ್ ಗಜಾಲ್ - ಬರ್‍ಯಾ ವಾಯ್ಟ್ ರುಪಾಂಚಿ - ಹಾಂಗಾಸರ್ ಸಾಂಗ್ಲ್ಯಾ ಮ್ಹಣೊನ್ ಆಮಿ ಸಮ್ಜಲ್ಯಾಂವ್ ಜಾಲ್ಯಾರ್ ಹಿ ಕವಿತಾ ಆಮ್ಕಾಂ ಪೊಟ್ಲುನ್ ಧರ್‍ತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಉಟಂಗಾರಾಚ್ಯಾ ಪಾವ್ಸಾಂತ್
ಉಟಂಗಾರಾಚ್ಯಾ ಪಾವ್ಸಾಂತ್
ಹಾಂವ್ ಚಿಪ್ಪ್ ಭಿಜ್ಲಾಂ
ಪುಣ್ ಆಜ್
ತಾಚೊ ಮ್ಹಾಕಾ ಖೇದ್ ನಾ.
ದೊಂಗ್ರಾಕಡೆಚಿ
ಹಿ ಚಿಕಟ್‌ಮಾತಿ ಮಳೂನ್ ಮಸ್ತೂನ್
ಮ್ಹಜೆ ಹಾತ್-ಪಾಂಯ್ ಚಿಖ್ಲಾನ್ ದಾಟ್ಲ್ಯಾತ್
ಪುಣ್ ಮ್ಹಾಕಾ
ತಾಚಿ ಖಂತ್ ನಾ.
ಹಿ ಮಾತಿ ಘೆವ್ನ್
ಆಜ್‍ಮೆರೆನ್ ಹಾಂವೆಂ ಕಿತ್ಲಿಂಶೀಂಚ್
ಬಾವ್ಲಿಂ ಘಡಯ್ಲ್ಯಾಂತ್
ತುಜಿಂಚ್ ಬರಿಂ-ವಾಯ್ಟ್ ರುಪಾಂ...
ಆನಿ ತುಜೋಚ್ ಕಾನ್‍ಮಂತ್ರ್ ಫುತ್‌ಫುತೂನ್
ಹಾಂವೆಂ ತಾಂಕಾಂ
ಉಲೊಂವ್ಕ್, ವಾವ್ರುಂಕ್ ಶಿಕಯ್ಲಾಂ
ಪುಣ್ ಮ್ಹಾಕಾ
ತಾಚೊ ಗರ್ವ್ ನಾ.
ಕೆನ್ನಾ ಕೆನ್ನಾ ವಾರೆಂ-ವಾದಳ್ ಯೆತಾ
ಆನಿ ಮ್ಹಗೆಲೊ
ಹೊ ಬಾವ್ಲ್ಯಾಂಚೊ ಬರೊ-ವಾಯ್ಟ್ ಸಂವ್ಸಾರ್
ಖಿಣಾಂತ್ ಮೊಟ್ಟಾ,
ನಷ್ಟ್ ಜಾತಾ...
ಪುಣ್ ಹಾಂವ್ ನಿರ್ಶೆನಾ
ಉಟಂಗಾರಾಚ್ಯಾ ಪಾವ್ಸಾಂತ್
ದೊಂಗ್ರಾಕಡೆಚಿ ಚಿಕಟ್‌ಮಾತಿ ಘೆವ್ನ್
ಹಾಂವ್ ನವಿಂ ಬಾವ್ಲಿಂ
ಏಕ್ ಸಾರ್ಕೊ ಘಡಯ್ತ್ ಆಸ್ತಾಂ
ತುಜೀಂಚ್ ಬರಿಂ-ವಾಯ್ಟ್ ರುಪಾಂ...
-ಶಂಕರ್ ರಾಮಾಣಿ