ಸಂಪಾದಕೀಯ್:
ಮನಾಚ್ಯಾ ಕೆನ್ವಸಾಚೆರ್ ಕರ್ಕಟ್ಯಾ ಗಿಮಾಚಿಂ ರಂಗಾಳ್ ತಿಂತಾಂ
ಆಮ್ಚೆ ಪ್ರಾಯೆ ತೆಕಿದ್ ಆಮಿ ಗೀಮ್ ಪಳೆಲ್ಯಾತ್ ಆಸ್ತಲೆ. ಪುಣ್ ಕೊಣಾಕ್ ಗಿಮಾವಿಶಿಂ ದೋನ್ ಕಡ್ವ್ಯಾಂನಿ ಬರಯ್ ಮ್ಹಳ್ಯಾರ್ ಬರೊಂವ್ಕ್ ಜಾಯ್ತ್. ಬರಯ್ಲ್ಯಾರಿ ತೆಂ ಅರ್ಧುಕುರೆಂ, ಅಪೂರ್ಣ್ ಉರತ್. ಪುಣ್ ಕವಿ ತಸೊ ನ್ಹಯ್. ವಿಂಚ್ಲಲ್ಯಾ ಥೊಡ್ಯಾಚ್ ಉತ್ರಾಂನಿ, ದೊಳ್ಯಾಂಕಯ್ ಮಿಕ್ವೊನ್ ವೆಚೆಂ ಸಾಂಗ್ಚಿ ತಾಕತ್ ತಾಕಾ ಆಸಾ.
ಶಂಕರ್ ರಾಮಾಣಿಚ್ಯಾ ನಿಳೆಂ ನಿಳೆಂ ಬ್ರಹ್ಮ್ ಪುಸ್ತಕಾಂತ್ಲ್ಯಾನ್ ಹೆ ಕವಿತೆಚಿ ವಿಂಚವ್ಣ್ ಕೆಲ್ಯಾ. ಧೊಂಪ್ರಾಪಾಸುನ್ ಆಸ್ಚ್ಯಾ ಉಬ್ರಾಚ್ಯಾ ತಳ್ಯಾಂತ್ ಸುಸ್ತ್ ಜಾಲ್ಲಿ ಗಾಬೊ ಮ್ಹಸ್ ನಿದಲ್ಲ್ಯಾಬರಿ ಹ್ಯಾ ಗಿಮಾಚೊ ದೊನ್ಪಾರ್ ಮ್ಹಣ್ತಾ ಕವಿ. ಲಿಂಬ್ಯಾಚ್ಯಾ ಸುಕಲ್ಲ್ಯಾ ಫಾಂಟ್ಯಾಕ್ ಉಮ್ಕಳಾಯಿಲ್ಲೆಂ ಸೈಮಾಚೆಂ ಕಾಳೀಜ್ ವೊತಾಕ್ ಸುಕ್ಲ್ಯಾರ್ ಕಶೆಂ ಜಾತಾ ತಶೆಂ ಹ್ಯಾ ಗಿಮಾಚಿ ಗಜಾಲ್. ವ್ಹಾಹ್! ಹಾಚ್ಯಾಕಯ್ ವ್ಹರ್ತಿಂ ರೂಪಕಾಂ ಕೊಣ್ ದೀಂವ್ಕ್ ಸಕತ್.
ಚಿಂತಾಂ ಚಿಂತಾನಾ, ಮನಾಚ್ಯಾ ಕೆನ್ವಸಾಚೆರ್ ಕರ್ಕಟ್ಯಾ ಗಿಮಾಚಿಂ ಲೆಗುನ್ ರಂಗಾಳ್ ತಿಂತಾಂ ಶಿಂಪೊನ್ ವೆತಾತ್.
- ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗೀಮ್
ಸುರ್ಯಾ ಮಾತ್ಯಾರ್ ಫುಲ್ತಾನಾ
ಧೊಂಪರ‍್ಭರ್ ರೆಬೆಲ್ಲ್ಯಾ ತಳ್ಯಾಂತ್
ಉಪಾಟ್ ಸುಸ್ತಾವಲ್ಲಿ ಗಾಬಣೀ ಮ್ಹಸ್ ಕಶೀ
ದೊನ್ಪಾರ್.
ಚೊಂಯ್‌ವಶೀನ್ ದೊಂಗುಲ್ಲ್ಯಾಂಚಿ
ರಖರಖೀತ್ ಸಾಸಾಯ್ ಆಶಿಲ್ಲ್ಲ್ಯಾ
ಮಿಟ್‍ಮಿಟ್ಯಾ ದೊಳ್ಯಾಂಚ್ಯಾ
ಎಕಾ ಮಾಣ್ಕುಲ್ಯಾ ಗಾಂವಾಂತ್ಲಿ
ಖಾಚಿ ಕೊಂಯ್ಡ್ಯಾಂತ್ಲ್ಯಾನ್ ಮಸುಂಡೆಮೆರೆನ್ ಗೆಲ್ಲಿ
ಅಶೀರ್,
ಕರ್ಮಕುಟಿ ವಾಟ್ ಆನಿ
ವ್ಹಾಳಾ ಪಲ್ತಡ್ಚ್ಯಾ ಲಿಂಬಿಣಿಚ್ಯಾ
ಸುಕಿಲ್ಲ್ಯಾ ಖಾಂದ್ಯೆರ್ ಥಿರಾವ್ನ್
ವೊತಾಭಾರಾನ್ ಹುಲ್ಪಲ್ಲೆಂ
ಭೊಂವ್ತಣ್ಚ್ಯಾ ಸೈಮಾಚೆಂ ಕಾಳೀಜ್
ಕೊರಾಂಥೂನ್ ಕಾಡಿಲ್ಲ್ಯಾವರಿ
ಕೊಗ್ಳಾಚೊ ಸೂರ್..
-ಶಂಕರ್ ರಾಮಾಣಿ
ರೆಬೊ=ಉಬಿರ್; ಉಪಾಟ್=ಧಾರಾಳ್; ಸುಸ್ತಾವಲ್ಲಿ=ಸುಸ್ತ್ ಜಾಲ್ಲಿ; ಗಾಬಣೀ=ಗುರ್ವಾರ್; ಚೊಂಯ್‌ವಶೀನ್=ಚಾರ್‌ಯ್ ಕುಶಿಂನಿ; ದೊಂಗುಲ್ಲಿ=ಗುಡೊ; ಖಾಚಿ ಕೊಂಯ್ಡೊ=ವಾಂಕ್ಡಿ ತಿಂಕ್ಡಿ ವೋಂಯ್; ಮಸುಂಡ್=ಮಡಿಂ ಲಾಸ್ಚೊ ಜಾಗೊ; ಲಿಂಬಿಣ್=ಲಿಂಬ್ಯಾಚೆಂ ಝಾಡ್; ಕೊರಾಂಥೂನ್=ಖರ್ವಟಾವ್ನ್, ಪೊಕೊರ್ನ್.