ಸಂಪಾದಕೀಯ್:
ಜಿಣಿ ಆನಿ ಮರ್ಣಾ ಮಧ್ಲೆಂ ಜನೆಲ್
ಹಾಂಗಾಸರ್ ಮ್ಹಾಕಾ ಉಡಾಸ್ ಯೆತಾ ಕಾಕಾಸಾಹೇಬ್ ಕಾಲೇಲ್ಕರಾಂಚೊ. ಗಾಂಧಿವಾದಿ ತೊ. ನೊವೊದ್ ಆನಿ ಸ ವರ್ಸಾಂ ಜಿಯೆಲ್ಲೊ. ಉತರ್ ಪ್ರಾಯೆರ್ ತರೀ ತರ್ನಾಟ್ಯಾಬರಿ ವಾವುರ್ತಾಲೊ, ಪಯ್ಣ್ ಕರ್ತಾಲೊ, ವಾಚ್ತಾಲೊ, ಬರಯ್ತಾಲೊ. ತಾಚೆಲಾಗಿಂ ಎಕ್ಲ್ಯಾನ್ ವಿಚಾರ್ಲೆಂ: ‘ತುಮ್ಚ್ಯಾ ಹ್ಯಾ ಲಾಂಬ್ ಆವ್ಕಾಚೊ ಘುಟ್ ಕಿತೆಂ?’ ಕಾಕಾಸಾಯ್ಬ್ ಮ್ಹಣಾಲೊ: ‘ಹಾಂವ್ ಮ್ಹಜಿಂ ಕಾಮಾಂ ಇತ್ಲೆ ಸುಡ್ಸುಡಾಯೆನ್ ಕರೀತ್ ಆಸ್ತಾಂ, ಪಿಡಾ ಆನಿ ಮರಣ್ ಮ್ಹಜ್ಯಾ ಪಾಟ್ಲ್ಯಾನಚ್ ಆಸ್ತಾತ್ ತರೀ ತಾಂಕಾಂ ಮ್ಹಾಕಾ ಆಪ್ಡುಂಕ್ ಜಾಯ್ನಾ. ಖಂಯ್ಚ್ಯಾ ದಿಸಾ ಹಾಂವ್ ಮ್ಹಜಿಂ ಕಾಮಾಂ ರಾವಯ್ತಲೊಂ ತ್ಯಾ ದಿಸಾ, ತಿಂ ಮ್ಹಾಕಾ ಯೇವ್ನ್ ಧರ್ತಲಿಂ’.
ಹೆ ಕವಿತೆಂತ್ಲೆ ತೆವ್ಳೆ ಮಾನಾಯ್ ಸೈತ್ ತೆಚ್. ಥೊಡ್ಯಾ ಲೊಕಾಂಕ್ ಹೆ ಖಿಣಾನ್ ಆಪಡ್ತಾತ್, ಆನಿ ಥೊಡೊ ಲೋಕ್ ತಾಂಚ್ಯಾಕಯ್ ಸರಾಯೆನ್ ಧಾಂವ್ತಾತ್. ತಾಂಚೆ ಮಧ್ಲೆಂ ಆಸಾ ತೆಂ ‘ಜನೆಲ್’ ಥೊಡೆ ಧಾಂಪ್ತಾತ್ ಆನಿ ಥೊಡೆ ಉಗ್ತೆಂಚ್ ದವರ್‍ತಾತ್. ಕಿತ್ಯಾಕ್ ಖಾತೀರ್ ಥೊಡ್ಯಾಂಕ್ ಭ್ಯೆಂ ಆನಿ ಥೊಡ್ಯಾಂಕ್ ಬಿರಾಂತ್ ಆಸನಾ?
ತುಮಿ ಹಾಚೊ ವಿಚಾರ್ ಕರಾ. ತವಳ್ ಜಿವಿತಾಚೆ ಗುಂಡಾಯೆಕ್ ತುಮಿ ದೆಂವ್ತಲ್ಯಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜನೆಲ್
ಹಾತಿಂ ವಾಯ್ನಾ ತಾಂಬ್ಲೆರ್ ಉಕಲ್ನ್
ಚಿಯರ್ಸ್.. ಮ್ಹಣೊನ್
ಉಗಡ್ತಾಂ ಮ್ಹಣ್ತಾಂ ಜನೆಲಾಂ ದಾರಾಂ
ದಿಶ್ಟಿ ಪಡ್ತಾತ್ ಪಾಶಾರ್ ಜಾವ್ಪಿ
ತೆವ್ಳೆ ಮಾನಾಯ್-
ಪಿಡಾ, ಮ್ಹಾತಾರ್ಪಣ್
ಆನಿ ಮರಣ್!
ಎಕ್ಲ್ಯಾಚೊ ಪಿಲ್ಲಾಂವ್ಚೊ ಹಾಸೊ
ದುಸ್ರ್ಯಾಚೊ ಕಣ್ಣೊಜಿ ಹಾಸೊ
ತಿಸ್ರ್ಯಾಚೊ ಕುಬ್ದಿ ಹಾಸೊ
ಹಾಂವಯ್ ಆಂಬೊರ್‌ಪಿಕೊ ಹಾಸೊನ್
ವ್ಹಳೂ ಜನೆಲಾಂ ಧಾಂಪ್ತಾಂ
ದಿಸಾನ್ದೀಸ್ ಹಿಚ್ ಕಾಣಿ
ಚಿಂತ್ಲೆಂ ಹಾಂವೆಂ
ಜನೆಲಾ ಭಿತರ್ ಸುಶೆಗ್ ಜಿಣಿ
ಪೊರ್ಚ್ಯಾ ಫಾಂತ್ಯಾರ್ ತುಟೊನ್ ಪಡ್ಲಿ
ಕೊಂತಾಮಣಿ.. ಹಾಯ್
ಪಿಡಾ ಸರ್ಲಿ ಭಿತರ್
ಜನೆಲ್ ಧಾಂಪುನ್ ಆಸೊನಯ್
ಆಯ್ಚೆ ಸಾಂಜೆರ್ ಖಬ್ರೆವಿಣೆಂ
ಕಣ್ಣೊಜಿ ಪಿರಾಯ್ ಘುಸ್ಲಿ
ಆನಿ ಭದ್ರತಿ ಕಸ್ಲಿ?
ಜನೆಲಾ ಭಿತರ್ಲಿ ಭದ್ರತಿ
ಪಿಶಿ ಕಶಿ ದಿಸ್ಲಿ!
ಆತಾಂ ಜನೆಲಚ್ ಫೊಡುನ್
ಉಡಯ್ಲಾಂ...
ಮರ್ಣಾನ್ ಚೊರಾಪರಿಂ ರಿಗ್ಚಿ
ಭಿರಾಂತ್ ಮ್ಹಾಕಾ ನಾ
ಭಿರ್ಮತ್ ಪಾವ್ತಾಂ ತರಯ್ ತುಮ್ಚಿ
ಜನೆಲ್ ಧಾಂಪುನ್ ಬಸ್ಲಲ್ಯಾಂಚಿ!!
-ಜೊ. ಸಿ. ಸಿದ್ದಕಟ್ಟೆ