ಸಂಪಾದಕೀಯ್:
ಕವಿಕ್ ಮಿಕ್ವಲ್ಲೊ ಕೊಣಯ್ ನಾ
ಕವಿ ಸರ್ವಾಂ ಪ್ರಾಸ್ ಊಂಚ್. ತಾಕಾ ಮಿಕ್ವಲ್ಲೊ ಕೊಣಯ್ ನಾ. ಆನಿ ಹೆಂ ಉತರ್ ಸತ್ ಮ್ಹಣ್ ಸಾಂಗ್ಚೆ ಖಾತೀರ್ ಕವಯಿತ್ರಿನ್ ಆಪುರ್ಬಾಯೆಚಿ ಕವಿತಾ ಹಾಂಗಾಸರ್ ಬರಯ್ಲ್ಯಾ. ಆನಿ ತಶೆಂ ಬರಯ್ತಾನಾ ಅಪ್ರೂಪಾಚಿಂ, ಸೊಭಿತ್ ರೂಪಕಾಂ ಆಮ್ಕಾಂ ದಿಲ್ಯಾಂತ್.
ವಿಲ್ಮಾ ಬಂಟ್ವಾಳ್ ಕವಿತಾ ಶೆತಾಂತ್ ಆಮ್ಕಾಂ ಫಾವೊ ಜಾಲ್ಲೆಂ ಮೊತಿಂ. ತೆಂ ಆಮ್ಚೆಂ ಭಾಗ್ ಮ್ಹಣ್ ಲೆಕ್ತಾಂವ್.
ಶಿಂಗಾಂಚೊ ಸಾಂಗಾತ್ ಆಪ್ಣಾಂವ್ಕ್ ವಚನಾಸ್ತಾಂ, ಗಿನ್ಯಾನ್ ವಾಡೊವ್ನ್, ಕವಿತಾ ಸಂಸಾರಾಂತ್ ಸರಾಗ್ ತಿಣೆಂ ಬರೊಂವ್ಕ್ ಧರ್‍ಲೆಂ ತರ್, ವೆಗಿಂಚ್ ಅದ್ಭುತಾಂ ತಿಚೆ ಥಾವ್ನ್ ಆಮ್ಕಾಂ ದೆಖೊಂಕ್ ಮೆಳ್ತಲಿಂ ಮ್ಹಣ್ಚ್ಯಾಂತ್ ನವಲ್ ನಾ
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕವಿ
ಮಾಪ್ ಘೆವ್ನ್ ಮೆಜ್ಚ್ಯಾ ತಜ್ಞಾಕ್
ಪಾವ್ಸಾಕ್ ಕಿತೆಂ ದಿಸತ್?
ಕವಿ ಮಾತ್ರ್ ಹರ್‍ಯೆಕ್ ಥೆಂಬ್ಯಾಂತ್
ಜಿಣ್ಯೆ ಜಿವ್ಸಾಣ್ ಸೊಧಿತ್
ಫುಲಾಕ್ ಚೀರ್‍ನ್ ಪಾರ್ಕುನ್ ಪಳೆವ್ನ್
ಜಾಣ್ವಾಯ್ ತುಮ್ಚಿ ವಾಡತ್
ಪರ್ಮಳ್ ಸೆವುನ್ ಸೊಭಾಯ್ ಚಾಕ್ಚ್ಯಾ
ಕವಿಚೊ ಆನಂದ್ ಮೆಳತ್?
ತರ್‍ನ್ಯಾ ಬಾಳಾಚ್ಯಾ ದೊಳ್ಯಾಂನಿ ತುಮಿ
ಇಜ್ನೆರ್ ದಾಕ್ತೆರ್ ದೆಕ್ಶಾತ್
ಕವಿ ಮಾತ್ರ್ ತ್ಯಾ ಕಿಣ್ಕುಳ್ಯಾ ಹಾಶ್ಯಾಂಕ್
ಸಂಸಾರಚ್ ವಿಸ್ರತ್
ವಾರ್‍ಯಾ ಬಳಾಕ್ ಫಾಂಕೆ ಘುಂವ್ಡಾವ್ನ್
ವೀಜ್ ತುಮಿ ಕಾಡ್ಶಾತ್
ಥಂಡ್ ಹವ್ಯಾಂತ್ ಕವಿ ಮಾತ್ರ್
`ಮೊಗಾ' ಹಾಜ್ರಿಚ್ ಭೊಗತ್
ಫಾಲ್ಯಾಂ ವಿಗ್ಯಾನಾಕಯ್ ಸವಾಲ್ ಕರುನ್
ನವೆಂಚ್ ರಾಜಾಂವ್ ಉದೆತ್
ಪ್ರಕೃತೆ ವಿಜ್ಮಿತಾಂ ಆರಾವ್ನ್ ಘೆಂವ್ಚ್ಯಾಂತ್
ಕವಿಕ್ ಕೊಣ್ ಮಿಕ್ವತ್?
ಮಹಾನ್‍ರೆ ತುಂ ಕವಿ ಬಾಬಾ
ಸಂತೊಸ್ ಜೊಡ್ತಾಯ್ ಪ್ರಕೃತೆ ಬಾಳ್ ಜಾಂವ್ಚ್ಯಾಂತ್
ಆಸಲ್ಲೆಂ ಆಸಲ್ಲೆಪರಿಂ ಭೊಗ್ಚ್ಯಾಂತ್
-ವಿಲ್ಮಾ ಬಂಟ್ವಾಳ್