ಸಂಪಾದಕೀಯ್:
ತ್ಸುನಾಮಿನ್ ಕವಿಕಾಳ್ಜಾಂನಿ ಊಬ್ ಭರ್‍ಲ್ಯಾ
ತ್ಸುನಾಮಿನ್ ಹಾಡ್‌ಲ್ಲ್ಯಾ ಅನ್ವಾರಾಂ ಮಧೆಂ ಥೊಡೆಂ ಬರೆಪಣ್‌ಯ್ ಆಸಾ ಮ್ಹಳ್ಯಾರ್ ಕೊಣ್‌ಯ್ ಪಾತ್ಯೆತಿತ್? ಕಸಲೆಂ ಹೆಂ ಬರೆಪಣ್? ತ್ಸುನಾಮಿನ್ ವಾಳಯ್ ಖಾವ್ನ್ ಗೆಲ್ಲೆ ಮೆಂದು ಸಾಫ್ ಕೆಲ್ಯಾತ್. ತ್ಸುನಾಮಿನ್ ಕೊವ್ಳೊನ್ ಬಸ್‌ಲ್ಲ್ಯಾ ಆಮಾ ಲೊಕಾಚ್ಯಾ ಚಿಂತ್ಪಾಕ್ ಇಂಜೆಕ್ಷನ್ ದಿಲಾಂ. ತ್ಸುನಾಮಿನ್ ಯೆದೊಳ್ ಕವಿತೆಚ್ಯಾ ನಂದನಾವನಾ ತೆವ್ಶಿಂ ಪಾಂಯ್ ತೆಂಕನಾತ್‌ಲ್ಲ್ಯಾ ಆಮ್ಚ್ಯಾ ಲೊಕಾಕ್ ತೆಕುಶಿಂ ತಿಳ್ಚೆಂ ಧೈರ್ ದಿಲಾಂ ಮಾತ್ರ್ ನ್ಹಯ್ ಕಾಂಯ್ ಥೊಡಿಂ ಕವಿತಾಂ ಲಿಕುಂಕ್ ಕಾಳ್ಜಾಂತ್ ತಾಂಚ್ಯಾ ಊಬ್ ಭರ್‍ಲ್ಯಾ.
ಹಿ ಊಬ್ ಘೆವ್ನ್ ಆಯಿಲ್ಲ್ಯಾಂ ಮಧೆಂ ವಾಯ್ಲೆಟ್ ಪಿರೇರಾ ಎಕ್ಲಿ. ತಿ ದೆಧೆಸ್ಪೊರ್ ಜಾಲ್ಯಾ. ಭುರ್‍ಗ್ಯಾಂಚ್ಯಾ ಕಷ್ಟಾಂಕ್ ಆವಯ್ಚೆಂ ಕಾಳೀಜ್ ರಡ್ತಾ ತಶೆಂ, ತ್ಸುನಾಮಿನ್ ಹಾಡ್‌ಲ್ಲ್ಯಾ ವಿಘ್ನಾಂನಿ ತಿ ಕೊಸಾಳ್ಳ್ಯಾ. ತಿಕಾ ಧಖೊ ಬಸ್ಲಾ. ತ್ಯಾ ಧಖ್ಯಾಕ್ ಉತ್ರಾಂ ಸುಟನಾಂತ್, ಬದ್ಲಾ ಚಿಂತ್ನಾಂ ಅಕ್ಷರಾಂನಿ ವ್ಹಾಳೊನ್ ಉತ್ರಾಂಚೆಂ ರೂಪ್ ಜೊಡ್ತಾತ್. ತಶೆಂ ರೂಪ್ ಜೊಡ್‌ಲ್ಲಿ ಕವಿತಾ ಹಿ ತುಮ್ಚೆ ಸಮೊರ್ ಆಮಿ ಸಾದರ್ ಕೆಲ್ಯಾ.
