ಸಂಪಾದಕೀಯ್:
ಆಬೊಲ್ಯಾಚಿ ತಾಂಕ್ ಮನ್ಶಾಕ್ ಕಿತ್ಯಾಕ್ ನಾ?
ಆಬೊಲ್ಯಾಂಚೊ ರಂಗ್ ಉಜ್ಯಾಪರಿಂ. ತಿಂ ಆಪ್ಲ್ಯಾಚ್ ಉಜ್ಯಾಂತ್ ಜಳ್ತಾತ್, ಸುಕ್ತಾತ್ ತರೀ ತಾಂಚೆಲಾಗಿಂ ಪರ್ತ್ಯಾನ್ ಖಿಣಾನ್ ಜಲ್ಮಾಕ್ ಯೆಂವ್ಚಿ ತಾಂಕ್ ಆಸ್ತಾ. ಹಾಂಗಾಸರ್ ಹೆ ಕವಿತೆಂತಯ್ ತಶೆಂಚ್ ಜಾಲಾಂ. ವೆಗ್ಳಾಚಾರಾಚೊ ಉಜೊ ಹಾಂಗಾ ದಿಸ್ತಾ. ಹ್ಯಾ ವೆಗ್ಳಾಚಾರಾಚ್ಯಾ ಉಜ್ಯಾಂತ್ ಭಸ್ಮಲ್ಯಾರಯ್, ಪರ್ತ್ಯಾನ್ ಉಟೊನ್ ಯೆಂವ್ಚಿ ತಾಂಕ್, ಜಿ ಆಬೊಲ್ಯಾಕ್ ಆಸಾ, ಹ್ಯಾ ಮನ್ಶಾಕ್ ನಾ.
ಉಟೊನ್ ಉಬೊ ರಾವಜೆ ಜಾಲ್ಯಾರ್ ಪಯ್ಲೆಂ ಮನ್ ಆಸಜಾಯ್, ಮಾಗೀರ್ ಧೈರಯ್ ಆಸಜಾಯ್. ಹೆಂ ದೊನಯ್ ನಾ ಜಾಲ್ಯಾರ್.? ಮಾಗೀರ್ ಫುಲಾಕ್ ಆಸ್ಚಿ ತಾಂಕ್ ಮನ್ಶಾಕ್ ಕಿತ್ಯಾಕ್ ಆಸನಾ?
ಸನ್ನು ಮೊನಿಸ್ ಅಪ್ರೂಪಾನ್, ಸಬಾರ್ ಕಾಳಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲಾ. ತಾಕಾ ಯೆವ್ಕಾರ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಬೊಲಿಂ
ತಿಂ ಆಬೊಲಿಂ
ಉಜೊ ವೊಂಕ್ತಾತ್
ಫುಲ್ತಾತ್, ಸುಕ್ತಾತ್
ಝಡ್ತಾತ್, ಪರತ್ ಫುಲ್ತಾತ್ !
ತುಜೊ ತೊ
ವೊರ್ಲಾಕುಡ್ಕೊ
ಆಜೂನ್...
ಆಮ್ಚೆ ಕಾಂಟ್ಯೆ ವೋಂಯ್ತ್
ಉಬ್ತೇ ಆಸಾ..
ಆಜಾದಿಚೊ ಝಂಡೊ ಉಬಲ್ಲ್ಯಾಪರಿಂ !
ತುಜೆಂ ಜೈತ್
ಆನಿ ಮ್ಹಜಿ ಸಲ್ವಣಿ
ವಾಡ್ಯಾಕ್ ಪಾಚಾರ್ತಾ
ಲಜೆವಿಣೆಂ !!
ಖುಂಟುನ್ ಫಾಸ್ಳುನ್ ಉಡೊಂವ್ಕ್
ಅತ್ರೆಗ್ ಹೆಡಾಯ್ತಾ
ಕಾಳೀಜ್ ಖೊಟಾಯ್ತಾ !
ಪುಣ್..
ಮ್ಹಾಕಾ ಮನ್‌ಯ್ ನಾ
ಧೈರಯ್ ನಾ.. !!
-ಸನ್ನು ಮೊನಿಸ್