ಸಂಪಾದಕೀಯ್:
ಪಾಡಾವ್ ಕರುಂಕ್ ಗೆಲ್ಲೆ ಪಾಡಾವ್ ಜಾತಾನಾ!
ದುಸ್ಮಾನಾಂಕ್ ಪಾಡಾವ್ ಕರುಂಕ್ ವಚೊನ್ ಸ್ವತಾ ಪಾಡಾವ್ ಜಾಂವ್ಚೆಂ ಘಡಿತ್ ಏಕ್ ಹಾಂಗಾಸರ್ ಕವಿತೆದ್ವಾರಿಂ ವ್ಹಾಳ್ಳಾಂ. ಅಸಲಿಂ ಘಡಿತಾಂ ಝುಜಾಥಳಾರ್ ಮಾತ್ರ್ ನ್ಹಯ್, ಹೆರ್ ಸಂದರ್ಭಾಂನೀಂಯ್ ಘಡ್ತಾತ್. ಆಮಿ ಮಂಗ್ಳುರಿ ಲೋಕ್, ಆಮ್ಚೆ ದುಬ್ಳಿಕಾಯೆಕ್ ಮಾರ್‍ನ್ ಉಡಂವ್ಚ್ಯಾ ನಿಬಾನ್ ಪರ್ದೆಶಾಚ್ಯಾ ದುಡ್ವಾಕ್ ವೆಂಗ್‌ಲ್ಲೆ ಮನೀಸ್. ತಶೆಂ ವೆಂಗೊಂಕ್ ವಚೊನ್ ಸ್ವತಾ ಆಮ್ಚಿಂ ಕುಟ್ಮಾಂ, ಸಂಸ್ಕೃತಿ, ಭಾಸ್, ನೈತಿಕ್ ಮೊಲಾಂ ಹೊಗ್ಡಾವ್ನ್ ಘೆತ್‌ಲ್ಲೆ ಮನೀಸ್. ಆಮ್ಕಾಂಯ್, ವೆಗ್ಳ್ಯಾಚ್ ಎಕೆ ಮಾಂಚಿಯೆರ್ ರಾವೊನ್ ಚೊಯ್ಲ್ಯಾರ್, ಹಿ ಕವಿತಾ ಲಾಗು ಕರ್‍ನ್ ಘೆವ್ಯೆತಾ.
ಪುಣ್ ಕಿತ್ಲೆ ಜಣ್ ಆಮಿ ಪಾಡಾವ್ ಜಾಲ್ಯಾಂವ್ ಮ್ಹಣ್ ವೊಳ್ಕತಾತ್? ತಶೆಂ ವೊಳ್ಕೊಂಚೆಂ ಧೈರ್, ತ್ರಾಣ್ ಕಿತ್ಲ್ಯಾ ಜಣಾಂಕ್ ಆಸಾ? ಹೆ ಕವಿತೆಂತ್ಲ್ಯಾ ವೆಕ್ತಿಕ್ ತಸಲೆಂ ಏಕ್ ಬರೆಂ ಮನ್ ಆಸಾ. ತೊ ತಾಚಿ ಅಸ್ಕತ್ಕಾಯ್ ವೊಳ್ಕತಾ. ತ್ಯಾದೆಕುನ್ ಸಲ್ವಲ್ಲ್ಯಾ, ತರಿಪುಣ್ ಸಲ್ವಣೆಂತ್ ಸಾಲ್ವಾಸಾಂವ್ ಆಶೆಂವ್ಚ್ಯಾ ಮನ್ಶಾಚೆಂ ಪಡ್‌ರೂಪ್ ಜಾವ್ನ್ ಹಿ ಸೊಂಪಿ ಕವಿತಾ ಉಬಿ ಜಾತಾ.
