ಸಂಪಾದಕೀಯ್:

ಕಷ್ಟಾಂತ್ ಖರೆಂ ಸುಖ್ ಆಸಾ ಮ್ಹಳ್ಳೆಂ ಕಳ್ಯಾಂ ಥಾವ್ನ್ ಶಿಕಜಾಯ್

ಮೊಗ್ರೆಂ ಕೆನ್ನಾಂಯ್, ಆಪ್ಣಾಕ್ ಕೊಣೆ ಖುಂಟ್ಲೆಂ ಮ್ಹಣೊನ್ ದೂಕ್ ಪಾವನ್. ಆಪ್ಣಾಕ್ ಘಾಣುಡ್ಡ್ಯಾ ಮಾತ್ಯಾರ್ ಮಾಳ್ಳೆಂ ಚಿಂತುನ್ ಬೆಜಾರ್ ಜಾಯ್ನಾ. ಬದ್ಲಾ ಆಪ್ಣಾಚ್ಯಾ ಪರ್ಮಳಾನ್ ಥೊಡ್ಯಾ ಕಾಳಾಕ್ ತರೀ ಘಾಣ್ ಧಾಂವ್ಡಾವ್ನ್ ಸುಶೆಗಾಚೊ, ಸಮಾಧಾನಾಚೊ, ಸುಖಾಚೊ ಸಂಸಾರ್ ರುತಾ ಕರ್ಚ್ಯಾಂತ್ ಮೊಗ್ರೆಂ ಬುಡೊನ್ ವೆತಾ.

ಮನೀಸಯ್ ತಸೋಚ್. ತಾಣೇಂಯ್ ತಶೆಂ ಕಿತ್ಯಾ ಚಿಂತುಂಕ್ ನಜೊ? ಆಸ್ಟಿನ್ ಡಿಸೋಜಾ ಪ್ರಭುನ್ ಕಳ್ಯಾಂಕ್, ಮೊಗ್ರ್ಯಾಕ್ ಏಕ್ ರೂಪಕ್ ಜಾವ್ನ್ ಹಾಂಗಾ ವಾಪರ್ಲಾಂ ಆನಿ ಏಕ್ ಉತ್ತೀಮ್ ಲಿಸಾಂವ್ ದಿಂವ್ಚೆಂ ಪ್ರೇತನ್ ಕೆಲಾಂ. ಕಷ್ಟಾಂತ್ ಖರೆಂ ಸುಖ್ ಆಸಾ!

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಕಳ್ಯಾಂಚೊ ಸುವಾದ್

ಕಳೆ ತೆ ಕಳೆ,
ಫುಲ್ಚ್ಯಾ ಪಯ್ಲೆಂಚ್
ಖುಂಟ್ತಾಂವ್ ಆಮಿ
ಉಪ್ರಾಂತ್ ದೇಂಟ್
ಮೊಡ್ಟಾ ಪರ್ಯಾಂತ್
ದೋರ್ ಬಾಂದುನ್
ಗುಂತ್ತಾಂವ್ ಸಂಗಿಂ
ಕಳ್ಯಾಂಕ್ ಭಾರಿಚ್
ಸುವಾದ್ ಆಸಾ
ತರೀ ತೆ ಕಳೆ
ರಡನಾಂತ್
ದೆಂಟಾಕ್ ಆಮ್ಚ್ಯಾ
ಪಾಂತಿ ಘಾಲಿ
ಮ್ಹಣೊನ್ ತೆ
ಬೊಬಾಟ್ನಾಂತ್
ಫುಲ್ಚ್ಯಾ ಪಯ್ಲೆಂಚ್
ಖುಂಟ್ಲೆ ತರೀ
ಬಾಂದುನ್ ಘಾಲ್ಯಾರಿ
ಫುಲ್ತಾತ್ ತೆ
ಕಷ್ಟಾಂ ಮಧೇಂಯ್
ಸುವಾದ್ ದಿವುನ್
ಸದಾಂಚ್ ದಯಾಳ್
ಜಾತಾತ್ ಕಳೆ!

ಆಮಿಂಯ್ ಆಮ್ಚ್ಯಾ
ಸದಾಂ ಜೀವನಾಂತ್
ಕಳ್ಯಾಂಚಿ ಏಕ್
ಮೇಲ್‌ಫಾಂಕ್ತ್ ಘೆವ್ಯಾಂ
ಕೊಣೆ ಆಮ್ಕಾಂ
ಬಾಂದ್ಲೆಂ ತರೀ
ಸುವಾದ್ ಆಮ್ಚೊ
ಸದಾಂಚ್ ದಿವ್ಯಾಂ
ಬೊಂಗ್ಯಾಂ ಪ್ರಾಸ್
ಬಾಂದಲ್ಲ್ಯಾ ಕಳ್ಯಾಂಕ್
ಜಸೊ ಸುವಾದ್ ಚಡ್ ತಸೊ
ಆಮ್ಚ್ಯಾ ಜೀವನಾಂತ್ಲೊ ಹಾಸೊ
ಪೆಲ್ಯಾಂ ಮಧೆಂ
ವಾಂಟುನ್ ರಾವ್ಯಾಂ!

-ಆಸ್ಟಿನ್ ಡಿ’ಸೋಜಾ ಪ್ರಭು, ಚಿಕಾಗೊ