ಸಂಪಾದಕೀಯ್:
ಜಿವಿತಾಕಾಳಾಂತ್ ಪೊಂತಾಕ್ ಪಾವನಾತ್‌ಲ್ಲ್ಯೊ ಆಶಾ
ಜಿವಿತಾಕಾಳಾಂತ್ ಪೊಂತಾಕ್ ಪಾವನಾತ್‌ಲ್ಲ್ಯೊ ಆಶಾ ಸಭಾರ್ ಪಾವ್ಟಿಂ, ಕಾವ್ಳ್ಯಾನ್ ರುಕಾವಯ್ಲೊ ಆಂಬೊ ಬೊಂಚಾಯಿಲ್ಲೆಬರಿ, ಸ್ವಪ್ಣಾಂನಿ ಯೇವ್ನ್ ಬೊಂಚಾವ್ನ್ ಆಸ್ತಾತ್. ಹ್ಯಾ ಸ್ವಪ್ಣಾಂಚ್ಯಾ ಕಾವ್ಳ್ಯಾಕ್ ಧಾಂವ್ಡಾಯಾಂ ಆನಿ ಆಶೆಚೊ ಆಂಬೊ ಶಾಬೀತ್ ರಾಕ್ಯಾಂ ಮ್ಹಣ್ ಆಮಿ ಕಿತ್ಲೆಂ ಚಿಂತ್ಲ್ಯಾರಿ ಹಕೀಗತೆಂತ್ ಸರ್‍ವಾಂಕ್‌ಯ್ ಪಾರ್ ಮಾತ್ರ್ ಉರ್‍ತಾ. ಹೆಂಚ್ ಹ್ಯಾ ಸ್ವಪ್ಣಾಂನಿ ದಿಂವ್ಚೆಂ ಇನಾಮ್.
ಪಾಟ್ಲ್ಯಾ ದಿಸಾಂನಿ ರೇಖಾ ಮಸ್ಕರೇನ್ಹಸಾನ್ ಸ್ವಪ್ಣಾಂವಿಶಿಂ ಕವಿತಾ ಬರಯಿಲ್ಲಿ. ತಿಚ್ ಕವಿತಾ ಜೋಮೆಲಾಕ್ ಸವಾಲಾಂಚಿ ಜಾತಾನಾ, ತಾಚೆಥಾವ್ನ್ ಭುಂಯ್ ಪಡ್‌ಲ್ಲಿ ಆಪುರ್ಬಾಯೆಚಿ ಕವಿತಾ ಆಮಿ ತುಮ್ಚೆ ಸಮೊರ್ ಸಾದರ್ ಕೆಲ್ಲಿ. ಆತಾಂ ಜೊಸ್ಸಿ ಬಜ್ಜೋಡಿ ಪರ್‍ತ್ಯಾನ್ ಏಕ್ ಪಾವ್ಟಿಂ ಸ್ವಪ್ಣಾಂಚ್ಯಾ ಸೊಡಂವ್ಕ್ ಜಾಯ್ನಾತ್‌ಲ್ಲೆ ಸಾಂಕ್ಳೆಂನಿ ಆಮ್ಕಾಂ ಬಾಂದ್ತಾ. ತಶೆಂ ಬಾಂದ್ತಾನಾ ತಾಣೆ ಆಪುರ್ಬಾಯೆಚ್ಯೊ, ಕಾಂಯ್ ಪಂಚ್ವೀಸ್-ತಿಸಾಂಚ್ಯಾ ತರ್ನಾಟ್ಯಾಚ್ಯಾ ಮೆಂದ್ವಾಂತ್ ಜ್ಯೊ ರೊಳ್ಣಿ ಉಬ್ಯೊ ಜಾತಾತ್ ತಶ್ಯೊ ಪ್ರತಿಮಾ ಉಬ್ಯೊ ಕೆಲ್ಯಾತ್.
