ಸಂಪಾದಕೀಯ್:

ಉತ್ತಮಾಚಿ ಉತ್ತೀಮ್ ಕವಿತಾ ಮನ್ ಪಿಶ್ಯಾರ್ ಘಾಲ್ತಾ

ಉತ್ತಮ್ ಮಿನೇಜಸ್ ಅಪ್ರೂಪಾನ್ ಕವಿತಾ ಬರಯ್ತಾ.  ಹಾಂಗಾಸರ್ ಏಕ್ ವ್ಯಕ್ತಿ  ಆನಿ ತಾಚ್ಯಾ ವ್ಯಕ್ತಿತ್ಚಾಚೆಂ ಹೊ ಸಂಸಾರ್ ಆಪ್ಲ್ಯಾ ಫಾಯ್ದ್ಯಾ ಖಾತೀರ್ ಕಶೆಂ ನಪ್ಪಟ್ ನಾರ್ ಕರ್ತಾ ಮ್ಹಳ್ಳೆವಿಶಿಂ ವೆವೆಗ್ಳ್ಯಾ ರೂಪಕಾಂನಿ ವಿವರಾಯ್ಲಾಂ.  ಆಕ್ರೇಕ್ ಹೆಂ ಜಿವಿತ್ ಮ್ಹಳ್ಯಾರ್ ವ್ಹಡ್‍ಪಣಾ ಕುಶಿಂ ಧಾಂವ್. ಹೆ ಧಾಂವ್ಣೆಂತ್ ಲ್ಹಾನ್ ಮನೀಸ್ ಕೆದಳಾಯ್ ಲ್ಹಾನಚ್ ಉರ್ತಾ, ತೊ ವ್ಹಡ್ ಜಾಯ್ನಾ ಮಾತ್ರ್ ನ್ಹಯ್, ವ್ಹರ್ತೊಯ್ ಜಾಯ್ನಾ ಮ್ಹಳ್ಳೆವಿಶಿಂ ಹಿ ಕವಿತಾ ಉಲಯ್ತಾ.

ಉತ್ತಮಾನ್ ಸಬಾರ್ ತೆಂಪಾ ಉಪ್ರಾಂತ್ ಕವಿತಾ ಬರಯ್ಲ್ಯಾ.  ಆತಾಂ ಫುಲಲ್ಲಿ ಉರ್ಬಾ ಸದಾಂಕಾಳ್ ಜಿವಿಚ್ ಉರೊಂ ಆಶೆಂ ಆಮ್ಚಿ ಆಶಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಲ್ಹಾನ್‍ಪಣ್

ಹಾಂವ್ ಎಕ್ ಲ್ಹಾನ್ ಮಾಸ್ಳಿ
ವ್ಹಾಳೊನ್ ಜಿಯೆತಾಂ ದಾಕ್ಟುಲ್ಯಾ ಕೆದಾಂತ್
ಸಾಗೊರ್ ಪಾಗೊರಾಂಕ್ ಆಶೆವ್ನ್ ಥಕ್ಲಿಂ
ಕಾಳೊಕ್ ಪಡ್ಲಾ ಮ್ಹಜ್ಯಾ ಜೀವನಾಂತ್

ಮನ್ಶಾಚ್ಯಾ ಜಾಳಾಂತ್ ಫಾಸಾಳ್ಳಿಂ
ಸಾಂಡ್ಲೆಂಯ್ ಕಿತ್ಯಾಕ್ ಮ್ಹಜ್ಯಾ ಆದೆವ್ಸಾಂತ್?
ಹಾಂವ್ ತುಜ್ಯಾ ಸಂತೊಸಾಂತ್ ಸಂತೊಸ್ಲಿಂ
ಕಿತ್ಯಾಕ್ ಆಡ್ಚಣ್ ಧಾಡ್ಲಿ ಮ್ಹಜ್ಯಾ ಮೆಟಾಂಕ್?

ಹಾಂವ್ ಎಕ್ ಲ್ಹಾನ್ ಮೊನ್ಜಾತ್
ಭೊಂವೊನ್ ಜಿಯೆತಾಂ ಧಾಕ್ಟುಲ್ಯಾ ಬೊಲ್ಯಾಂತ್
ವಿಶಾಲ್ ರಾನಾಂಕ್ ಆಶೆಲ್ಲೊಂ ದೀಸ್‌ರಾತ್ 
ಶೆರ್ಮೆಲ್ಲೆ ಕುಡಿಕ್ ಪಾವೊಂವ್ಕ್ ಉಜ್ವಾಡಾಂತ್

ನಾ ಮಾರ್ಲಿ ಬೊಬಾಟ್, ನಾ ಕೆಲಿ ನಾ ದೆಸ್ವಾಟ್
ತುಜ್ಯಾಚ್ ರಚ್ನಾಂನಿ  ಕಿತ್ಯಾಕ್ ಧಾಂಪ್ಲಿ ಮ್ಹಜಿ ವಾಟ್?
ಮ್ಹಜ್ಯಾ ಮನಾಂತ್ ನಾತ್ ಲ್ಲೊ ಕಸಲ್ಲೊಚ್ ಸ್ವಾರ್ಥ್
ಕಿತ್ಯಾಕ್ ಮ್ಹಾಕಾ ಮೆಕ್ಳೊ ಕೆಲೊಯ್ ತುಜ್ಯಾ ಜಿಣ್ಯೆ ಪಾನಾಂತ್?

ಹಾಂವ್ ಏಕ್ ಲ್ಹಾನ್ ಕಲಾಕಾರ್
ಪುಜಾ ಕರ್ತಾಂ ತುಜ್ಯಾ ಅಸ್ತಿತ್ವಾಚಿ?
ಯಶಸ್ವೆನ್ ಪರ್ಜಳ್ಚೆ ಮಾನಾಚೆ ಸಾವ್ಕಾರ್
ಕಿತ್ಯಾಕ್ ಖುನಿ ಕರ್ತಾತ್ ಮ್ಹಜೆ ಆಸ್ಮಿತಾಯೆಚಿ?

ನಾ ಸತ್ಕಾರ್ ನಾ ಕೆಲೊನಾ ತಾಂಚೊ ಇನ್ಕಾರ್
ಕೆಂಡ್ತಾತ್ ಕಿತ್ಯಾಕ್ ಮ್ಹಜ್ಯಾ ವ್ಯಕ್ತಿತ್ವಾಕ್?
ಯೆ ದೆವಾ.... “ಲ್ಹಾನ್” ಜಾಲ್ಯಾರ್ ಮ್ಹಳ್ಳೆಂಯ್ ಖಾಲ್ತೊ ಜಾತಾಯ್
ತರ್ ಹಾಂವ್ ಆನಿ ತುಂ ಆಜ್ ಕಿತ್ಯಾಕ್ ಆರಾಯ್ತಾಂ “ ವ್ಹಡ್ ಪಣಾಕ್”?

-ಉತ್ತಮ್ ಮಿನೇಜಸ್