ಸಂಪಾದಕೀಯ್:
ವಿವಿಧತೆಂತ್ ಏಕತಾ ಪಾಚಾರ್ಚಿ ಕವಿತಾ
ವಿವಿಧತೆಂತ್ ಏಕತಾ ಮ್ಹಳ್ಳ್ಯಾ ವಿಷಯಾಚೆರ್ ಆಮಿ ಜಾಯ್ತ್ಯೊ ಕವಿತಾ ವಾಚ್ಲ್ಯಾತ್ ಜಾವ್ಯೆತ್. ತಸಲಿ ಅನ್ಯೇಕ್ ಕವಿತಾ ಹಾಂಗಾ ಆಸಾ. ಎಕ್ಸ್ ಎಮ್ ಉದ್ಯಾವರ್ ಆತಾಂ ನಾ. ತಾಣೆ ಸಭಾರ್ ಕಾಳಾ ಆದಿಂ ಬರಯಿಲ್ಲಿ ಕವಿತಾ ಹಿ - ಬೋವ್ ಸುಂದರ್ ಆಸಾ. ಹಾಂಗಾಚೆ ಸಬ್ದ್ ಸಯ್ತ್ ಅತ್ವೆ, ಅಪ್ರೂಪ್.
ಸಾವೆರ್ ಮೆಂದೊಸ್ (ಎಕ್ಸ್ ಎಮ್ ಉದ್ಯಾವರ್) ಸಂಸ್ಕೃತ್ ಭಾಷೆಂತ್ ಪರಿಣತಾ ಜೊಡಲ್ಲೊ ಮನೀಸ್ ಆಸಲ್ಲೊ. ತಶೆಂ ಜಾಲ್ಲ್ಯಾನ್ ತಾಚ್ಯಾ ಕವಿತಾಂನಿ ಬರ್ಪೂರ್ ಸಂಸ್ಕೃತಾಚೊ ಪ್ರಯೋಗ್ ಕೆಲ್ಲೊ ಝಳ್ಕತಾ. ಉದ್ಯಾವರ್ಚೊ ತರೀ, ಮುಂಬಯಿಂತ್ ಸಭಾರ್ ವರ್ಸಾಂ ಉಮ್ಮರ್‌ಖಾಡಿಂತ್ ತಾಣೆ ವಸ್ತಿ ಕೆಲ್ಯಾ. ವಸಯ್ ಥಾವ್ನ್ ಪ್ರಕಶಿತ್ ಜಾವ್ನ್ ಆಸಲ್ಲೆಂ ಧಾರ್ಮಿಕ್ ಪತ್ರ್ ‘ಸುವಾರ್ತಾ’ ಹಾಚೆರ್ ತೊ ಬರಯ್ತಾಲೊ.
ಹಿ ಕವಿತಾ ತಾಚ್ಯಾ ‘ಶೃದ್ಧಾಂಜಲಿ’ ಪುಸ್ತಕಾಂತ್ಲಿ ಘೆತ್ಲ್ಯಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಫುಲಾಂ ಸಭಾರ್ ಝೆಲೊ ಏಕ್
ಸಭಾರ್ ಪಾಕ್ಳ್ಯೊ ಏಕ್ ಫುಲ್
ಹಜಾರ್ ಫುಲಾಂ ಏಕ್ ಝೆಲೊ
ಸೊಭಾಯಿತಾ ಮಾತೆ ಗಳೊ
ರಂಗ್‍ರಂಗೀತ್ ಮನ್-ಮೋಹಿತ್
ಸುವಾಸ್ ವಿವಿಧ್, ಆನಂದಿತ್
ಹಜಾರ್ ಫುಲಾಂ, ಝೆಲೊ ಏಕ್
ಮಾತಾ ಏಕ್, ಲೆಕ್ರಾಂ ಸಭಾರ್
ಆಸತಿ ಖೆಳೊನ್ ಸಭೊಂವಾರ್
ತಿಯೆಚ್ಯಾ ಆಂಗಾರ್, ವದನಾರ್
ಪುಣ್ಯ ಭೂಮಿ ಭಾರತ್ ದೇಸ್
ಜಾತ್-ಮತ್ ಧರ್ಮ್ ವೇಸ್
ಮಿಸಳೊನ್ ಆಸತಿ ಗಣ್-ರಾಸ್
ಹಿಂದು, ಮುಸ್ಲಿಮ್, ಸಿಖ್, ಕ್ರಿಸ್ತಿ
ಜೈನ್, ಬೌಧ್ ಆನಿ ಪಾರ್ಸಿ
ವಿವಿಧ್ ಪಂಥಿ ಭಾರತ್‌ವಾಸಿ
ಜಾತ್, ವೇಸ್, ಪ್ರಾಂತ್, ಪಂಥ್
ಹಿಂಚ್ ಫುಲಾಂ ಗುಂತುನಿ, ಏಕ್-
ಝೆಲೊ ವಿಣಲಾ ಭಾರತ್ ಮಾತೆಕ್
ಲೆಕ್ರಾಂ ಸಭಾರ್ ಮಾತಾ ಏಕ್
ಭಾರತ್‌ವಾಸಿ ಸರ್ವ್ ಆಮಿ ಏಕ್
ಹಜಾರ್ ಫುಲಾಂ ಝೆಲೊ ಏಕ್
-ಎಕ್ಸ್. ಎಮ್. ಉದ್ಯಾವರ್
(ಲೆಕ್ರಾಂ=ಭುರ್ಗಿಂ; ಸಭೊಂವಾರ್=ಭೊಂವ್ತಣಿ; ಮಿಸಳೊನ್=ಭರ್ಸೊನ್; ಗಣ್‌ರಾಸ್=ಲೊಕಾಜಮೊ)