ಸಂಪಾದಕೀಯ್:
ಮೊಬಾಯ್ಲ್ ಮ್ಹಳ್ಳ್ಯಾ ಮೊನ್ಜಾತಿನ್ ಜಿವಿತಾಂತ್ ಹಾಡಲ್ಲೊ ಗುಸ್ಪಾ-ಗೊಂದೊಳ್
ಮೊಬಾಯ್ಲ್ ಮ್ಹಳ್ಳಿ ಮೊನ್ಜಾತ್ ಮನ್ಶಾಚ್ಯಾ ಜಿವಿತಾಂತ್ ಘುಸ್ಲ್ಯಾ ಉಪ್ರಾಂತ್, ಸಗ್ಳೆಂ ಜಿವಿತ್‌ಚ್ ಗುಸ್ಪಾ-ಗೊಂದೊಳಾಂಚೆಂ ಜಾಲಾಂ. ಮೊಬಾಯ್ಲಾನ್ ಕಿತೆಂ ದಿಲಾಂ ಮ್ಹಳ್ಳಿಂ ಲೆಕಾಂ ಘಾಲ್ತಾನಾ, ಮೊಬಾಯ್ಲಾನ್ ಫಾರುನ್ ವೆಲ್ಲೆ ಗಜಾಲಿಂಚಿ ವಳೆರಿ ಜಡಾಯೆಚಿ ದಿಸ್ತಾ. ಆನಿ ಹಾಕಾ ಸಾಕ್ಸ್ ಮ್ಹಳ್ಳ್ಯಾಬರಿ ಗುರು ಬಾಳಿಗಾಚಿ ಕವಿತಾ ಜಿವಿತಾಚ್ಯಾ ವಿಪರ್ಯಾಸಾಚಿ ಹಿ ಗಜಾಲ್ ಬೋವಚ್ ಮಾರ್ಮಿಕ್ ರಿತಿನ್ ಹಾಂಗಾಸರ್ ಪೇಶ್ ಜಾಲ್ಯಾ.
ಗುರು ಬಾಳಿಗಾನ್ ಕವಿತಾ ಕುಳಾರಾಕ್ ಆಯಿಲ್ಲೊಚ್ ಆಯ್ಲೆವಾರ್. ಪುಣ್ ಕವಿತಾ ಬರೊಂವ್ಕ್ ಗರ್ಜೆಚಿ ತಾಕತ್ ತಾಚೆಲಾಗಿಂ ಧಾರಾಳ್ ಆಸಲ್ಲ್ಯಾಚ್ಯೊ ಕುರ್ವೊ, ಹಿ ಕವಿತಾಚ್ ನ್ಹಯ್ ಹಾಚೆ ಆದಿಂ ಪರ್ಗಟ್ ಜಾಲ್ಲ್ಯೊ ಹೆರ್ ಕವಿತಾ ವಾಚ್ತಾನಾ ಝಳ್ಕೆಕ್ ಯೆತಾ.
ಗುರು ಬಾಳಿಗಾ ಥಾವ್ನ್ ಫುಡಾರಾಂತಯ್ ಅಸಲ್ಯೊ ಆನಿ ಹಾಚ್ಯಾಕಯ್ ಉತ್ತೀಮ್ ಕವಿತಾ ಆಶೆತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೊಬಾಯ್ಲ್ ಮಯ್ಮಾಂ
ಕಾಲ್ ಸಾಂಜೇರ್ ಬಸ್ಸಾ ದಾಕೂನ್
ದೆಂವತನಾ
ಮ್ಹಜೆ ಮೊಬಾಯಲ್ ಚೋರ್ನ್ ಗೆಲ್ಲೆ.
ಪಬ್ಲಿಕ್ ಫೋನಾದಾಕೂನ್
ಹಾಂವೆ ಮ್ಹಜೇಚ್ ನಂಬ್ರಾಕ್
ಗುಂವ್‌ಡಾಯಲೆ.
ಹಾಂವ್ ಮಾಕಾ ಮೆಳ್ಳೊ ನಾ.
ಅವಚ್ಛಿನ್ನ್ ಮನಾನ್
ಮ್ಹಜೆ ಬಾಯಲೇಕ್ ಫೋನ್ ಕರೂಂಕ್
ಸೊದ್ತಾನಾ ತಿಚೆ
ನಂಬರಚ್ ಮಾಕಾ ಗೊತ್ನಾ
ಮ್ಹಣ್ ಅಜಾಪ್ ಜಾಲೆ.
ಘರಾಚೆ, ಆಫೀಸಾಚೆ, ದೋಸ್ತಾಚೆ
ಮೆವ್ಣ್ಯಾಚೆ ಯಾದ್ ಆಯಲೋ
ನಂಬರ್ ಮಾತ್
ಉಡಗಾಸ್ ನಾ.
ಖಿಣಾಕ್ ಹಾಂವ್
ಮ್ಹಜೇಚ್ ಗಾಂವಾಂತ್
ಅನಾಥ್ ಅಶೆಂ ಭೊಗಲೆ ಮ್ಹಾಕಾ.
***
ಪಯ್ರ್ ರಾತಿ ಸುಧಾಮ್ ಮುಂಡಕೂರ್
ಸರಲೋ.
ದೋಸ್ತಾಚೆ ಸಾಂಗಾತ್
ತಾಚೆ ಗುಣಗಾನ್
ಕರೂಂಕ್ ಬಶೀಲೆ ತೆನ್ನಾ
ಮ್ಹಜೋ ಮೊಬಾಯಲ್ ರಿಂಗ್ ಜಾಲ್ಲೆ
ಆನಿ ತಾಂತು ದಿಸ್ತಾಲೆ
ಸುಧಾಮ್ ಕಾಲಿಂಗ್.
ತಾಚಿ ಸೆಕ್ರೆಟರಿ
ತಾಚೆ ಅಂತಿಮ್ ಸಂಸ್ಕಾರಾಕ
ತಾಜೆಚ್ ಮೊಬಾಯ್ಲಾನ್
ಆಪೋವಣೆ ದಿತಾಲಿ.
-ಗುರು ಬಾಳಿಗಾ