ಮ್ಹಜೆಂ ಪರ್ನೆಂ ಟ್ರಂಕ್

ಸಂಪಾದಕೀಯ್:

ಮ್ಹಾತಾರೆ ಕುಡಿಭಿತರ್ ಅನ್ಭೋಗಾಚೆಂ ಭಾಂಗರ್ ಅಸ್ತಾ

ಟ್ರಂಕಾಕ್ ಮೊಲ್ ನಾತ್ಲ್ಯಾರ್ ಕಿತೆಂ ಜಾಲೆಂ? ಟ್ರಂಕ್ತಾಂತ್ಲ್ಯಾ ಭಿತರ್ಲೆ ಗಜಾಲಿಂಕ್ ಭಾಂಗರಾಚೆಂ ಮೊಲ್! ಕಾಂಯ್ ಮೊಲ್ ನಾತಲ್ಲ್ಯಾ ಟ್ರಂಕಾಂತ್ ದವರಲ್ಲ್ಯಾನ್ ಕೊಣ್ಣಾ ಹ್ಯೊ ವಸ್ತು ಬಾಳ್ವೊನ್ ಉರ್ಲ್ಯಾತ್ ಜಾಂವ್ಕಯ್ ಪುರೊ. ನಾಂತರ್ ಯೆದೊಳ್ ಖಂಯ್ ಪಾವ್ತ್ಯೊ ಕೊಣ್ ಜಾಣಾ! 

ಪರ್ನೆ ಕುಡಿಭಿತರ್ ಸೈತ್ ಅನ್ಭೋಗಾಚೆಂ ಭಾಂಗರ್ ಆಸ್ತಾ. ಪುಣ್ ಕೊಣ್ ತಾಚೊ ವಿಚಾರ್ ಕರ್ತಾ? ಕೊಣ್ ನಾ. ಕೊಣ್ ಉಗ್ತೆಂ ಕರ್ತಾ, ತಾಂಕಾಂ ತಾಂಚೆಂ ಮೊಲ್ ಕಳೀತ್ ಜಾತಾ.

ಹಾಂಗಾಸರ್ ವಿಲ್ಸನ್ ಕಟೀಲಾಚೆ ಕವಿತೆಂತ್ ಟ್ರಂಕಾಂತ್ಲಿಂ ಸತಾಂ ಉಗ್ಡಾಪಿಂ ಕೆಲ್ಯಾಂತ್. ತಿಂ ಉಗ್ಡಾಪಿಂ ಕರ್ತಾನಾ ತಾಣೆಂ ವಾಪರಲ್ಲಿ ಭಾಸ್ ಮ್ಹಾಕಾ ಆಕರ್ಶಿತ್ ಕರ್ತಾ. ಜ್ಯೊ ಪ್ರತಿಮಾ ತಾಣೆ ಉಬ್ಯೊ ಕೆಲ್ಯಾತ್, ತ್ಯೊ ಸುಂದರ್, ಬೋವ್ ಸೊಬಿತ್ ದಿಸ್ತಾತ್. ನಿಮಾಣೆ ವೊಳಿಕ್ ಪಾವ್ತಾನಾ,  ಹಿ ಕವಿತಾ ಪೊಟ್ಲುನ್ ಧರುನ್ ರಾವ್ತಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಮ್ಹಜೆಂ ಪರ್ನೆಂ ಟ್ರಂಕ್

ಆಂಗಾಪಾಂಗಾಕ್ ಮಾತಿ ಖೆಲ್ಲೆಂ
ಮ್ಹಜೆಂ ಏಕ್ ಪರ್ನೆಂ ಟ್ರಂಕ್
ದರಗ್ ವೊಂಟಾರ್ ತಾಚ್ಯಾ ಉಮ್ಕಳ್ಚೆಂ ಬೀಗ್
ಜರ್ ಉಗ್ತೆಂ ಕೆಲೆಂ
ಭಿತರ್...

***

ದಿಶ್ಟಿಭಾಯ್ರ್ ಪಾತ್ಳಾಲ್ಲ್ಯಾ ಅಂತ್ರಳಾಕ್‍ಚ್
ಕೆನ್ವಾಸ್ ಕರುನ್, ತರ್ನಾಟ್ಪಣಾಚಿಂ ಖತಾಂ
ಪುಸುನ್ ಉಡಯಿಲ್ಲ್ಯಾ ಕಾಪ್ಸಾಂಕ್ ಸಯ್ತ್
ಕುಪಾಂಚಿ ಸೊಭಾಯ್ ದಿಲ್ಲ್ಯಾ ಚೆಡ್ವಾಚೊ
ಪಾಸ್ ಪೋರ್ಟ್ ಸಾಯ್ಜ್ ಫೋಟೊ.

ಹಾಂವೆಂ ಆಪುಡ್ತಾನಾ ಬೊಟಾಉಬೆಕ್
ರಂಗ್ ಇರೊನ್, ಹಳ್ಕೆಭಾಯ್ರ್
ತಸ್ವೀರೆಚ್ಯಾ ಮುಸ್ಕಾರಾಚೆರ್ ವ್ಹಾಳನಾಶೆಂ
ತಾಕಾಯ್ ಏಕ್ ಫ್ರೇಮ್
(ತೆಂ ಮೇಕ್-ಅಪ್ ಕರ್ಚ್ಯಾಂತ್
ಎಕ್ದಮ್ ಪರ್ಫೆಕ್ಶನಿಸ್ಟ್ ಆಸ್‍ಲ್ಲೆಂ!)

