ಸಂಪಾದಕೀಯ್:
ಆಯ್ಚ್ಯಾ ಭುರ್ಗ್ಯಾಂಕ್ ಸೈಂಭಾನ್ ಆನಿ ಸುರ್ಯಾನ್ ಸಾಂಬಾಳಿಜಾಯ್
ಆಜ್ ಆಮ್ಚಿಂ ರಾನಾಂ ಸಗ್ಳಿಂ ನಾಸ್ ಜಾಲ್ಯಾಂತ್ ಆಸ್ತಾಂ, ಭುರ್ಗ್ಯಾಕ್ ನಿದಾಯ್ತಾನಾ ಕಿತೆಂ ಮ್ಹಣೊನ್ ಆಲ್ಲಯ್ ಘಾಲ್ಚಿ? ರಾನ್‍ಚ್ ನಾತ್ಲ್ಯಾರ್ ಖಂಯ್ಚ್ಯಾ ರಾನಾಕ್ ಖಂಯ್ಚ್ಯಾ ಮಾಮಾನ್ ಮ್ಹಶಿ ಆಂಬ್ಡುನ್ ವ್ಹರಚ್ಯೊ? ಆಯ್ಚ್ಯಾ ಸಮಾಜಾಂತ್ ಸಂಬಂಧಾಂಕ್ ಕಸಲೊ ಅರ್ಥ್? ಮೋಗ್ ಮೈಪಾಸ್ ಸಗ್ಳೊ ಒಫಿಸಾಂತ್ಲ್ಯಾ ಫಾಯ್ಲಿಂ ಮಧೆಂ ಜಾಂಬಾಯೊ ಕಾಡ್ತಾ ಆನಿ ಘರಾಂತ್ಲೆಂ ಭುರ್ಗೆಂ ಕ್ರಶಾಂತ್ಲ್ಯಾ ಆಂಟಿಗೆರ್ ಪ್ಲಾಸ್ಟಿಕಾಚೆ ಬೋಂಬ್ ಚಿಂವ್ತಾ. ಕಸಲಿ ಏಕ್ ಗತ್ ಆಯ್ಚ್ಯಾ ಭುರ್ಗ್ಯಾಚಿ!
ಮಾಯಾ ಅನಿಲ್ ಖರಂಗಟೆ ಬೋವ್ ಮಾರ್ಮಿಕ್ ರಿತಿನ್ ಆಯ್ಚ್ಯಾ ಆಮ್ಚ್ಯಾ ಭುರ್ಗ್ಯಾಚಿ ಪರಿಗತ್ ಹೆ ಎಕೆ ಕವಿತೆಂತ್ ಸಾಂಗ್ಲ್ಯಾ. ಆಯ್ಚ್ಯಾ ಭುರ್ಗ್ಯಾಂಕ್ ಸೈಂಭಾನ್ ಆನಿ ಸುರ್ಯಾನಚ್ ಸಾಂಬಾಳಿಜಾಯ್ ಮ್ಹಳ್ಳೆಂ ತಿಚೆಂ ಚಿಂತಪ್.
ಮಾಯಾ ಗೊಂಯ್ಚ್ಯಾ ನಾವೆಲಿಂಚಿ ಕವಯಿತ್ರಿ. ‘ಕೈಪಂಜಿ’ ತಿಚೊ ಕವಿತಾ ಸಂಗ್ರಹ್. ತಿಚ್ಯೊ ಕವಿತಾ ಇಂಗ್ಲಿಷ್ ಭಾಷೆಕ್ ಅನುವಾದಿತ್ ಜಾಲ್ಯಾತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕುರು ಕುರು ಕಾನಾ
ಕುರು ಕುರು ಕಾನಾ, ಮ್ಹಶಿ ವೆತಲ್ಯೊ ಖಂಯ್ಚ್ಯಾ ರಾನಾ
ಖಂಯ್ ಶೆಣ್ಲಿಂ ರಾನಾಂ, ಕೊಣ್ ಜಾಣಾ?
ಎಕ್ಸುರೆಂ ಭುರ್ಗೆಂ ಆತಾಂ, ಶೆಣ್ಲಿಂ ಸಗ್ಳಿಂ ನಾತಿಂ
ಖಂಯ್ಚ್ಯಾನ್ ಹಾಡ್ಚೊ ಮಾಮಾ, ಆಂಬ್ಡುನ್ ಹಾಡುಂಕ್ ಮ್ಹಶಿ
ದೂಧ್ ಆಟ್ಲೆಂ ಥಾನಾ, ಆಲ್ಲಯ್ ಜಿರ್ಲಿ ಮನಾ
ಮಮತಾ ತುಜಿ ಶೆಣ್ಲಯ, ಫಾಯ್ಲಿಂಚ್ಯಾರೆ ಪಾನಾ
ಕ್ರಶಾಂತ್ಲೆ ಆಂಟಿಗೆರ್ ವಾಜಯ್ ಘುಂಗುರ್ ವಾಳೆ
ಒಫಿಸಾಂತ್ ಬಸುನ್ ಮಮ್ಮಾಕ್, ಲಾಗ್ಲ್ಯಾತ್ ತಳ್ಮಳೆ
ನೀದ್ ರೆ ಮ್ಹಜ್ಯಾ ಬಾಬು, ಎ.ಸಿ.ಚೆ ಥಂಡಾಯೆಂತ್
ಖೆಳುಂಕ್ ತುಕಾ ವ್ಹರಿನ್, ಕಂಪ್ಯೂಟರಾಚ್ಯಾ ಆಂಗ್ಣಾಂತ್
ನೀದ್ ರೆ ಮ್ಹಜ್ಯಾ ಬಾಬು, ನೀದ್ ಆತಾಂಚ್ ಸುಖಾನ್
ಜೀಣ್ ಭರ್ ಭೊಂವುಂ ಜಾಯ್, ತುಕಾ ಚಕ್ರಾರ್ ಬಸುನ್
ರಾಖಣೆಕ್ ತುಜ್ಯಾ ಘಾಲ್ತಾಂ, ಸೈಮ್ ಸುರ್ಯಾಕ್ ಘರಾಣೆಂ
ಆಯುಷ್ಯ್ ಆರೋಗ್ಯ್ ಲಾಭ್ಚೆಂ ತುಕಾ, ಹೆಂ ಆವಯ್ಚೆಂ ರೆ ಮಾಗ್ಣೆಂ
ಜಯ್ ರೆ ಮ್ಹಜ್ಯಾ ಬಾಬು, ಜಯ್ ಕರ್ ರೆ,
ಜಯ್, ಜಯ್, ಜಯ್, ಜಯ್ ಕರ್ ರೆ, ಜಯ್ ಕರ್ ರೆ
-ಮಾಯಾ ಅನಿಲ್ ಖರಂಗಟೆ