ಸಂಪಾದಕೀಯ್:
ಮಾಂಕೊಡ್ ಜಾಂವ್ಚೆಂ ಧೈರ್ ಸರ್ವಾಂಕ್ ಆಸನಾ
ಹಿ ಏಕ್ ಸಾದಿ ಸಂಪಿ ಕವಿತಾ ದಿಸತ್. ಪುಣ್ ಆಯ್ಚಿ ಸಮಾಜ್, ಪ್ರತ್ಯೇಕ್ ಕರುನ್ ಆಮ್ಚಿಂ ಭುರ್ಗಿಂ ಖಂಯ್ಚೆ ವಾಟೆನ್ ಚಮ್ಕೊನ್ ಆಸಾತ್ ಮ್ಹಳ್ಳೆವಿಶಿಂ ಏಕ್ ವಿಮರ್ಶಾತ್ಮಕ್ ನದರ್ ಹಿ ಕವಿತಾ ಚರಯ್ತಾ. ಅಸಲ್ಯಾ ಎಕಾ ಮಾನಸಿಕ್ ಬದ್ಲಾವಣೆಚಿಂ ಕಾರಣಾಂ ಕಿತೆಂ? ಹೆಂ ಕಿತ್ಯಾಕ್ ಅಶೆಂ ಜಾತಾ? ಹಾಕಾ ಪರ್ಯಾರ್ ಕಸಲೊ - ಮ್ಹಳ್ಳಿ ಸಭಾರ್ ಸವಾಲಾಂ ಮತಿಕ್ ರೆವೊಡ್ ಘಾಲಿನಾಸ್ತಾಂ ರಾವನಾಂತ್.
ಹಾಂಗಾಸರ್ ಕವಿ, ಹೆರಾಂಚೆರ್ ಬೊಟ್ ಜೊಕಿನಾ ತಿ ಮಹತ್ವಾಚಿ ಗಜಾಲ್. ಬದ್ಲಾ ಆಪ್ಲ್ಯಾ ಧುವೆಚೆರಚ್ ಬೊಟ್ ಜೊಕ್ತಾ. ತಿತ್ಲೆಂಚ್ ಕಿತ್ಯಾಕ್ ಆಪುಣಚ್ ಮಾಂಕೊಡ್ ಜಾತಾ. ಅಸಲೆಂ ಏಕ್ ಧೈರ್ ಸರ್ವಾಂಕ್ ಆಸನಾ. ಸಗ್ಳೆ ಕವಿತೆಂತ್ ಹ್ಯಾ ಸಂಗ್ತಿಂ ಖಾತೀರ್ ಕವಿ ಆಮ್ಕಾಂ ಖುಶಿ ದಿತಾ.
ಭಾಶೆಚೆ ನದ್ರೆನ್, ಉತ್ರಾಂ ಮಾಂಡುನ್ ದವರ್ಚೆ ವಿಶಿಂ ಥೊಡೆಂ ಚಿಂತನ್ ಆಟಯ್ಲೆಂ ತರ್ ಫುಡಾರಾಂತ್ ಉತ್ತೀಮ್ ಕವಿತಾ ಶಿಕೆರಾಮ್ ಆಮ್ಕಾಂ ದಿತಲೊ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೆ ಗಾಡಿಯೆರ್ ಏಕ್ ಮಾಂಕೊಡ್
ದಫ್ತರಾಕ್ ಭಾಯ್ರ್ ಸರ್ತಾನಾ ದುವೆನ್ ಸಾಂಗ್ಲೆಂ
ಬಸ್‍ಸ್ಟೋಪಾಕ್ ಪಾವಯ್ತಾಯ್? ಡ್ಯಾಡಿ ಮ್ಹಜೆಂ ಬಸ್ಸ್ ಚುಕ್ಲೆಂ.
