ದೀಸ್ ಗೆಲಾ ಖಾಲಾ / दीस गेला खाला

ಸಂಪಾದಕೀಯ್/ संपादकीय

ಆಮೊರೆಚ್ಯಾ ಕಾಳಾರ್ ಯೆಂವ್ಚಿ ಮೊಗಾಚಿ ಯಾದ್

ಬಾಕಿಬಾಬಾ ಭಾಶೆನ್ ಮೊಗಾಚ್ಯೊ ಕವಿತಾ ಬರೊಂವ್ಕ್ ಸಕ್ಚೊ ಕವಿ ದುಸ್ರೊ ಕೊಣಯ್ ಆಸತ್ ಹಾಂವ್ ಚಿಂತಿನಾ. ಹೆ ಕವಿತೆದ್ವಾರಿಂ ಸಂಗೀತಾಚೊ ನವೊಚ್ ಏಕ್ ರಾಗ್ ತೊ ಬರಯ್ತಾ. ಬಾಕಿಬಾಬ್ ಆಪ್ಲ್ಯಾ ಕವಿತಾಂನಿ ಉತ್ರಾಂ ಅಶಿಂ ವಾಪರ್ತಾ, ತ್ಯಾ ಉತ್ರಾಂಕ್ ವೆವೆಗ್ಳೆ ಅರ್ಥ್ ಆಸ್ತಾತ್. ವಾಚ್ತಲ್ಯಾನ್ ಹೆಂ ಪಯ್ಲೆಂ ಸಮ್ಜಜಾಯ್ ಪಡ್ತಾ.

ಹೆ ಕವಿತೆಂತ್, ತೀನ್ ರಾತಿ ದೊಳೆ ಆಡ್ ಕರಿನಾಸ್ತಾಂ ತಾಣೆಂ ಸಾರ್ಲ್ಯಾತ್. ಹಾಕಾ ತಾಚ್ಯಾ ಉಡಾಸಾಚಿಂಚ್ ಕಾರಣಾಂ ಯಾ ಹೆರ್ ಆಸಾತ್, ತೆಂ ಹಾಂಗಾ ಕಳನಾ. ಕಾರಣಾಂ ಕಸಲೀಂಯ್ ಆಸೊಂ, ತ್ಯಾ ಕಾರಣಾಂ ಮಧೇಂಯ್ ಹಾಕಾ ತಾಚೊ ಉಡಾಸ್ ಯೆತಾ. ತಾಕಾ ಪಳೆಂವ್ಕ್ ತೊ ಆಶೆತಾ.

ಬಾಕಿಬಾಬಾನ್ ಆಪ್ಲ್ಯಾ ಖಂಯ್ಚೆ ಪ್ರಾಯೆರ್ ಹಿ ಕವಿತಾ ಬರಯಿಲ್ಲಿ ಮ್ಹಾಕಾ ಖಬರ್ ನಾ. ತಾಚ್ಯಾ `ಸಾಸಾಯ್` ಪುಸ್ತಕಾಂತ್ಲಿ ಹಿ ಕವಿತಾ ಹಾಂವೆಂ ವಿಂಚ್ಲ್ಯಾ.

बाकीबाबान आपल्या खंयचे प्रायेर ही कविता बरयल्ली म्हाका खबर ना. ताच्या `सासाय` पुस्तकांतली ही कविता हांवें विंचल्या.

-ಮೆಲ್ವಿನ್ ರೊಡ್ರಿಗಸ್ / मेल्विन रोड्रीगस

ಕವಿತಾ / कविता

ದೀಸ್ ಗೆಲಾ ಖಾಲಾ

ದೀಸ್ ಗೆಲಾ ಖಾಲಾ, ಚಂದ್ರಿಮ್ ವಯ್ರ್ ಆಯ್ಲಾ
ಕಳ್ನಾ ಕೊಣೆಂ ಆಮೊರೆಚೊ ರಾಗ್ ಅಸೊ ಲಾಯ್ಲಾ

ಚಂದ್ರದೆವಾ ಸಾಂಗ್ ರೆ ಮ್ಹಾಕಾ
ವೊಗೀಚ್ ಕುಪಾಂ ಪಾಂಗ್ರುಂ ನಾಕಾ
ಮೊಗಾ ಮ್ಹಜ್ಯಾ ಮೊವಾಳ್ ಕರುನ್ ಖಂಯ್ ತುಂವೆಂ ಪಾವಯ್ಲಾ

ಕೊಣೆಂ ಮೊಡಾಂ-ಲಕಾರಾಂನಿ
ಬಾವ್ಕ್ಯಾ ಫುಲಾಂರ್ ಮಾರುನ್ ಪಾಣಿ
ಪಾರ್ಥ್ಯಾ ಆಪ್ಲ್ಯಾ ಸುವಾಸಾಂನಿ ಸಾಂಗ್ ತಾಕಾ ಭುಲಯ್ಲಾ

ಭಿಜೊವ್ನ್ ಹಾಂವ್ ಸಾರ್ತಾಂ ವಾತಿ
ದಿಸಾರ್ ಪಸುನ್ ಲಾಗನಾ ಪಾತಿ
ಜಾಲ್ಯೊ ಆತಾಂ ತೀನ್ ರಾತಿ ಜೀವ್ ಗೋಳಾ ಲಾಗ್ಲಾ

ಗಾಯ್ತಾಂ ಲಾಯ್ತಾಂ ತಾಜೆಂಚ್ ನಾಂವ್
ಪಳೊಂವ್ಕ್ ತಾಕಾ ಮರ್ತಾಂ ಹಾಂವ್
ನುಲೈತ್ ತಾಕಾ ಸಾಂಗ್ ಹಾಂವೆಂ ಜಳ್ಟಾನಾ ಆಪಯ್ಲಾ

ಖಾಲಾ=ಸಕಯ್ಲ್; ರಾಗ್=ಸಂಗೀತಾಚೊ ಸ್ವರ್; ಪಾರ್ಥ್ಯಾ=ಬಾವಲ್ಲ್ಯಾ, ಶೆಳ್ಯಾ; ಪಾತಿ=ದೊಳ್ಯಾಂಚ್ಯೊ ಆಸ್ಡ್ಯೊ; ಗೋಳಾ ಲಾಗ್ಲಾ= ಫಾಶಿಯೆಕ್ ಚಡ್ಲಾ; ನುಲೈತ್=ಶಾಂತತೆನ್, ಆವಾಜ್ ಕರಿನಾಸ್ತಾನಾ;

-ಬಾಕಿಬಾಬ್ ಬೋರ್ಕರ್ / बाकीबाब बोरकार