ಸಂಪಾದಕೀಯ್:
ವಾವ್ರಾ ವಾನಾಂತ್ ವಾಟುನ್ ಗೆಲ್ಲ್ಯಾಂಕ್...!
ಸಾಂಜೆಚ್ಯಾ ವಾರ್‍ಯಾಚಿ ಪಾತಳ್ ಶಿರ್ ಏಕ್, ದಿಸಾಚ್ಯಾ ವಾವ್ರಾವಾನಾಂತ್ ವಾಟುನ್ ಗೆಲ್ಲ್ಯಾ ದಣ್ಸಲ್ಲ್ಯಾ ಮನಾಕ್ ಶಾಂತತಾಯೆಚೆ ಕುರ್ಪೆನ್ ಧಲಂವ್ಚೆಬರಿ - ಹಿ ಕವಿತಾ ಕಾಳ್ಜಾಮನಾಕ್ ಭುಲಯ್ತಾ. ಹ್ಯಾ ಸಂಸಾರಾಂತ್ ಎಕಾ ಮನ್ಶಾಬರಿ ಆನ್ಯೇಕ್ಲೊ ನಾ. ಹರ್‍ಯೆಕ್ಲೊ ವೆವೆಗ್ಳಿಂ ರಚ್ನಾಂ. ತ್ಯಾತೆಕಿದ್ ಹ್ಯಾ ರಚ್ಣಾಂಕ್ ವೆವೆಗ್ಳ್ಯಾ ಗೂಣ್-ಅವ್ಗುಣಾಂಚಿಂ ತೊಂಡಾಂ. ಹ್ಯಾ ತೊಂಡಾಂಚಿ ಆಪುರ್ಬಾಯ್, ಬೋವ್‌ಚ್ ಆಪುರ್ಬಾಯೆನ್ - ಆಮ್ಕಾಂ 'ಮಾಂಕೊಡ್' ಕರ್ನ್ ಮ್ಹಳ್ಳ್ಯಾಬರಿ ಕವಿನ್ ಆಮ್ಕಾಂ ದಾಕಯ್ಲ್ಯಾ.
ಕವಿ ಸುಧೀರ ಕೊಡಕಣೀ ಮ್ಹಾಲ್ಗಡೊ ಕೊಂಕಣಿ ಕವಿ. ಅಂತರ್‌ಜಾಳಿವಯ್ಲ್ಯಾನ್ ಕೊಂಕಣಿ ಭಾಷೆಚೊ ಹುಸ್ಕೊ ಸಂಸಾರ್‌ಭರ್ ಪಸ್ರಾವ್ನ್ ಆಸ್ಚೊ ಏಕ್ ಭಾಶೆವಾವ್ರಾಡಿ. ಕಾಂಯ್ ಥೊಡೊ ತೇಂಪ್ ತೊ ಮುಂಬಂಯ್ತ್ ಆಸ್ತಾ ಆನಿ ಕಾಂಯ್ ಥೊಡೆಪಾವ್ಟಿಂ ತೊ ಆಮೇರಿಕಾಂತ್ ಆಸ್ತಾ. ತರಿಪುಣ್ ತಾಚೊ ಉಸ್ವಾಸ್ ಏಕ್‌ಚ್ - ಕೊಂಕಣಿ. ಹಾಚೆಆದಿಂ ತಾಚ್ಯೊ ಕವಿತಾ ಆಮಿ ಪರ್ಗಟ್ ಕೆಲ್ಯಾತ್. ಕವಿತಾಕುಳಾರಾವಿಶಿಂ ತೊ ಅಂತರ್‌ಜಾಳಿವಯ್ಲ್ಯಾನ್ ಆಮ್ಕಾಂ ಪ್ರಸಾರ್ ದಿತೇ ಆಸ್ತಾ. ತಾಚೊ ಆಮಿ ಆಭಾರ್ ಮಾಂದ್ತಾಂವ್.
ಆಮಿ ದಿಲ್ಲ್ಯಾ ಉಲ್ಯಾಕ್ ಪಾಳೊ ದೀವ್ನ್ ತುಮಿ ಜಾಯ್ತ್ಯಾಂನಿ ಕವಿತಾಂಚೊ ದಾಳೊಚ್ ಆಮ್ಚೆರ್ ವೊತ್ಲಾ. ತೊ ಇತ್ಲೊ ಜಾಲಾಕಿ, ಮುಕ್ಲ್ಯಾ ಸ ಮ್ಹಯ್ನ್ಯಾಂಕ್ ಪರ್ಗಟ್ ಕರ್‍ಚ್ಯಾ ತಿತ್ಲ್ಯೊ ಕವಿತಾ ಯೆದೊಳ್‌ಚ್ ಆಮ್ಕಾಂ ಪಾವೀತ್ ಜಾಲ್ಯಾತ್. ತುಮ್ಚಿ ಹುಮೆದ್ ಅಶೀಚ್ ಮುಕಾರ್‍ಸುನ್ ವಚೊಂ. ವೆಗಿಂಚ್ ಹಪ್ತ್ಯಾಕ್ ಏಕ್‌ಪಾವ್ಟಿಂ ಪರ್ಗಟ್ ಜಾಂವ್ಚೆಂ 'ಕವಿತಾ ಕುಳಾರ್' ಹಪ್ತ್ಯಾಕ್ ದೋನ್ ಪಾವ್ಟಿಂ ಆಮಿ ಪರ್ಗಟ್ ಕೆಲ್ಯಾರಿ ಕೆಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಜ್ಜ್ಯಾಂತುಲೆ ತುಜ್ಜ್ಯಾಂತ್ ನಾ
ಮಜ್ಜ್ಯಾಂತುಲೆ ತುಜ್ಜ್ಯಾಂತ್ ನಾ
ತುಜ್ಜ್ಯಾಂತುಲೆ ತಾಜ್ಜ್ಯಾಂತ್ ನಾ
ತಾಜ್ಜ್ಯಾಂತುಲೆ ಹಾಜ್ಜ್ಯಾಂತ್ ನಾ
ಹಾಜ್ಜ್ಯಾಂತುಲೆ ಮಜ್ಜ್ಯಾಂತ್ ನಾ ! ಹೊಯ್ ನವೆ?