ಗಾಡಿಯೆರ್ ಬಸವ್ನ್ ತಾಕಾ ಹಾಂವೆಂ ವಾಹನ್ ಚಾಲು ಕೆಲೆಂ
ಮಾರ್ಗಾಕ್ ಪಳೆವ್ನ್ ಚಲಯ್ತಾನಾ ಉಲೊಂವ್ಕ್ ಸುರು ಕೆಲೆಂ
"ಪುತಾ ಬರೇಂ ಕರುನ್ ಶಿಕ್, ವೇಳ್ ಪಾಡ್ ಕರಿನಾಕಾ
ಫ್ರೆಂಡ್ಸಾಂಕ್ ಪಯ್ಸ್ ದವರ್, ಮೊಬಾಯ್ಲಾರ್ ಚಡ್ ಉಲಯ್ನಾಕಾ
ಟಿವಿ ಪಳೆಂವ್ಚಿ ಉಣಿ ಕರ್, ರಾತ್ ಭರ್ ಬಸನಾಕಾ
ಸಕಾಳಿಂ ವೆಗಿಂ ಊಟ್ ಆಳ್ಸಾಯಿ ಕರಿನಾಕಾ
ಜಿಣಿಯೆಂತ್ ಶಿಸ್ತ್ ಮಸ್ತ್ ಗರ್ಜೆಚಿ, ಆತಾಂಚ್ ತುಂವೆಂ ತಿ ಶಿಕಜೆ,
ಸುರ್ವೆರ್ ಕಷ್ಟ್ ಜಾತಿತ್, ಪುಣ್ ಪ್ರಯತನ್ ಆಮಿ ಕರಿಜೆ,
ಧೈರ್ ಕೆದ್ನಾಂಯಿ ಹೊಗ್ಡಾಂವ್ಕ್ ನಜೊ, ಆತ್ಮ್ ವಿಸ್ವಾಸ್ ದವ್ರಿಜೆ,
ಆಮ್ಚೆಂ ಉಣೆಪಣ್ ಲೆಕಿನಾಸ್ತಾಂ ದುಸ್ರ್ಯಾಂಕಿ ಹುರುಪಾನ್ ಭರಿಜೆ".
ಬಸ್ ಸ್ಟೋಪ್ ಆಯ್ಲೆಂ, ಗಾಡಿ ರಾವವ್ನ್ ಹಾಂವೆಂ ಧುವೆಕ್ ದೆಕ್ಲೆಂ
ಕಾನಾಕ್ ಮಾಯ್ಕ್ ಶಿರ್ಕಾವ್ನ್ ತೆಂ ಮೊಬಾಯ್ಲಾರ್ ಪದಾಂ ಆಯ್ಕತ್ ಆಸ್ಲೆಂ.
ಮಾಯ್ಕ್ ಕಾಡುನ್ ಮ್ಹಾಕಾ ಪಳೆವ್ನ್ ಆಂಬೊರ್ ಪಿಕೆಂ ಹಾಸ್ಲೆಂ.
'ಡ್ಯಾಡಿ ತುಂವೆಂ ಕಾಂಯಿ ಸಾಂಗ್ಲೆಂಯ್ಗಿ?' ಅಶೆಂ ವಿಚಾರಿಲಾಗ್ಲೆಂ.
ಘಡಿಯೆಕ್ ಹಾಂವೆಂ ಚಿಂತ್ಲೆಂ, 'ಕಾಂಯ್ ಸಾಂಗೊಂಕ್ ನಾ ಪುತಾ' ಮ್ಹಳೆಂ
`ವೆಗಿಂಚ್ ದೆಂವೊನ್ ವಚ್, ಅಳೆ ತುಜೆಂ ಬಸ್ಸ್ ಆಯ್ಲೆಂ'
ಮ್ಹಾಕಾ ಟಾಟಾ ಕರುನ್ ಧುವ್ ಮ್ಹಜೆಂ ಬಸ್ಸಾರ್ ಚಡ್ಲೆಂ
ಮತಿಂತ್ ಮ್ಹಜೆ ಜಡಾಯ್ ಘೆವ್ನ್ ಹಾಂವೆಂ ವಾಹನ್ ಘುಂವ್ಡಾಯ್ಲೆಂ
ಮುಕಾರ್ ವಚೊನ್ ಗಾಡಿ ರಾವವ್ನ್ ಹಾಂವ್ ಸಕಯ್ಲ್ ದೆಂವ್ಲೊಂ
ಉಬೆ ರಾವೊನ್ ದೆಕ್ತಾನಾ ಮ್ಹಜೆ ಗಾಡಿಯೆಚೆ ಸಿಟಿರ್ ಮಾಂಕೊಡ್ ದಿಸ್ಲೊ
ವಿಚಾರಿನಾಕಾತ್ ತಿತ್ಲೆ ಭಿತರ್ ಖಂಯ್ ಥಾವ್ನ್ ತೊ ಆಯ್ಲೊ?
ದುಬಾವಾವಿಣೆ ತೊ ಮಾಂಕೊಡ್ ಹಾಂವಚ್ ಜಾವ್ನಾಸ್ಲೊಂ
-ಶಿಕೇರಾಮ್, ಸುರತ್ಕಲ್