ಸಂಪಾದಕೀಯ್:

ಕಾಳೀಜ್ ಚಿರ್‍ಚಿ ದುಡ್ವಾ-ಧಾರೆಚಿ ಸುರಿ

ದುಡ್ವಾ ಖಾತೀರ್ ಕಿತೆಂ ಸಕ್ಕಡ್ ಜಾಯ್ನಾ? ಚಿಂತಾನಾ ಆಂಗ್ ಶಿರ್‍ಶಿರ್‍ತಾ.  ದುಡ್ವಾ ಮುಖಾರ್ ಮನ್ಶಾಪಣಾಕ್ ಮೊಲ್ ನಾ; ಖರ್‍ಯಾ ಶೆವೊಟಾಂಕ್ ಅರ್ಥ್ ನಾ. ಅಸಲ್ಯಾಚ್ ಅವಸ್ಥೆಚಿ ಕವಿತಾ ಸಿಜ್ಯೆಸ್ ತಾಕೊಡೆನ್ ಸಂಪೆ ರಿತಿನ್, ವ್ಯಂಗ್ಯ್ ಕಶೆಂ ಲಿಖ್ಲ್ಯಾ.

ವಾಚ್ತಾನಾ ಹಾಸೊ ಯೆತಿತ್, ಪುಣ್ ತಾಚ್ಯಾ ಪಾಟ್ಲಿ ಕರಾಳ್ ದೇಗ್ ಕಾಳೀಜ್ ಚಿರಿನಾಸ್ತಾಂ ರಾವಶಿನಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮ್ಹಜ್ಯಾ ದೇಶಾಂತ್ 

ಮ್ಹಜ್ಯಾ ದೇಶಾಂತ್ ಪಾವ್ಸಾ ಖಾತಿರ್
ಮಾಣ್ಕ್ಯಾ೦ಕ್  ಕಾಜಾರ್ ಕರ್ತಾತ್
ಚಡ್ ಪಾವ್ಸ್ ಜಾಯ್ ಜಾಲ್ಯಾರ್
ಗಾಡ್ವಾ೦ಕ್ ರೆಸ್ಪೆರ್ ಕರ್ತಾತ್!

ಮ್ಹಜ್ಯಾ ದೇಶಾಂತ್ ಶೆಂಭರ್ ರುಪ್ಯಾ೦ಕ್
ಹಾಡಾ೦ ಮೊಡುನ್ ಘಾಲ್ತಾತ್
ಕಾ೦ಯ್ ಥೊಡೆ ಹಜಾರ್ ದಿಲ್ಯಾರ್
ಗೊಮ್ಟಿ ಲು೦ವುನ್ ಹಾಡ್ತಾತ್!

ಮ್ಹಜ್ಯಾ ದೇಶಾಂತ್ ಲಾಖ್ ರುಪ್ಯಾ೦ಕ್
ಭಾಡ್ಯಾಚ್ಯೊ ಆವಯೊ ಮೆಳ್ತಾತ್
ಥೊಡೆ ಹಜಾರ್ ಉಡಯ್ಲೆ ತರ್
ಬಾಳ್ಶಿ೦ಯಿ ಮೊಲಾಕ್ ಮೆಳ್ತಾತ್!

ಮ್ಹಜ್ಯಾ ದೇಶಾಂತ್ ಆಸ್ಪತ್ರೆಕ್ ಗೆಲ್ಯಾರ್
ಯೆಮ್ಕೊ೦ಡ್ ಮುಕಾರ್ ದಿಸ್ತಾ
ಪೊಟ್ಕಾಣಿ ಮ್ಹಣ್ ದಾಖಲ್ ಜಾಲ್ಯಾರ್
ಕಿಡ್ಣಿ ಏಕ್ ಮಾಯಾಕ್ ಜಾತಾ!

ಮ್ಹಜ್ಯಾ ದೇಶಾ೦ತ್ ದುಡು ಆಸ್ಲ್ಯಾರ್
ಕಸಲಿ೦ಯಿ ಕಾಮಾ೦ ಜಾತಾತ್
ಕೊರೊಡಾ೦ಚಿ ಕಾಣಿಕ್ ಭೆಟಯ್ಲ್ಯಾರ್
ರೌಡೀಯ್ ಮ೦ತ್ರಿ ಜಾತಾತ್!

ಮ್ಹಜ್ಯಾ ದೇಶಾ೦ತ್ ದಾನ್ ದಿಲ್ಯಾರ್
ಪಾತ್ಕಾ೦ಕ್ ಭೊಗ್ಸಾಣೆ ಮೆಳ್ತಾ
ಕೊರೊಡಾ೦ಚೊ ಕುರೊವ್ ಘಾಲ್ಯಾರ್
ಸರ್ಗಾಕ್ ಟಿಕೆಟ್  ಲಾಬ್ತಾ!

ಮ್ಹಜ್ಯಾ ದೇಶಾ೦ತ್ ಗಾಯ್ರಾ ಖಾತಿರ್
ಎಕಾಮೆಕಾ ಕಾತರ್ತಾತ್
ಮನಿಸ್ ರಸ್ತ್ಯಾರ್ ಪಡೊನ್ ಮೆಲ್ಯಾರ್        
ದೊಳೆ ಧಾ೦ಪುನ್ ಧಾ೦ವ್ತಾತ್!

ಮ್ಹಜ್ಯಾ ದೇಶಾಂತ್ ಮೆಡಿಕಲ್ ಸಿಟಿಕ್
ಫಕತ್ ಪಾವಣ್ಶೆ೦ ಲಾಖ್
ಆಸ್ಪತ್ರೆ೦ತ್ ಪುಣಿ ಚೀರ್ನ್ ಘಾಲ್ಯಾರ್      
ದೆವಾ ತು೦ಚ್ ರಾಕ್!

ಮ್ಹಜ್ಯಾ ದೇಶಾ೦ತ್ ರಾಜ್‌ಕಾರಣಿ೦ಕ್
ದುಬ್ಳ್ಯಾ೦ವಿಶಿ೦ ದುಕಾ೦
ಪುಣ್ ತಾ೦ಚ್ಯಾ ಬಾಯ್ಲಾ೦ಕ್ ಮಾತ್ರ್
ಸ್ವಿಸ್ ಬೆ೦ಕಾ೦ತ್ ಲೆಕಾ೦!

ಮ್ಹಜ್ಯಾ ದೇಶಾ೦ತ್ ರಯ್ತ್ ಬಾವ್ಡೊ
ಬಳಿಸ್ಟ್ ಪಾಟಿಚೊ ಕಣೊ
ಪುಣ್ ಹ್ಯಾ ದುಬ್ಳ್ಯಾ ಭಾವಾಕ್
ಬಾರಾ ಮ್ಹಯ್ನೇಯಿ ಯೆಣೊ!

-ಸಿಜ್ಯೆಸ್  ತಾಕೊಡೆ