ಮಾಕ್ಕಾ ಕೊಪ್ ಆಯ್ಲ್ಯಾರೀ
ಹಾಂವ್ ಉಜ್ಜ್ಯಾಚೀ ಕೀಟೀ
ಕೊಣಾಕ್ ಕಶ್ಶೀ ಭಡ್ಕೈನ್
ಸೊದ್ದೂನ್ ಕಾಡ್ಚೀ ಭ್ರಾಂತೀ
ಜಾಲ್ಲ್ಯರೀ ಹೆರಶೆ ವೆಳಾರೀ
ಸಗ್ಳ್ಯಾಂಕ್ ಜಾಯ್ಸೊ ಮ್ಹಳ್ಯಾರೀ
ನಿರ್ಮಳ್, ಮೊವ್ವಾಳ್, ಮಧುರ್
ಗಾಯೆ ದುಧಾಂತುಲ್ಯಾ ಸಾಕರೆವಾರೀ !
ತೂಂ ಆಸ್ಸ್ ಭೊ ಮೆಹನತೀ
ಆನ್ನೀ ಖೂಪ್ ಬುದ್ದವನ್ತೂ
ಕೊಣಾಪಶೀ ಕಾಂಈ ಕಮ್ಮೀ ನಾ
ತೂಂ ಜಾಈ ಆಶ್ಶಿಲ್ಯಾ ಗುಣಾಂತೂ
ಜಾಲ್ಲ್ಯಾರೀ ಎಕ್ ಗುಣ್ ತುಗೆಲೊ
ಮಾಕ್ಕಾ ಖಟ್ಟಕತಾ,
ಪಾವ್ಹಣೆ ಮೆವ್ಹಣೇ ಘಾರಾ ಆಯ್ಲ್ಯಾರೀ
ಭೀಡೆನೆ ಗುಳ್ಳೀ ಜಾವ್ನು ತುಂ ಭಾಯ್ರ್ ಸಟಕತಾ!
ತಾಗೆಲ್ಯಾ ಗಮತೀಪಣಾಬದ್ದಲ್
ನ ವೆ ತೊ ಸಗ್ಳ್ಯಾಂಕ್ ಗೊತ್ತು?
ಖುಶಾಲೀ, ಕೊಮ್ಣೆ, ಫಿಶಪೊಂಡ್
ಹಾಂತು ಮುಖಾರೀ ಸಗ್ಳ್ಯಾಂತು
ಜಾಲ್ಲ್ಯಾರೀ...!ಅರೆ ದೆವ್ವಾ, ಜಾಲ್ಲ್ಯಾರೀ......
ಸಗ್ಳ್ಯಾಂಕ್ ಇತ್ತ್ಲೊ ಪ್ರಿಯ್ ಜಾಂನು ಆಶಿಲ್ಲ್ ತರಕೆಯೀ,
"ತೋ ಬೀಗೂ ಹಾತ್ತಾಚೊ, ಶಾನಭಾಗ್ ರೆ !"
ಮ್ಹಣೂ ಗಾಂವಾಂತು ಗೊತ್ತು!
ಹ್ಯಾ ಪೊರಾಗೆಲೆ ಅವಗುಣ್
ಸಕಟ್ ಮ್ಹಳ್ಳ್ಯಾರ್ ಸಕಟಾಂಕ್ ಗೊತ್ತು
ಚಂಚಲ್, ಉಡಾಪೀ, ಕೊಪಿಷ್ಟ್ ಮ್ಹಣೂ
ಬೆಜಾರ್ಲೋ ಮ್ಹಾಂತು!
ಜಾಲ್ಲ್ಯಾರೀ ಹಾಜ್ಜ್ಯಾವಾರೀ ಮಾಯಸ್ಥ್ ಚೆರ್ಕೋ
ಹಾಂವೆ ಪಳೈನೆ ಆಜಿವರಯಿ!
ಮ್ಹಾಂತಾಕ್ ದಾಂತ್ ನಾತ್ ಮ್ಹಣೂ ಹೋ
ವಯೀ ಜೆವ್ತಾ ತಾಕ್ ಆನ್ನಿ ವರಯೀ!
-
ಸುಧೀರ ಕೊಡಕಣೀ