*

ಘುಂವ್ಡೆ ಘುಂವ್ಡೆಂನಿ ಪಾಟಿಂ ಸರೊನ್
ದಿಶ್ಟಿಭಾಯ್ರ್ ಪಡ್‍ಲ್ಲ್ಯಾ ರಸ್ತ್ಯಾಂನಿ
ಮೆಳ್‍ಲ್ಲಿಂ ಮನ್ಶಾಂ, ಕಳ್‍ಲ್ಲಿ ಒಳೊಕ್
ಜಳ್‍ಲ್ಲಿಂ ವೊತಾಂ, ಶೆಳೆಲ್ಲ್ಯೊ ಸಾವ್ಳ್ಯೊ
ಗಾಳ್‍ಲ್ಲಿಂ ಘಡಿತಾಂ, ಪಿಳ್‍ಲ್ಲೆ ಆನ್ಭೋಗ್
ದಾಕಲ್ ಕೆಲ್ಲಿ ಜಿಣಿಯೆಚಿ ಡಾಯ್ರಿ.

ತಾಂತ್ಲಿಂ ವಿಣ್ಗಿಂ ವಿಣ್ಗಿಂ ಸತಾಂ
ಕೊಣಾಯ್ಚ್ಯಾ ದೊಳ್ಯಾಂಕ್ ಪಡನಾಶೆಂ
ಪರ್ನ್ಯಾ ಪ್ಯಾಂಟಾಂತ್ ಗುಟ್ಲಾಯಿಲ್ಲ್ಯಾ ತಿಚ್ಯಾ
ಆಂಗಾಕ್‍ಯಿ ಚಾಮ್ಡ್ಯಾಚೆಂ ಕವರ್
(ಕಾವ್ಯೆಂ ಜಾಂವ್ಕ್ ಭಾಯ್ರ್ ಸರ್ಚ್ಯೊ
ತಾಂತ್ಲ್ಯೊ ಪೊಜ್ಡ್ಯೊ ಗಜಾಲಿ
ಫಕತ್ ಖಬ್ರೊ ಜಾವ್ನ್ ಆಳ್ವನಾಶೆಂ
ಮಾತ್ಸೊ ಆಡೊಸ್ ಆಸೊಂದಿ ಮ್ಹಣ್!)

*

ಆದಿಂ ಮಾಗಾ ಅಖಂಡ್ ಜಾವ್ನ್ ಆಸೊನ್
ಉಪ್ರಾಂತ್ ಖಂಡ್ ಖಂಡ್ ವಿಂಗಡ್ ಜಾವ್ನ್
ಪಿಳ್ಗೆಥಾವ್ನ್ ಪಿಳ್ಗೆಕ್ ಸರ್ತಾನಾ
ಆಕ್ಕಾಡ್ಯಾಂಚಿ ಜುಗಲ್ ಬಂದಿ ಜಾವ್ನ್
ಮ್ಹಜೆ ತಕ್ಲೆಕ್ ಪಾವ್ತಾನಾ ತಿರ್ಕುಟ್ ಜಾಲ್ಲ್ಯಾ
ಕುಡ್ಕೊ ಜಾಗ್ಯಾಚೆಂ ಹಕ್ಕ್ ಪತ್ರ್.

ಸರ್ಕಾರಿ ಮ್ಹೊರಿಚೆ ಮಾರ್ ಸೊಸುನ್‍ಯಿ
ಉಟೊನ್ ದಿಸ್ಚ್ಯಾ ಬಾಬಾಚ್ಯಾ ಹೆಬ್ಬೆಟ್ಟಾಕ್
ಶೆಳ್ ಲಾಗೊನ್, ತಾಂತ್ಲೆಂ ನಿಳೆಂ ತೀಂತ್
ದರ್ಯೊ ಜಾವ್ನ್, ಜಾಗ್ಯಾಚಿ ನಕ್ಷಾ ಉತ್ರೊನ್
ಆನಿಯೆಕ್ಲ್ಯಾಚೆ ಗಡಿರ್ ರಗತ್ ಜಾಯ್ನಾಶೆಂ
ತಾಕಾಯ್ ಆಪುರ್ಬಾಯೆಚೆಂ ಲ್ಯಾಮಿನೇಶನ್|

(ಜಾಗ್ಯಾಚಿಂ ಪರ್ನಿಂ ರಿಕಾರ್ಡಾಂ ಪಾಪುಡ್ತಾನಾ
ಉಬ್ಚೆ ಧುಳಿಚ್ಯಾ ಪರ್ಮಳಾಕ್‍ಯಿ
ಮೋಲ್ ಬಾಂದ್ತಾತ್ ಶ್ಹೆರಾಂತ್ಲಿಂ ನಾಕಾಂ!)

***

ಹೆಂ ಮ್ಹಜೆಂ ಪರ್ನೆಂ ಟ್ರಂಕ್
ಸಾಂಗಾತಾಚ್ ಆಸ್ತಾ ಪಯ್ಣಾವೆಳಾ

ಹಾತಿಂ ಘೆವ್ನ್ ಗುಜಿರಿ ಆಂಗ್ಡಿಮುಕ್ಲ್ಯಾನ್
ಪಾಶಾರ್ ಜಾತಾನಾ
ಕಾವ್ಜೆಣಿ ಭೊಗ್ತಾ ಮ್ಹಾಕಾ-
ಕೋಣ್ ತರೀ
ಹಾಕಾಯ್ ಮೋಲ್ ಬಾಂದ್ತಿತ್ ಮ್ಹಣ್

ಸಾಂಗ್‍ಲ್ಲೆಬರಿ
ಭಾಂಗ್ರಾ ಆಂಗ್ಡಿಮುಕ್ಲ್ಯಾನ್
ಪಾಶಾರ್ ಜಾತಾನಾಂಯ್
ತಿಚ್ ಕಾವ್ಜೆಣಿ ಮ್ಹಾಕಾ!

-ವಿಲ್ಸನ್ ಕಟೀಲ್