ಸಂಪಾದಕೀಯ್:
ಹ್ಯಾ ಖಂದ್ಕಾಂನಿ ಮೊತಿಯಾಂ ನಾಂತ್, ಫಕತ್ ಉಬಿರ್ ಆನಿ ಶೆಳೊ
ಕೊಂಕಣಿ ಸಮಾಜಾಕಚ್ ಆಪ್ಲೆ ಕವಿತೆದ್ವಾರಿಂ ಸವಾಲ್ ಉಡಯ್ಲಾಂ ನಕ್ರೆಚ್ಯಾ ಜೋರ್ಜ್ ಮಾಸ್ತರಾನ್. ಚಡ್ ವರ್ಸಾಂ ಜಾಂವ್ಕ್ ನಾಂತ್, ಹ್ಯಾ ಥೊಡ್ಯಾಚ್ ವರ್ಸಾಂನಿ ಸಾಗೊರಾಚ್ಯಾ ಥಳಾ ತಿತ್ಲೆ ಗುಂಡಾಯೆಚಿಂ ಖಂದ್ಕಾಂ! ಹ್ಯಾ ಖಂದ್ಕಾಂನಿ ಮೊತಿಯಾಂ ಆಸಲ್ಲಿಂ ತರ್ ಪರ್ವಾ ನಾತ್ಲಿ, ಫಕತ್ ಉಬಿರ್. ಬುಡಲ್ಲೆ, ಕೆನ್ನಾಂಚ್ ವಯ್ರ್ ಆಯಿಲ್ಲೆ ನಾಂತ್.
ಸಂಸಾರಾರ್ ಗಿನ್ಯಾನಾಚಿ, ವಿಗ್ಯಾನಾಚಿ, ತಂತ್ರಗ್ಯಾನಾಚಿ ಕಿತ್ಲಿ ಪ್ರಗತಿ ಜಾತಾ, ತಿತ್ಲ್ಯಾಚ್ ಪ್ರಮಾಣಾರ್ ಮನ್ಶಾಪಣಾಚಿಂ ಮೊಲಾಂ ದೆಂವ್ಲ್ಯಾಂತ್. ಮನ್ಶಾಂ ಮದ್ಲ್ಯಾ ಸಂಬಂಧಾಕ್ ಘಡ್ಯೆನ್ ಯೇರ್ ಯೆತಾ.
ನಕ್ರೆಚ್ಯಾ ಜೋರ್ಜ್ ಮಾಸ್ತರಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಹ್ಯಾ ವರ್ಸಾ ಕವಿತಾ ಫೆಸ್ತ್ ಆಮಿ ಘಡೊವ್ನ್ ಹಾಡಲ್ಲೆಂ. ತೊ ಕೊಂಕಣಿಚೊ ಮೋಗಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾ ಸಮ್ಜನಾ
ಮೊಡ್ಲಾ ಮಾಟ್ವಾಂತ್, ತಸ್ವಿರ್‍ಯೊ ನಾಸ್ತಾಂ
ವೋರ್ನ್-ಶಿತ್ ಜೆವ್ಣಾಂತ್ ಜಾಲ್ಲಿಂ ಆದ್ಲಿಂ ಕಾಜಾರಾಂ
ಬಾಳ್ತಾಲಿಂ ಪಂಚ್ವೀಸ್, ಪನ್ನಾಸ್ ವರ್ಸಾಂ;
ಎ.ಸಿ.ಹೊಲಾಂನಿ, ವೀಡಿಯೊ ಡಿಜಿಟಲ್ ಫೊಟ್ಯಾಂನಿ
ವಿಸ್ಕಿ ಮಾಸಾಚ್ಯಾ ಜೆವ್ಣಾಂಚಿಂ ಆತಾಂಚಿಂ ಕಾಜಾರಾಂ
ಡೈವೊರ್ಸಾಕ್ ವೆತಾತ್ ಪಂಚ್ವೀಸ್ ಪನ್ನಾಸ್ ದಿಸಾಂನಿ
ಅಶೆಂ ಕಿತ್ಯಾಕ್? ಮ್ಹಾಕಾ ಸಮ್ಜನಾ
ಭುರ್ಗಿಂ ಸಬಾರ್ ಆದ್ಲ್ಯಾ ಕುಟ್ಮಾಂನಿ, ಮಾಂಯ್-ಮಾಂವ್
ನಂಡೊ ಬಾವ್ಜೊ, ದೇರ್ ಭಾವೆ - ಅಶೆಂ
ವ್ಹಡ್ಲಿಂ ಕುಟ್ಮಾಂ, ವ್ಹಡ್ಲಿಂ ಮನಾಂ ತಾಂಚಿಂ;
ಡಾಡಾ-ಮಾಮ್ಮಾ ಸಂಗಿಂ ಏಕ್ ಯಾ ದೊಗಾಂ ಭುರ್ಗಿಂ
ಮೋಡರ್ನ್ ಕುಟ್ಮಾಂ ಆತಾಂಚಿಂ
ಲ್ಹಾನ್ ಕುಟ್ಮಾಂ, ಲ್ಹಾನ್ ಮನಾಂ, ನಾ ಸಮಾಧಾನ್ ಸದಾಂಚೆಂ
ಅಶೆಂ ಕಿತ್ಯಾಕ್? ಮ್ಹಾಕಾ ಸಮ್ಜನಾ
ಪೇಜ್ ಲೊಣ್ಚೆಂ, ಮೀಟ್ ಮಿರ್ಸಾಂಗ್
ಜೆವಣ್ ತಾಂಚೆಂ ಸದಾಂಚೆಂ ತರೀ
ಆಸಲ್ಲಿ ದಾಧೊಸ್ಕಾಯ್ ಸಂತೊಸ್ ತಾಂಕಾಂ
ನೂಡಲ್ಸ್, ಪಿಜ್ಜಾ, ಚಿಕನ್ ಕರ್ರಿ
ಜೆವಣ್ ಆತಾಂಚೆ ಪಿಳ್ಗೆಚೆಂ ತರೀ
ಟೆನ್ಶನ್ ಆನಿ ಬೋರ್ ಜಾಂವ್ಚೆಂ ಚುಕಲ್ಲೆಂ ನಾ
ಅಶೆಂ ಕಿತ್ಯಾಕ್? ಮ್ಹಾಕಾ ಸಮ್ಜನಾ
-ನಕ್ರೆ ಜೋರ್ಜ್ ಕಾಸ್ತೆಲಿನೊ