ಸಂಪಾದಕೀಯ್:
ಸುಟ್ಕೆಚ್ಯಾ ಮನಾಚಿ ಪರಿಕಲ್ಪನಾ ಅಶೀಯ್ ಕಶಿ ಬದಲ್ತಾ?
ಹಾಂವೆಂ ಆಯ್ಲೆವಾರ್‍ಚ್ಯಾ ದಿಸಾಂನಿ ವಾಚಲ್ಲಿ ಬೋವ್ ಉಂಚ್ಲಿ ಕವಿತಾ ಹಾಂಗಾಸರ್ ಆಸಾ. ಸುಟ್ಕಾ ಆಶೆಂವ್ಚ್ಯಾ ಮನಾನ್, ವಿಪರೀತ್ ಖುಶಿ ಪಾವೊನ್, ಲ್ಹಾನ್ ‘ಸು’ಚೆಂ ಸುಕುರುಂಡೆ ಕರ್‍ಚೆಂ ಸಭಾವಿಕ್. ತಶೆಂ ಹಾಂಗಾ ಜಾಲಾಂ. ಹಾಂಗಾಚ್ಯೊ ಖುರ್ಚ್ಯೊ ಗರ್ಜೆಪರಸ್ ವ್ಹಡ್ ಆಕಾರಾಚ್ಯೊ ಜಾಲ್ಯಾತ್. ಹಿ ಪರಿಕಲ್ಪನಾ ಮೆಜ್ಚಿ ತರೀ ಕಶೆಂ?
ತಿ ಮೆಜೂಂಕ್ ವಚೂನ್ ಆಪ್ಲ್ಯಾಚ್ ಬಾಪಾಯ್ಚ್ಯಾ ಹಾಪೊಳ್, ಪಾಪ್ಡೆ ಆನಿ ಚುರ್ಮುಂಡ್ಯಾಂಚ್ಯಾ ಗಾತ್ರಾಚೆರ್ ಹೊ ಕವಿ ಬೋಟ್ ಜೊಕ್ತಾ! ತಶೆಂ ಬೋಟ್ ಜೊಕುನ್ ತೋಯ್ ಕಾಂಯ್ ಆಪ್ಣಾಕ್ ಬಂಧಿಂತ್ ಘಾಲ್ತಾ?
ಹರ್‍ಯೆಕ್ ಪಾವ್ಟಿಂ ವಾಚ್ತಾನಾ ವೆವೆಗ್ಳ್ಯಾ ಅನ್ಭೋಗಾಂನಿ ಧಲೊಂವ್ಚಿ ಹಿ ಕವಿತಾ ಬರಯಿಲ್ಲ್ಯಾ ಗುರು ಬಾಳಿಗಾಚೆಂ ಕೊಂಕಣಿ ಕಾವ್ಯಶೆತಾಂತ್ಲೆಂ ಆಯ್ಲೆವಾರ್‍ಚೆಂ ಯೆಣೆಂ ಭಾಗ್ಯಾಚೆಂ ಮ್ಹಣೊನ್ ಹಾಂವ್ ಲೆಕ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಾಂಕ್ಷಿ
ಏಕ್ ಜೈಲಾಂತಲೇ ಬಂಧೀಂನಿ
ತಯಾರ್ ಕೆಲ್ಯೊ ಖುರ್ಚ್ಯೊ
ಅಗತ್ಯಾಪರಸ್ ವ್ಹಡ್ ಆಶಿಲ್ಯೊ ಕಂಯ್
ಬಸ್ಲ್ಯಾರ್
ಪಾಯ್ ನೆಲಾಕ್ ತೆಂಕನಾ
ವರಗೂಕ್
ಫಾಟಿ ಪಾವನಾ
ಭುಜಾಂ ಹಾತಾಕ್
ಮೆಳನಾ ತಿತಲೆ ರೂಂದ್
ತಾಂಚಿ ಸುಟ್ಕೆಚಿ
ಕಾಂಕ್ಷಿ ಆನಿ ಪರಿಕಲ್ಪನಾ
ತೆದಿ ವಿಸ್ತಾರಾಯೆಚಿ
ಮ್ಹಣೂನ್ ಕೋಣಕೀ ಕವೀನ
ಬರಯಿಲ್ಲೆ ಹಾಂವ್ ವಾಚಲಾ.
ಮೆಗೆಲೆ ದೆವಾಧೀನ
ಬಾಪಮಾನ ಕರಚೆ
ಹಾಪೋಳ್ ಪಾಪೋಡ್
ಚುರ್ಮುಂಡೊ
ಆನಿ
ಉಬಟ್ಯಾಂಚೆ
ವಿಸ್ತಾರಾಯೇಂತ್
ಖಂಯಚೆ ಕಾಂಕ್ಷಿ ಆಶಿಲಿ
ಹೆ ಮಾಕಾ ಖಬರ್ ನಾ
-ಗುರು ಬಾಳಿಗಾ