|
ಕವಿತಾ ಕುಳಾರಾಂತ್ ಪಾಟಿಂ ಏಕ್‌ಪಾವ್ಟಿಂ ಜೊಸ್ಸಿಚಿ ಕವಿತಾ ಆಮಿ ಪರ್ಗಟ್ ಕೆಲ್ಯಾ. ತ್ಯಾ ಸಂತೊಸಾನ್ ಫುಲೊನ್ ತಾಣೆ ಕವಿತೆಚೆ ಮೊಗ್ರೆಚ್ಯೊ ಜಾಯ್ತ್ಯೊ ವೊಳಿ ರುತಾ ಕೆಲ್ಯಾತ್. ಹ್ಯೊ ವೊಳಿ ವಾಗವ್ನ್, ಸುವಾಧಿಕ್ ಮೊಗ್ರೆಂ ಆಮ್ಕಾಂ ಖುಂಟುಂಕ್ ದಿಂವ್ಚೆಂ ಕಾಮ್ ಜೊಸ್ಸಿಚ್ಯಾ ಹಾತಾಂತ್ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಪ್ಣಾಂ
ಹಿಂ ಸ್ವಪ್ಣಾಂ
ಖಂಯ್ ಥಾವ್ನ್‌ಕಿ ಯೆತಾತ್
ನಿದೆಂತ್ ಮ್ಹಜ್ಯಾ ಚೊರಾಬರಿ
ಖಬ್ರೆವಿಣೆಂ, ತ್ಸುನಾಮಿಬರಿ
ಖಂಯ್ಚ್ಯಾಕಿ ಲ್ಹಾರಾ ಪೊಂದಾ ಮ್ಹಾಕಾ ಧಾಂಪ್ಚ್ಯಾಕ್
ಹಿಂ ಸ್ವಪ್ಣಾಂ
ವೀಜಾ ನಾಸ್ತಾನಾ ಖಂಯ್‌ಕಿ
ಪಯ್ಶಿಲ್ಯಾ ಶಹರಾಕ್
ಮ್ಹಾಕಾ ಆಪವ್ನ್ ವ್ಹರ್‍ತಾತ್
ಆನಿ ಪಯ್ಸ್ ಸರ್‍ತಾತ್ ಮ್ಹಾಕಾ ಸಾಂಡುನ್
ಹಿಂ ಸ್ವಪ್ಣಾಂ
ಆಶಾ ಹಾಡಯ್ತಾತ್ ಮ್ಹಾಕಾ
ದುಡ್ವಾ ಗುಡೊ ದಾಕವ್ನ್
ದುಡ್ವಾ ಚಿರಿ ಭರ್‍ತಾನಾ
ಪಯ್ಸ್ ಸರ್‍ತಾತ್ ಮ್ಹಾಕಾ ಸೊಡುನ್
ಹಿಂ ಸ್ವಪ್ಣಾಂ
ಸೊಬೀತ್ ಪೋರಿ ದಾಕವ್ನ್
ವೆಂಗೆಂತ್ ತಿಚ್ಯಾ ಖೆಳ್ತಾನಾ
ವೊಂಟಾಂಕ್ ತಿಚ್ಯಾ ಚಾಕ್ತಾನಾ
ಪಯ್ಸ್ ಸರ್‍ತಾತ್ ಮ್ಹಾಕಾ ಸಾಂಡುನ್
ಹಿಂ ಸ್ವಪ್ಣಾಂ
ಜಿಣ್ಯೆಚೆ ಧಗಿಂತ್ ಲಾಸ್ತಲ್ಯಾಂಕ್
ನಿದೆಂತ್ ತರೀ ಸುಖ್ ದಿತಾತ್
ಏಕ್ ಪುಣಿ ಹಕೀಗತೆಂತ್ ಬದ್ಲುಂ
ಪಯ್ಸ್ ಸರ್‍ಚ್ಯಾ'ದಿಂ ಮ್ಹಾಕಾ ಸೊಡುನ್
- ಜೊಸ್ಸಿ ಬಜ್ಜೋಡಿ