ಸಂಪಾದಕೀಯ್:
ಕೊಣಾಚೆ ಬಾವ್ಟೆ ಉಬೊಂವ್ಕ್ ಆಮಿ ಆಶೆತಾಂವ್?
ಬೊಲೀವಿಯನ್ ಕ್ರಾಂತಿಕಾರಿ ಚೆಗುವೆರಾ ಆನಿ ಶಾಂತಿ ಸಮಾಧಾನಾಚೊ ಸಂಕೇತ್ ಮೋಹನ್‌ದಾಸ್ ಕರಮ್‌ಚಂದ್ ಗಾಂಧಿ ಸಗ್ಳ್ಯಾ ಸಂಸಾರಾರ್ ತಾಂಚ್ಯಾ ಬರ್‍ಯಾ ಕಾಮಾಂ ಖಾತೀರ್ ಫಾಮಾದ್. ಪುಣ್ ತಾಂಚೆಪರಿಂಚ್ ಹಿಟ್ಲರ್ ಕಾಂಯ್ ಉಣೊ ನ್ಹಯ್. ತೋಯ್ ಫಾಮಾದ್. ಪುಣ್ ವೆಗ್ಳ್ಯಾಚ್ ಕಾರಣಾ ಖಾತೀರ್. ಸ್ವಾರ್ಥ್ ಆನಿ ಧಮ್ಕೆ ಖಾತೀರ್.
ಆಯ್ಚ್ಯಾ ಕಾಳಾರ್ ಗಾಂಧಿಚಿಂ, ಚೆಗುವೆರಾಚಿಂ ತತ್ವಾಂ ಕೊಣಾಕ್ ಜಾಯ್? ಸರ್ವಾಂಕ್ ಹಿಟ್ಲರಾ ಭಾಶೆನ್ ಜಾಂವ್ಚಿ ಆಶಾ. ತಾಚೆಚ್ ಝಂಡೆ ಉಬೊಂವ್ಚಿ ಆಶಾ.
ಕವಿ ಹೆಂ ಬೋವ್ ಸೊಭಿತ್ ರಿತಿನ್ ಆಪ್ಲೆ ಕವಿತೆಂತ್ ಸಾಂಗ್ತಾ. ವೆಗ್ಳೆ ಠರಾವಣೆ ಖಾತೀರ್, ಆಪ್ಣಾಯಿಲ್ಲ್ಯಾ ರೂಪಕಾ ಖಾತೀರ್ ಏಕ್ ಉತ್ತೀಮ್ ಕವಿತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತೀನ್ ಬಾವ್ಟೆ
ತೀನ್ ಬಾವ್ಟೆ:
ಏಕ್ ಗಾಂಧಿಚೊ,ಏಕ್ ಚೆಗುವೆರಾಚೊ,
ಆನ್ಯೇಕ್ ಹಿಟ್ಲಾರಾಚೊ.
ಉಗ್ತ್ಯಾ ಮಯ್ದಾನಾರ್,
ಫಾಂತ್ಯಾರ್ ಉಬ್‌ಲ್ಲೊ ಗಾಂಧಿ ಬಾವ್ಟೊ:
ಚಡ್ಚೆ ಧಗಿನ್, ವಾರ್‍ಯಾ ಭರಾನ್
ಜಾಲೊ ಉಲ್ಟೊ, ಸಾಂಜೆಭಿತರ್ ತೀರ್-ತಿರ್ಕುಟೊ.
ಊಂಚ್ ದೊಂಗ್ರಾರ್,
ಉಬ್‌ಲ್ಲೊ ಚೆಗುವೆರಾ ಬಾವ್ಟೊ,
ಉಬಾಳ್ ವಾರ್‍ಯಾನ್,ತೀಕ್ಶ್ಮ್ ಕಿರ್ಣಾನ್
ನಾಡೊ ತುಟೊನ್ ಪಡ್ಲೊ, ಜಾಲೊ ಮ್ಹೆಳ್ಕುಟೊ.
ದರ್ಯಾ ತಡಿರ್,
ಸಾಂಜೆರ್ ಉಬ್‌ಲ್ಲೊ ಹಿಟ್ಲರಾ ಬಾವ್ಟೊ,
ಫಾಡ್ಲಾಚ್ಯಾ ವಾರ್‍ಯಾಕ್, ವಯ್ರ್ ಉಬೊನ್
ಭಿರಾಂಕುಳ್ ಸುರ್ಯಾಕಚ್ ಲೆವೊಂಕ್ ಲಾಗ್ಲೊ.
ವಯ್ರ್ ದೆಖ್ತಾಂ
ಖಿಣಾಭಿತರ್ ಹಜಾರ್ ಬಾವ್ಟೆ:
ಸುರ್ಯಾ ಭೊಂವ್ತಿಂ ಜಾಲ್ಯಾತ್ ಲೆಂವ್ಟೆ
-ಸ್ಟೇನಿ ಬೆಳಾ