ಘರ್

ಸಂಪಾದಕೀಯ್:

ಜಿವಿತಾಚೊ ಅರ್ಥ್ ಬದ್ಲಿತಾನಾ

ಹ್ಯಾ ಜಿವಿತಾಚೊ ಅರ್ಥ್, ಜಿವಿತಾಚ್ಯಾ ವೆವೆಗ್ಳ್ಯಾ ಪಾಂವ್ಡ್ಯಾಂಚೆರ್ ಜೊಡಲ್ಲ್ಯಾ ಅನ್ಭೋಗಾಚೆರ್ ಹೊಂದೊನ್ ಆಮಿ ಬದ್ಲಿತೇ ಆಸ್ತಾಂವ್. ಅನ್ಭೋಗ್ ಬದ್ಲತಾನಾ, ಚಿಂತ್ನಾಂ ಬದ್ಲತಾತ್ ಆನಿ ಉಪ್ರಾಂತ್ ಕಾಳ್ಜಾಚಿ ತಾನ್ ಸೈತ್ ಬದಲ್ತಾ. ತಶೆಂ ಜಾಲ್ಲ್ಯಾ ವೆಳಾರ್ ಕಾಲ್ ಸಾರ್ಕೆಂ ದಿಸಲ್ಲೆಂ ಆಜ್ ವಾಯ್ಟ್ ದಿಸ್ತಾ. ಆನಿ ಆಜ್ ವಾಯ್ಟ್ ದಿಸ್ಚೆಂ ತೆಂ ಕಾಲ್ ಸಾರ್ಕೆಂ ದಿಸ್ಲಾಂ ಆಸ್ಯೆತ್.

ಸುದೇಶ್ ಶರದ್ ಲೊಟ್ಲಿಕಾರಾಚಿ ಹಿ ಕವಿತಾ ತಾಚ್ಯಾ ‘ಪೈಸ್’ ಪುಸ್ತಕಾಂತ್ಲ್ಯಾನ್ ಆಮಿ ವಿಂಚ್ಲ್ಯಾ. ಹೆಂ ಪುಸ್ತಕ್ ಕಾಂಯ್ ಬಾವೀಸ್ ವರ್ಸಾಂ ಆದಿಂ ಪರ್ಗಟ್ ಜಾಲ್ಲೆಂ. ತ್ಯಾ ಸಂದರ್ಭಾರ್ ಹಾಂವ್ ಹಾಜರ್ ಆಸಲ್ಲೊಂ. ಆತಾಂ ಬಾವೀಸ್ ವರ್ಸಾಂ ಉಪ್ರಾಂತ್ ಹೆ ಕವಿಚಿ ವಾಡಾವಳ್ ವಿಶೇಸ್. ಚಡಿತ್ ಕರುನ್ ತೊ ಮರಾಠಿಂತ್ ಬರಯ್ತಾ.

ತಾಚಿ ಕವಿತಾ ಕೆನ್ನಾ ಕೆನ್ನಾ ಆಪ್ಶಿಂಚ್ ಅಮೂರ್ತಾಕಡೆನ್ ಝೊಂಪಯ್ ಘೆತಾ; ಕೆನ್ನಾ ಕೆನ್ನಾ ಕಾಂಯ್ ಕವಿತಾಂಕ್ ಕವಿಚ್ಯಾ ಖಾಸ್ಗಿ ಜಿಣೆಚೊ ಸಂದರ್ಭ್ ಆಸೂನ್ ಲೆಗೀತ್ ಠರಾವೀಕ್ ಅರ್ಥಾಚೆ ಹುಮ್ರೆ ಹುಪುನ್ ತ್ಯೊ ವಿಶಾಲ್ ಆಶಯಾಕ್ ವೆಂಗಾಯ್ತಾತ್... ಅಶೆಂ ಪೈಸ್ ಪುಸ್ತಕಾಚ್ಯಾ ಪ್ರಸ್ತಾವನಾಂತ್ ಕವಿ ಶಂಕರ್ ರಾಮಾಣಿನ್ ಬರಯ್ಲಾಂ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಘರ್

ಆತಾಂ ಹಾಂವ್
ಮ್ಹಜ್ಯಾ ಘರಾಂತ್ ನಾ.
ಖಂಯ್ಚ್ಯಾ ತರೀ ಭಾಡ್ಯಾಚ್ಯಾ ಅಗರ್‌ಸಾಳೆಂತ್ ಆಸಾಂ.
ಮ್ಹಾಕಾ ಭಂಯ್ ದಿಸ್ತಾ. ಘರ್ಚಿ ಯಾದ್ ಯೆತಾ.
ಮ್ಹಾಕಾ ಮ್ಹಜ್ಯಾ ಘರಾ ಆಸನ್‌ಶೆಂ ದಿಸ್ತಾ;
ತರೀಯ್ ಹಾಂವ್ ಮ್ಹಾಕಾಚ್ ಸಮ್ಜಾಯ್ತಾಂ:
ಹೊ ಮ್ಹಜೋಚ್ ದೇಶ್ ಆನಿ ಮ್ಹಜ್ಯಾ ದೆಶಾಚಿ ಹಿ ಅಗರ್‌ಸಾಳ್.

ಆತಾಂ ಹಾಂವ್
ಮ್ಹಜ್ಯಾ ಖುದ್ದ್ ಘರಾಂತ್ ಆಸಾಂ.
ಕಸಲೆಚ್ ಪರ್ಕೆಪಣಾಚೆ ಭಾಸ್ ನಾ.
ಜಾಲ್ಯಾರಯ್ ಮ್ಹಾಕಾ ಭಂಯ್ ದಿಸ್ತಾ,
ಕಸಲಿ ತರೀ ಯಾದ್ ಯೆತಾ. ಅಶೆಂ ದಿಸ್ತಾ -
ಮ್ಹಜೆಂ ಘರ್ ಆಜೂನಯ್ ಪಯ್ಸಚ್ ಆಸಾ;
ತರೀಯ್ ಹಾಂವ್ ಮ್ಹಾಕಾಚ್ ಸಮ್ಜಾಯ್ತಾಂ:
ಹೆಂ ಮ್ಹಜೆಂಚ್ ಘರ್, ಹೆಂ ಮ್ಹಜೆಂಚ್ ಜಗ್
ಆನಿ ತಾಂತ್ಲಿ ಹಿ ಮ್ಹಜೀಚ್ ಭುಂಯ್.

-ಸುದೇಶ್ ಶರದ್ ಲೊಟ್ಲೀಕಾರ್

ಅಗರ್‌ಸಾಳ್= ದೆವ್ಳಾ ಲಾಗ್ಸಾರ್ ಯಾತ್ರಿಂ ಖಾತೀರ್ ತಾತ್ಪುರ್ತೆಂ ರಾವೊಂಕ್ ಬಾಂದಲ್ಲೆಂ ಘರ್.