ಸಂಪಾದಕೀಯ್:
ಮರಣ್ ಪಾವಲ್ಲ್ಯಾಚಿ ದುರಂತ್ ಕವಿತಾ
ಮಂಗ್ಳುರ್ಚೆಂ ವಿಮಾನ್ ಅವ್ಘದ್ ಘಡೊನ್ ವರಸ್ ಉತರ್‍ಲೆಂ. ಹ್ಯಾ ಎಕಾ ಘಡಿತಾನ್ ಜಾಯ್ತ್ಯಾ ಮನ್ಶಾಂಚಿಂ ಕಾಳ್ಜಾಂ ಕಡಯ್ಲ್ಯಾಂತ್ ಆನಿ ಮನಾಂ ಕಾಂತಯ್ಲ್ಯಾಂತ್. ಹಾಕಾ ಕವಿ ಕಾಂಯ್ ಅಪ್ವಾದ್ ನ್ಹಯ್.
ಪ್ರವೀಣ್ ತಾವ್ರೊ ಅಪ್ರೂಪ್ ಕವಿತಾ ಲಿಖ್ತಾ. ಬರೊಂವ್ಚಿ ಹುಮೆದ್ ತಾಕಾ ಜರೂರ್ ಆಸಾ. ತೆ ಹುಮೆದಿ ತೆಕಿದ್ ತಾಚೆ ತಾಂಕಿಚಿ ವಾಡಾವಳ್ ಜಾತಾನಾ ತೊ ಆಪುರ್ಬಾಯೆಚ್ಯೊ ಕವಿತಾ ಲಿಖುಂಕ್ ಸಕ್ತಲೊ.
- ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೆಂ ವಾರ್‍ಯಾತಾರುಂ ಥಳಾಕ್ ಪಾವ್ಲೆಂನಾ
ಹಜಾರೊಂ ಭೊಗ್ಣಾಂ ಘೆವ್ನ್ ಉಬ್ಲೊಂ ಪರ್ಗಾಂವಾಕ್
ಕಶ್ಟಾಂನಿ ರೀಣ್ ಕಾಡ್ನ್ ಮಾಗ್ಲೊ ಆದೇವ್ಸ್ ಮೊಗಾಚ್ಯಾಂಕ್
ಆಜ್ ಸಂತೊಸಾನ್ ಪಾಟಿಂ ಚಮ್ಕಲಾಂ ಚೊವೀಸ್ ಸುಮಾನಾಂನಿ
ಲಾಂಬ್ ವೆಗ್ಳಾಚಾರ್ ಸಾಂಡುನ್, ಮೊಗಾಚ್ಯಾಂಕ್ ವೆಂಗುಂಕ್...
ಆನಾನ್ ಸಕಾಳಿಂ
-ಗಾಯ್ರಾಚೆಂ ದೂದ್ ಕಾಡುಂಕ್ ಆಸಾ, ಯೇಂವ್ಕ್ ಜಾಯ್ನಾ ರೇ ಮ್ಹಳ್ಳೆಂ..
ಮಾಂಯ್ -ಸಕಾಳಿಂ ಮಿಸಾಕ್ ವಚೊನ್
ಮಾಗೊನ್ ಯೆತಾಂರೇ ಮ್ಹಣಾಲಿ..
ಧಾಕ್ಟಿಂ ಮ್ಹಜಿಂ ಬಾಂವ್ಡಾಂ
ವಿಮಾನ್ ಪಳೆಂವ್ಕ್ ಜಾಯ್ ಮ್ಹಣ್ ಸಳ್ ಕರ್‍ತಾಲಿಂ ..
ಬಾಂಳ್ತೆರಾಕ್ ಗೆಲ್ಲೆ ಹೊಕ್ಲೆನ್ ಮ್ಹಜ್ಯಾ
ನೆಣ್ತ್ಯಾ ಬಾಳಾಕ್ ಘೆವ್ನ್ ಯೆತಾ ಮ್ಹಳ್ಳೆಂ,
ವ್ಹಾಳಾಕಡ್ಚ್ಯಾ ಬೆನ್ನಾಮಾನ್
ಕಾರ್ ಹಾಡ್ನ್ ಮುಕಾರ್ ಯೆತಾಂ ಸಯ್ತ್ ಮ್ಹಳ್ಳೆಂ
ಆಬ್ಳೆ ಉದೆಲಿ ತಿ ಘಡಿ ಅತ್ರೆಗಾನ್ ರಾಕೊನ್ ರಾವ್‌ಲ್ಲಿ.,
ಪಾಚ್ವಿ ಧರ್ತಿ, ಮ್ಹಜೊ ಗಾಂವ್
ಚೊಯ್ತಾಲೊಂ ಹಾಂವ್ ಆರ್ಶ್ಯಾಂತ್ಲ್ಯಾನ್
ಥಳಾರ್ ಮಾಂಯ್ ಸೊಭ್ತಾಲಿ, ನವ್ಯಾ ಕಾಪ್ಡಾರ್,
ಬಾಂವ್ಡಾಂ ಸಂತೊಸಾನ್ ನಾಚ್ತಾಲಿಂ ವಿಮಾನಾಕ್ ಪಳೆವ್ನ್,
ಹೊಕ್ಲೆನ್ ಬಾಳಾಕ್ ಹಾಡ್‌ಲ್ಲೆಂ ಸಯ್ತ್,
ಆತ್ರೆಗ್ ವಾಡ್ಲೊ,
ಖಿಣಾಂನಿ ವೆಂಗ್ತಲೊಂ ಮ್ಹಣ್ ಮ್ಹಜ್ಯಾ ಮೊಗಾಚ್ಯಾಂಕ್,
ಆಬ್ಳೆ ವಾರ್‍ಯಾತಾರ್ವಾನ್ ಧರ್ತೆಚೊ ಉಮೊ ಘೆತ್ಲೊ..
ಭಿರಾಂತ್, ಕಾವ್ಜೆಣಿ, ಆಕಾಂತ್ ಮನಾಂತ್ ಚಡ್ಲೊ..
ಬಗ್ಲೆಚೊ ಮಲ್ಬಾರಿ ಉಡ್ಲೊ,
ಮ್ಹಜ್ಯಾನ್ ಉಡೊಂಕ್ ಜಾಲೆಂನಾ...
ವಾರ್‍ಯಾತಾರುಂ ಉಜ್ಯಾಂತ್ ಭಸ್ಮೊನ್ ಜಾಲ್ಲೆಂ...
ಮೊಗಾಚ್ಯಾಂಕ್ ದೆಖ್ಚೆ ಅತ್ರೆಗ್, ಉಮಾಳೆ, ಭೊಗ್ಣಾಂ
ಖಿಣಾಂನಿ ಉಜ್ಯಾನ್ ಗ್ರಾಸಿಲೆಂ.,
-ಪ್ರವೀಣ್ ತಾವ್ರೊ, ಕುಲ್ಶೇಕರ್