ಕವಿ ಇ.ಎಸ್. ಮೂಡಬಿದ್ರಿ ಹಾಚೆಂ ಸಂಪೂರ್ಣ್ ನಾಂವ್ ಎಡ್ವರ್ಡ್ ಸೆರಾವೊ. ಸದ್ದ್ಯಾ ತೊ ಕುವೇಯ್ಟಾಂತ್ ವಸ್ತಿ ಕರ್‍ತಾ. ಝುಜಾಂತ್ ಬುಡ್‌ಲ್ಲ್ಯಾ ಗಾಂವ್ಚ್ಯಾ ಪ್ರಭಾವಾನ್ ತಾಣೆ ಹಿ ಕವಿತಾ ಲಿಖ್ಲ್ಯಾ ಜಾಂವ್ಕ್ ಪುರೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಾಕೊಂಕ್ ತುಕಾ ಜಾಲೆಂ ನಾ
ದೇಶಾಖಾತೀರ್ ಝುಜೊಂಕ್ ಭಾಯ್ರ್ ಸರ್‌ಲೊಂ ಹಾಂವ್
ಸೊಡುನ್ ಮ್ಹಜೆಂ ಕುಟಮ್ ಆನಿ ಮೊಗಾಚೊ ಗಾಂವ್
ಝುಜಾ ತರ್ಬೆತಿ ಕೆಂಪಾಂನಿ, ಸೊಸುನ್ ಧಗ್ ಹಿಂವ್
ಸೈನಿಕ್ ಜಾಲೊಂ, ರಾಕೊಂಕ್ ದೇಶಾಚೆಂ ಘನ್ ಆನಿ ನಾಂವ್
ಸಾಂಗಾತಿ ಸೊಜೆರ್ ಸರ್ವ್ ಸಂಗಿಂ ಮೆಳ್ತಾನಾ
ಉಲ್ಲಾಸ್, ಉಮೆದ್ ಜಾಗಿ ಜಾತಾನಾ
ಏಕ್ ವೀರ್ ನಾಂವ್ ವ ಮರಣ್ ಮತಿಂ ಘುಂವ್ತಾನಾ
ಕುಟ್ಮಾಚೊ ಉಡಾಸ್ ಧೊಸ್ತಾಲೊ ಕಳಿತ್ ನಾಸ್ತಾನಾ
ಝುಜಾಚಿಂ ಮೊಡಾಂ ದಾಟಾಯೆನ್ ಮಾಂಡ್‌ಲ್ಲಿಂ
ಆಮ್ಚಿ ಫವ್ಜ್ ಝುಜಾಂಗ್ಣಾಂತ್ ಆಯ್ತಿ ಜಾಲ್ಲಿ
ದೇಶಾಖಾತೀರ್ ಝುಜೊಂಕ್ ವ್ಹಡಿಲಾಂನಿ ತಾಕೀದ್ ದಿಲ್ಲಿ
ಇತ್ಲ್ಯಾರ್ ದುಸ್ಮಾನ್ ಶಿಪಾಯಾಂನಿ ಬಂಧಡ್ ಘಾಲಿ
ದುಸ್ಮಾನಾಂನಿ ವೆಡೊ ಘಾಲುನ್ ತಾಬೆಂತ್ ಘೆತಾನಾ
ಅಸಹಾಯಕ್ ಜಾಲ್ಯಾಂವ್ ತರಿ ಧಯ್ರ್ ಆಮಿ ಸಾಂಡುಂಕ್ ನಾ
ಫರ್‍ಮಾಣ್ ದಿಂವ್ಚೆ ವ್ಹಡಿಲ್ ಪೊಳ್ಳ್ಯಾತ್ ನಾಂವ್ ನಾಸ್ತಾನಾ
ಧರ್ತಿ ಮಾಯೆ ಭೊಗ್ಶಿ ಆಮ್ಕಾಂ ರಾಕೊಂಕ್ ತುಕಾ ಜಾಲೆಂನಾ
-ಇ.ಎಸ್. ಮೂಡಬಿದ್ರಿ, ಕುವೈಟ್