ಸಂಪಾದಕೀಯ್:
ಉತ್ರಾಂಚಿ ಗಿರೇಸ್ತಕಾಯ್, ಠರಾವಣೆಂಚೊ ಜಾದೂ ಆನಿ ಸಂಗೀತಾಚಿ ಜಾಣ್ವಾಯ್ ಆಸಲ್ಲ್ಯಾಂನಿ ಗಝಲ್ ರಚ್ಯೆತಾ
ಗಝಲಾಚ್ಯೊ ಅಪ್ರೂಪ್ ವೊಳಿ ಗುಂತುನ್ ತಾಕಾ ಭೆಟ್ ದೀಂವ್ಕ್ ಹೊ ಆಪಯ್ತಾ ತರ್ ತಾಚೆ ಪಾಟ್ಲೊ ಹೆತು ಕಿತೆಂ? ಶೆವೊಟ್ ಕಿತೇಂಯ್ ಆಸೊಂ, ಆಮಿ ಭೆಟ್ ದಿಂವ್ಚಿ ನಾಕಾ ಮ್ಹಣ್ ಹೊ ಸಾಂಗನಾ. ತ್ಯಾ ದೆಕುನ್ ಹೆ ವೊಳಿಂಚೊ ಸ್ವಾಧ್ ಚಾಕೊಂಕ್ ತುಮ್ಕಾಂ ವೊವ್ಳಿಗ್ ದಿತಾಂ.
ವಿಲ್ಸನ್ ಕಿನ್ನಿಗೋಳಿನ್ ಪಯ್ಲೆ ಪಾವ್ಟಿಂ ಏಕ್ ಗಝಲ್ ಬರಯ್ಲಾಂ. ಗಝಲ್ ಬರೊಂವ್ಚೆಂ ತಿತ್ಲೆಂ ಸಲೀಸ್ ನ್ಹಯ್. ಉತ್ರಾಂನಿ ತುಂವೆಂ ಗಿರೇಸ್ತ್ ಆಸಜೆ ಪಡ್ತಾ, ಠರಾವಣೆಂಚೊ ಜಾದೂ ರಚುಂಕ್ ತುಕಾ ಕಳಜೆ ಪಡ್ತಾ ಆನಿ ಸಂಗೀತಾಚಿ ಸಯ್ತ್ ಜಾಣ್ವಾಯ್ ತುಂವೆಂ ಆಪ್ಣಾಯಿಲ್ಲಿ ಆಸಜೆ ಪಡ್ತಾ. ಹ್ಯಾ ಸರ್ವಯ್ ಶೆತಾಂನಿ ಪಳ್ಗಲ್ಲೊ ಸೊಭಿತ್ ಶಾಯರ್ ಜಾಂವ್ಕ್ ಸಾಧ್ಯ್ ಆಸಾ.
ವಿಲ್ಸನಾ ಥಂಯ್ ಸಂಪೂರ್ಣ್ ಥರಾನ್ ನ್ಹಯ್ ತರೀ, ವ್ಹಡಾ ಮಾಪಾನ್ ಹಿ ತಾಂಕ್ ರುತಾ ಜಾವ್ನ್ ಆಯಿಲ್ಲಿ ದಿಸ್ತಾ. ಮಾಗೀರ್ ತಾಚೆಂ ಹೆಂ ಫುಡ್ಲದ್ ಗಝಲ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗಝಲ್
ಕಾಳ್ಜಾ ಹುಂಬ್ರಾರ್ ಗಡ್ದಿ ಪಳೆ ಭೊಗ್ಣಾಂನಿ ಕೆಲ್ಯಾ ಖೆಟ್ ಗೊ
ತುಕಾಚ್ ಗುಂತುನ್ ತೀಂತ್ ಒತ್ಲಾಂ ವೊಳಿಂಚಿ ಕರ್ ಭೆಟ್ ಗೊ
ಪಾಕ್ಯಾರ್ ಮ್ಹಜ್ಯಾ ಪಾವ್ಸ್ ವೊತ್ಲಾ, ಆಂಗ್ಣಾಂತ್ ದೆಂವ್ಲ್ಯಾತ್ ಪಾವ್ಳೆ
ತುಜ್ಯಾಚ್ ನಾಂವಾಚೆ ಬುಳ್ಬುಳೆ ಪಳೆ ಭರುನ್ ತಾಂತ್ಲಿ ಫುಟ್ ಗೊ
ತಾಪೊನ್ ಗೆಲ್ಲ್ಯಾ ಬೆಟಾರ್ ಪಳೆ ಪಾವ್ಸಾ ಉದ್ಕಾಚೊಚ್ ಶೆಳೆರ್
ತಾಂತ್ಲ್ಯಾನ್ ಸಯ್ತ್ ವ್ಹಾಳ್ಚ್ಯಾ ವ್ಹಾಳ್ಯಾಕ್ ತುಟೊನ್ ಪಡ್ಲಾ ಕಾಟ್ ಗೊ
ಫುಟ್‌ಲ್ಲ್ಯಾ ಝರಿ ಉದ್ಕಾಂತ್ ಕಾಳ್ಜಾಗಾದೊ ಕೊಸುನ್ ಘಾಲಾ
ಏಕ್ ಪಾವ್ಟಿಂ ದೆಂವೊನ್ ಪಳೆ ರೊಂಬಾತ್ ತುಜೆಂ ಮೇಟ್ ಗೊ
ಭರೊನ್ ಗೆಲ್ಲ್ಯಾ ಮತಿ ದರ್ಯಾಂತ್ ತುಜ್ಯಾಚ್ ಲ್ಹಾರಾಂಚೊ ಶಿಂವರ್
ಭಿಜೊನ್‌‌ಚ್ ವಿಲ್ಸನಾನ್ ಗಝಲ್ ಗುಂತ್ಲಾಂ, ಚರಯ್ ತುಜಿ ದೀಶ್ಟ್ ಗೊ
-ವಿಲ್ಸನ್ ಕಿನ್ನಿಗೋಳಿ