ಸಂಪಾದಕೀಯ್:
ಘರಾಂನಿ ಆನಿ ಮನಾಂನಿ ಉಜ್ವಾಡ್ ಫಾಂಕಂವ್ಚೆಂ ಫೆಸ್ತ್
ದಿವ್ಯಾಂಚೆಂ ಫೆಸ್ತ್ ಲಾಗಿಂ ಪಾವ್ಲಾಂ. ಹ್ಯಾ ಸಂದರ್ಭಾಕ್ ಲಾಗೊನ್ ದಿವಂಗತ್ ಡೊ ಎಡ್ವರ್ಡ್ ನೊರೊನ್ಹಾನ್ ಬರಯಿಲ್ಲಿ ಏಕ್ ಕವಿತಾ ಹಾಂಗಾಸರ್ ಪರ್ಗಟ್ ಕೆಲ್ಯಾ. ದಿವಾಳಿ ಫೆಸ್ತ್ ಘರಾಂನಿ ಆನಿ ಮನಾಂನಿ ಉಜ್ವಾಡ್ ತಶೆಂ ಉಲ್ಲಾಸ್ ಹಾಡ್ತಾ, ತೆಂ ಆಪುರ್ಬಾಯೆನ್ ಕವಿನ್ ವರ್ಣಿಲಾಂ.
ಡೊ ಎಡ್ವರ್ಡ್ ನೊರೊನ್ಹಾ ಕಾಂಯ್ ಆಪುರ್ಬಾಯೆಚ್ಯೊ ಕವಿತಾ ಬರೊವ್ನ್ ಕೊಂಕಣಿಕ್ ಮಹತ್ವಾಚೆಂ ಯೋಗದಾನ್ ದಿಲಾಂ. ತಾಚ್ಯಾ ಕವಿತಾಂಚಿ ಶೈಲಿ ವೆಗ್ಳಿ. ಕನ್ನಡ ಭಾಷೆಚೊ ಪ್ರಭಾವ್ ತಶೆಂ ನವ್ಯಾ ತಶೆಂ ಅಪ್ರೂಪ್ ಕೊಂಕಣಿ ಸಬ್ದಾಂಚೆಂ ಭಂಡಾರ್ ತಾಚ್ಯಾ ಕವಿತಾಂನಿ ಪುಷ್ಕಳ್ ಮೆಳ್ತಾ.
ತುಮ್ಕಾಂ ಸಮೆಸ್ತಾಂಕ್ ಭಾಗಿ ದಿವಾಳೆಚೆಂ ಫೆಸ್ತ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೀಪಾವಳಿ
ದಿವ್ಯಾಂ-ಪಾಂತಿಯೊ ತಾರಾಂ-ಹಾರಿ
ಪಾಚ್ವ್ಯೊ ನಿಳ್ಶ್ಯೊ ಕಿಟಾಂ-ಧಾರಿ
ಜಳ್ತಿತ್ ಸೊಮಯ್ ಪಾಕ್ಯಾಂವೆರಿ
ಆಯ್ಲಿ ಮ್ಹಣ್ತಾಂ ದೀಪಾವಳಿ
ಕಾಳ್ಕ್ಯಾ ರಾತಿಂ ದಿಸಾ ಪರ್ಜಳ್
ಮೌನ್ ಫುಟಯ್ತಿತ್ ಗರ್ನಾಳಿ
ಸಾದ್ಯಾ ಘರಿಂ ರಾತ್ ಸಂಭ್ರಮಿ
ಹಾಸ್ಯಾ ವೊಸೊ ರಿತ್ಯಾ ತೊಂಡಿಂ
ಪಾವ್ಸಾನ್ ಉಜ್ವಾಡ್ಲಿಂ ಬಿಡಾರಾಂ
ಸುಂರ್ಗಾರಾಯ್ತಿತ್ ವಾಟೊ ಚಕ್ರಾಂ
ಸುರ್‌ಸುರ್ ಕಾಡಿಯೊ ದುರುಸ್ ಬಾಣಾಂ
ಜಗ್ಲಾವ್ನ್ ಬಾಂದ್ತಿತ್ ಮೊಳ್ಬಾರ್ ಆರ್ಕಾಂ
ಸಂತೊಸ್ ಭರೊನ್ ಮನಾಂ ವೊಮ್ತೊನ್
ಉಲ್ಲಾಸ್ ನೆಕೆತ್ರಾಂ ಜಾವ್ನ್ ಉದೆವ್ನ್
ಲ್ಹಾನ್ ವ್ಹಡಾಂಚ್ಯಾ ತೊಂಡಾಂ ಭೊಂವಾರ್
ಕುರೊವ್ ವಿಣ್ತಿತ್ ದಿವ್ಯಾಂ-ವೊಳಿ
ಆಯ್ಲಿ ಮ್ಹಣ್ತಾಂ ದೀಪಾವಳಿ.
-ಡೊ. ಎಡ್ವರ್ಡ್ ನೊರೊನ್ಹಾ