ಹೆ ವೊಳಿಂತ್ ತ್ಸುನಾಮಿ ವಿಶಯಾಚೆರ್ ಆಮಿ ಪರ್ಗಟ್ ಕರ್‍ಚಿ ಹಿ ಚೊವ್ತಿ ಕವಿತಾ. ಆನಿಕ್‌ಯ್ ಜಣಾಂನಿ ಹ್ಯಾ ವಿಶಯಾಚೆರ್ ಕವಿತಾ ಬರಯ್ಲ್ಯಾತ್. ತ್ಯೊ ಫುಡಾರಾಂತ್ ಆಮಿ ಪರ್ಗಟ್ ಕರ್‍ತಾಂವ್. ಕವಯಿತ್ರಿ ವಾಯ್ಲೆಟ್ ಪಿರೇರಾ ಹಾಂಗಾಥಾವ್ನ್ ಹುಮೆದ್ ಘೆವ್ನ್ ಕೊಂಕಣಿಚ್ಯಾ ರುಕಾರ್, ಕವಿತೆಚೊ ಘೊಂಟೆರ್ ಬಾಂದ್ತಲಿ ಮ್ಹಣ್ಚ್ಯಾಂತ್ ಮ್ಹಾಕಾ ದುಬಾವ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತ್ಸುನಾಮಿ
ತ್ಸುನಾಮಿ, ತ್ಸುನಾಮಿ, ತ್ಸುನಾಮಿ
ಕಸ್ಲೆಂ ಹೆಂ ತುಜೆಂ ನಾಂವ್?
ಪಳೆವ್ನ್ ತುಜೆಂ ಖೆಸ್ತಾಂವ್
ವಿಜ್ಮಿತ್ ಪಾವ್ಲೊ ಸಗ್ಳೊ ಗಾಂವ್
ತಾರೀಕ್ ಸವೀಸ್ ದಶೆಂಬ್ರಾಚಿ
ನತಾಲಾಂಚ್ಯಾ ಸಂತೊಸಾನ್ ಭರ್‌ಲ್ಲಿ
ಸಪ್ಣಾಂತ್‌ಯ್ ಚಿಂತಿನಾತ್‌ಲ್ಲೆ ಘಡ್ಯೆಚಿ
ದರ್ಯಾಚ್ಯಾ ಹ್ಯಾ ವಿಚಿತ್ರ್ ಖೆಳಾಚಿ
ಉಟಯ್ಲೆಂ ವಾದಾಳ್ ಇಂಡೊನೇಶಿಯಾಂತ್
ಪಾವ್ಲೆಂಯ್ ತುಂ ಸಭಾರ್ ದೇಶಾಂಕ್
ಕೆಲೆಂಯ್ ಹಜಾರಾಂಕ್ ಅನಾಥ್
ಸೊಸುಂಕ್ ಸಕ್ಚಿಂನಾಂತ್ ಹೊ ಆಘಾತ್
ಆಯ್ಲೆಂಯ್ ತುಂ ಖಬ್ರೆವಿಣೆಂ
ಹಾಡ್ಲೆಂಯ್ ಸಭಾರಾಂಕ್ ಮರ್‍ಣಾಯೆಣೆಂ
ವೆಂಗೆಂತ್ ಆರಾಯ್ಲೆಂಯ್ ಜಾಂಟ್ಯಾ ನೆಂಟ್ಯಾಂಕ್
ಕೆಲೆಂಯ್ ನಿಶ್ಶಬ್ದ್ ಲಾಕಾಂನಿ ಲೊಕಾಕ್
ಕಾಳೀಜ್ ಕಡ್ತಾ ದೃಶ್ಯ್ ಹೆಂ ದೆಖ್ತಾನಾ
ಎಕಾಮೆಕಾ ತಕ್ಲೆಕ್ ಹಾತ್ ಮಾರ್‍ನ್ ರಡ್ತಾನಾ
ಭರುಂಕ್ ಸಕನಾತ್ಲೊ ಹೊ ನಷ್ಟ್
ಹಳು ಕರ್ ದೆವಾ ಹ್ಯಾ ಲೊಕಾಚೆ ಕಷ್ಟ್
- ವಾಯ್ಲೆಟ್ ಪಿರೇರಾ, ಕುಲ್ಶೇಕರ್/ದುಬಾಯ್