ಕವಿತಾ:
ಉಮೊ
ಪುನ್ವೆಚ್ಯಾ ಚಾಂದ್ಣ್ಯಾಂತ್ ಚಾಬ್ಕಾಂಚ್ಯೊ ಸಾವ್ಳ್ಯೊ ಚೊಯ್ಲ್ಯಾತ್ ಕೆದಿಂ?
ಕೆಸಾಂಚ್ಯೊ ರಾಶಿ ಪಿಸುಡ್ಟಾತ್ ಜಶ್ಯೊ ಉಗಂವ್ಚೆ ಆದಿಂ
ಎಕಾಮೆಕಾ ಪಾಸಾಂತ್ ಪುಸ್ಪುಶಿ ಉಮೆ ಘೊಸಾಂನಿ ಉಟ್ಟಾತ್
ದೆಖ್ತಾನಾ ಆಶೆನ್ ಕಾಳ್ಜಾಚೆ ಪಾಟೀರ್ ಘಾಮಾಳಿಂ ಫುಟ್ಟಾತ್
ಚಾಬ್ಕಾಂಚೆ ಸಾವ್ಳೆಂತ್ ಘಸ್‌ಘಶೀತ್ ಉಮೆ ದೀಜಾಯ್ ಆಸ್ಲೆಂ
ವ್ಹಡಾಂಚೆ ಬುದೀನ್ ಪೊಸ್ವಲ್ಲ್ಯಾ ಕಾಳ್ಜಾಕ್ ಭಂಯ್ಶೆಂ ದಿಸ್ಲೆಂ.
ದುಲಬಿ ಫಾಂತ್ಯಾರ್ ದೊಂಗ್ರಾಂಚಿಂ ಥಾನಾಂ ಚೊಯ್ಲ್ಯಾಂತ್ ತುಂವೆಂ?
ಆಂಕುಡ್ಚ್ಯಾ ದೊವಾಂತ್ ಆಂಕುಡ್ಚೆ ಆಶೆನ್ ಚೊಯ್ಲ್ಯಾಂತ್ ಹಾಂವೆಂ
ಥಂಡೆಲ್ಲ್ಯಾ ಮೊಳ್ಬಾಚೆ ಉಬೆಲ್ಲೆ ಪೊಲೆ ರೊಂಬ್ತಾತ್ ಅಶೆ
ಬಾಳ್ಶಾಚ್ಯಾ ಕುಲ್ಯಾರ್ ಆವಯ್ಚೆ ಪೊಲೆ ದಾಂಬ್ತಾತ್ ತಶೆ
ಚೊಯಿಲ್ಲ್ಯಾ ಹಾಂವೆಂ ಥಂಡ್‌ಗಾರ್ ಉಮೆ ದೀಜಾಯ್ ಆಸ್ಲೆಂ
ದೊಳ್ಯಾಂಚೆ ದಿಷ್ಟಿಕ್ ದಿಸನಾ ತಸ್ಲೆಂ ಭಂಯ್ಶೆಂ ದಿಸ್ಲೆಂ.
ತರ್ನಾಟೆ ಸಾಂಜೆರ್ ದರ್ಯಾಚೆ ವೆಳೆರ್ ಚೊಯ್ಲಾಂಯ್, ಬಾಳಾ?
ಮೊಗಾಚೆ ಬಾವ್ಳೆ ಮೊಗಾಚ್ಯಾ ಗಳ್ಯಾಕ್ ಘಾಲ್ತಾನಾ ಮಾಳಾ
ಲ್ಹಾರಾಂಚೆ ದಾಂಬ್ಣೆಂತ್ ವೆಳೆಚಿಂ ಮುಕಾಂ ಘಾಸ್ತಾನಾ ಬೆಸ್ತಾತ್
ಶಿಂವರಿಲ್ಲಿಂ ರಗ್ತಾಂ ರೆಂವೆಂನಿ ಮೊಳುನ್ ಗಾಲ್ಪುಟಾಂ ಪೊಸ್ತಾತ್
ಝೆಂಜಾರಿ ಮೊಗಾ ಝೆಂಜಾರಿ ಉಮೆ ದೀಜಾಯ್ ಆಸ್ಲೆಂ
ಮೊಗಾಚಿ ಹಿಂಸಾ ದೆಖ್ತಾನಾ ತೆದ್ನಾಂ ಭಂಯ್ಶೆಂ ದಿಸ್ಲೆಂ
ಮಾತ್ಯಾಚ್ಯಾ ಕೊನ್ಶಾ ಉಮ್ಯಾಂಚಿ ಆಶಾ ಆಜೂನಯ್ ಧೊಸ್ತಾ
ಮ್ಹಾತಾರ್ಯೊ ದಾಡ್ಯೊ ಝಡ್ತಿತ್ ಮ್ಹಣುನ್ ಭಂಯ್ಶೆಂ ದಿಸ್ತಾ.
-ಚಾ.ಫ್ರಾ. ದೆಕೊಸ್ತಾ